پاکستان کرکٹ بورڈ دے چیئر مین ڈاکٹر نسیم اشرف اک ہور وخت توں مساں بچے ہین۔پیپلز پارٹی دے کو چیئر مین آصف علی زرداری نے صدر مشرف دے سنگی ڈاکٹر نسیم اشرف نوں کرکٹ بورڈ دے چیئر مین دے عہدے تے برقرار رکھن دا گرین سگنل دے دتا ہے۔ ایوان صدر تے کرکٹ بورڈ دے نیڑے دے وسیلیاں موجب آصف علی زرداری نے سانجھے بیلیاں راہیں سنیہا گھلیا ہے کہ ڈاکٹر نسیم اشرف اپنے عہدے تے برقرار رہن گے تے موجودہ حکومت حالی اوہناں نوں نہیں چھیڑے گی۔
وسیلیاں آکھیا پیپلزپارٹی دے آگو سینیٹر انور بیگ جیہڑے ڈاکٹر نسیم اشرف دے سخت خلاف ہین دیاں بورڈ دے چیئر مین نال صلح دیاں کوششاں تیز ہو گئیاں ہین۔ وسیلیاں دسیا ہے کہ جدوں تیکر صدر مشرف اقتدار وچ رہن گے ڈاکٹر نسیم اشرف وی بورڈ دے چیئر مین دی پکھ توں کم کردے رہن گے۔ ایس وچکار فاسٹ باؤلر شعیب اختر تے بورڈ وچ مفاہمت ہو گئی جیس توں مگروں شعیب اختر دی ٹیم وچ واپسی دا امکان روشن ہو گیا۔ ایس توں وکھ شعیب اختر نے بورڈ دے چیئر مین توں بناء کسے شرط دے معافی منگ لئی ہے۔
