کولکتہ نائٹ رائیڈرز دے کپتان سروو گنگولی تے ٹیم دے مالک شاہ رُخ خان وچکار ٹیم دے معاملات بارے کوئی پھڈا چل رہیا ہے پر گنگولی کولوں جدوں پچھیا گیا تے اوہنے آکھیا کہ ''ایہہ جھوٹھی گل ہے میں ایس توں ودھ کجھ نہیں آکھنا''۔ شاہ رُخ خان نے وی ایس بارے حالے تیکر کجھ نہیں آکھیا ہے۔
پر اندر دے مُخبراں نے دس پائی ہے کہ کولکتہ نائٹ رائیڈرز دا کیمپ کھلرن والا ہے۔ 'دادا' گنگولی اتے 'بادشاہ' شاہ رُخ خان ہن اک دوجے دے نال بوہتا چر نہیں چل سکدے۔ دوہیں دھراں ہُن کئی تھاواں تے اک دوجے دیاں اکھاں وچ اکھاں وی نہیں پا سکدیاں۔ جاپدا ہے کہ ایہہ جھیڑا اوس انٹرٹینمنٹ ٹیکس توں مگروں شروع ہویا ہے جیہڑا شاہ رُخ خان ایڈن گارڈنز وچ کھیڈے جاون والے میچاں لئی دے رہے ہین۔
شاہ رُخ خان چاہندے ہین کہ گنگولی لہندے بنگال دے وزیر اعلیٰ نوں کہہ کے ایس ٹیکس نوں ختم کروا دیون۔ کپتان گنگولی جیہڑے وزیر اعلیٰ دے نیڑلے بندے سمجھے جاندے ہین نے ایہہ سفارش کرن توں نانہہ کر دتی۔
سوادی گل ایہہ ہے کہ ایڈنز گارڈن ہندوستان دا اوہ اکلا سٹیڈیم ہے جیہدے وچ کوئی آئی پی ایل ٹیم انٹرٹینمنٹ ٹیکس دے رہی ہے۔ گل ایتھے ای نہیں مُکدی ہے اک ہور وڈا پواڑا پچھلے کجھ میچاں وچ ٹیم دی کھیڈ وی ہے جیہڑی روز دیہاڑے بھیڑی ہو رہی ہے۔ شاہ رُخ دے نیڑلے بندیاں دا آکھنا ہے کہ اوہ ٹیم دے کھیڈ توں راضی نہیں ہے پر اوہنے کھل کے ایس گل دا وکھالا نہیں کیتا۔
دوجے پاسے گنگولی مُڈھ توں ای ٹیم وچ کھڈائے جاون والے کھڈاریاں توں راضی نہیں ہے۔ ایہہ پاڑ بولی لاؤن ویلے ای ساہمنے آ گیا سی۔ گنگولی ٹیم وچ بوہتے بلے باز چاہندا سی جدوں کہ ٹیم دے پربندھی بوہتے گیند بازاں نوں ٹیم وی رلاؤنا چاہندے سن۔ پاڑ اودوں ہور موکلا ہو گیا جدوں ٹیم دے کوچ نوں کپتان نالوں بوہتے اختیار دے دتے گئے۔ تے بلدی تے تیل شاہ رُخ خان نے ایہہ آکھ کے پا دتا کہ اگلے ورہے وی سارے فیصلے کوچ ای کرے گا۔
