پاکستانی فاسٹ بالر محمد آصف نوں منشیات رکھن دے الزام وچ دبئی ائیر پورٹ تے پربندھیاں نے پھڑ لیا ہے۔ پنجھی سالاں دے محمد آصف پیر نوں ہندوستان وچ ہوون والے آئی پی ایل ٹورنامنٹ توں مگروں دبئی راہیں پاکستان مڑ رہے سی کہ دبئی ہوائی اڈے تے تلاشی وچکار اوہناں کولوں کوئی ممنوعہ شے نکلی۔
بی سی پی دے چیف آپریٹنگ افسر شفقت نغمی نے لہور وچ میڈیا نال گل کردیاں ہوئیاں کہیا کہ محمد آصف دے معاملے ولوں حالی صورتحال صاف پتہ نہیں لگی تے اوہناں دے خلاف حالی چارج شیٹ داخل نہیں کیتی گئی ہے۔ اوہناں کہیا کہ ایہہ گل وی ظاہر نہیں ہے کہ محمد آصف کولوں نکلن والی شے کیہڑی ہے۔
اوہناں کہیا کہ سانوں پوری آس ہے کہ ایہہ سارا معاملہ اک غلطی یاں بھلیکھے دا تت ہے۔ اوہناں دسیا کہ پاکستان کرکٹ بورڈ نے ایس صورتحال نال نبڑن لئی اپنے ڈائریکٹر ہیومن ریسورسز ندیم اکرم نوں دبئی گھلیا ہے تے دبئی دی اک قنونی فرم دیاں خدمتاں وی لئیاں ہین۔
محمد آصف نوں دبئی ائر پورٹ تے ہی بنے حراستی مرکز وچ رکھیا گیا ہے تے شفقت نغمی موجب ندیم اکرم تے محمد آصف دے وکیل نے حراستی مرکز وچ آصف نال ملنی کیتی ہے۔ اوہناں نے ایہہ وی کہیا کہ ایس معاملے دے حل لئی متحدہ عرب امارات وچ پاکستانی سفیر نال وی رابطہ کیتا گیا ہے۔
ایس توں پہلوں پاکستان کرکٹ بورڈ دے عہدیدار ندیم اکرم نے دبئی توں بی بی سی نوں دسیا کہ محمد آصف دا یورین ٹیسٹ لیا گیا ہے تے اوہناں دے بٹوے توں نکلن والی ممنوعہ شے نوں ٹیسٹ لئی لیبارٹری گھلیا گیا ہے۔'
محمد آصف کولوں نکلن والی منشیات ولوں پاکستانی میڈیا توں کئی قسم دیاں خبراں آرہیاں ہین جدوں کہ خبراں دے ادارے اے ایف پی نے پی سی بی دے ہی اک عہدیدار دے حوالے نال خبر دتی ہے کہ آصف نوں دبئی ائر پورٹ تے افیم رکھن دے الزام وچ پھڑیا گیا ہے۔
