پاکستان کرکٹ بورڈ دی گورنگ باڈی دے رکن تے پاکستان دی کرکٹ ٹیم دے گذریل کوچ تے کپتان انتخاب عالم نے بنگلہ دیش وچ ہندوستان دے ہتھوں پاکستان دی بھیڑی ہار دا ذمے وار ٹیم دے غیر ملکی کوچ جیف لاسن نوں آکھیا ہے۔انتخاب عالم دا کہنا سی کہ ہندوستان دے خلاف پاکستان دی ٹیم دی منصوبہ بندی بوہت بھیڑی سی۔
اوہناں کہیا کہ بنگلہ دیش دیاں وکٹاں نوں ویکھدیاں ہوئیاں ٹیم دے نال باقاعدہ سپنر نہ گھلنا وی سلیکشن کمیٹی دا صحیح فیصلہ نہیں سی۔ اوہناں نے کہیا کہ میچ وچ چار فاسٹ بالراں نوں کھڈانا وی کوئی سیانپ دا فیصلہ نہیں سی۔ انتخاب عالم موجب ایس میچ دی وکٹ سست سی تے انج دی وکٹ تے جدوں تیز گیند کروائی جاوے تے بیٹسمین دی زبردست شارٹس دی صورت وچ سزا ملدی ہے۔ اوہناں نے جیف لاسن تے تنقید کردیاں کہیا کہ جیف لاسن اپنے بالراں نوں نہیں دس سکے کہ اوہناں نوں گینداں کتھے کروانیاں چاہی دیاں۔
انتخاب عالم نے کہیا کہ بنگلہ دیش تے زمبابوے ورگیاں ماڑیاں ٹیماں توں جتنا کوئی اوکھی گل نہیں تے ایس نال کوچ دی کارکردگی نوں چنگا نہیں کہیا جاسکدا۔ اوہناں کہیا کہ اک مضبوط ٹیم دے ساہمنے آوندیاں ہی کوچ دی اہلیت کھل گئی۔ انتخاب عالم دا کہنا سی کہ اوہناں دی ہندوستان دے خلاف منصوبہ بندی نال اوہناں دے کارکردگی تے سوالیہ نشان لگیا ہے تے ہن پاکستان کرکٹ بورڈ نوں ایس معاملے تے غور کرنا ہووے گا کہ جیف لاسن ٹیم دے کوچ رہن یاں نہیں۔
جس ویلے جیف لاسن نوں پاکستان دی ٹیم دا کوچ لایا گیا سی انتخاب عالم پاکستان کرکٹ بورڈ دے گورنگ بورڈ دے رکن نہیں سن۔ ایس ویلے اوہناں نے جیف لاسن دی تقرری تے تنقید کیتی تے ڈیمو واٹمور نوں چنگا کہیا سی پر ہن اوہ پاکستان کرکٹ بورڈ دا حصہ ہین تے اوہناں دی جیف لاسن تے تنقید بڑی اہمیت رکھدی ہے۔
