گھپلے تے ڈائریکٹر نال بدتمیزی: چیئر مین پی سی بی نسیم اشرف دی معطلی دا فیصلہ

پی سی بی دے چیئر مین ڈاکٹر نسیم اشرف نوں معطل کرن دا فیصلہ کر لیا گیا۔ معطلی دا فیصلہ وزیر اعظم ہاؤس وچ ہوون والے اجلاس وچکار کیتا گیا۔ وسیلیاں نے کہیا ڈائریکٹر سلیم الطاف دے جوائی پچھلے وزیر اعلیٰ پنجاب دوست محمد کھوسہ نے فوری صدر مسلم لیگ ن میاں نواز شریف ، میاں شہباز شریف تے وزیر اعظم سید یوسف رضا گیلانی نوں حالات بارے دسیا جدوں کہ پی سی بی دی اُچ پدھری قیادت پہلوں چیئر مین پی سی بی نوں بدلن دا فیصلہ کر چکی ہے۔

وسیلیاں دسیا سلیم الطاف تے چیئر مین پی سی بی وچکار ہوون والے جھیڑے وچ ڈاکٹر نسیم اشرف نے سلیم الطاف دی ٹائی کھچن دی کوشش کیتی جیس تے موجود پی سی بی دے وڈے عہدیدار نے فوری چیئر مین پی سی بی نوں پھڑ لیا تے سلیم الطاف غصے نال کمرے چوں نکل گئے۔

آکھیا جارہیا ہے کہ فنانس مینجر محمد مشتاق نے سلیم الطاف نوں کجھ اہم دستاویزاں دتیاں جیہڑیاں ڈاکٹر نسیم اشرف دے گھپلیاں نال جڑیاں سی تے سلیم الطاف گاہے بگاہے اوہناں نوں میڈیا ساہمنے لیاون دیاں کوششاں وچ رجھے سن پر پی سی بی دی اچن چیتی ریکارڈ ٹیلی فون کالاں نے بھانڈہ بھن دتا جیس تے ڈاکٹر نسیم اشرف نے محمد مشتاق تے سلیم الطاف دوہواں نوں فارغ کرن دا فیصلہ کیتا۔

مشتاق نوں اک وڈے عہدیدار نے کمرے توں باہر سد کے گھر جاون دا حکم دتا۔ ایتھوں تیکر کہ اوہناں نوں اپنے کمرے توں دو موبائل فون تے بریف کیس چکن دی اجازت نہ دتی۔ محمد مشتاق نوں پندراں منٹ تیکر گیٹ تے بہائے رکھن توں مگروں اوہناں نوں بریف کیس دی تلاشی لین توں مگروں موبائل فون گارڈ دے ہتھ گھل دتا گیا۔ وسیلیاں نے کہیا چیئر مین پی سی بی لئی چھ ہستیاں دے ناواں دی لسٹ وزیر اعظم یوسف رضا گیلانی نوں پیش کر دتی گئی جیس دا فیصلہ اک ہفتے دے وچ کر لیا جاوے گا۔