چین دے اُچ پدھری سیکیورٹی افسراں نے خبردار کیتا ہے کہ چین دے ویری اگلے مہینے بیجنگ وچ ہوون والیاں اولمپک کھیڈاں نوں برباد کر سکدے ہین۔ پبلک سیکیورٹی دے نائب وزیر یانگ ہاننگ نے چینی آگواں نوں ایس بارے خبردار کر دتا ہے۔
پچھلے کجھ مہینیاں وچ چین جاون والیاں لئی ویزے دے قانون سخت کر دتے گئے ہین۔ لہندے دے کجھ مین میخ کڈھن والے پہلوں ای کھپ پا رہے ہین کہ ایہہ 'بے سوادیاں' کھیڈاں ہوون گیاں۔ پر چین اہناں کھیڈاں دی مشہوری لئی بڑا پیسہ لا رہیا ہے۔
پبلک سیکیورٹی دی ویب سائٹ تے یانگ دا بیان لگا ہے کہ ''جیویں جیویں اولمپک کھیڈاں دے دیہاڑے نیڑے آ رہے ہین چین دے ویریاں ولوں کاروائیاں وچ تیزی آ رہی ہے تے اوہ اہناں نوں برباد کرن لئی پورا ٹل لا رہے ہین۔''
چین نے حالیں باہرلے ملکاں توں آؤن والیاں لئی قانون سخت کر دتے ہین تے جیہناں شہراں وچ کھیڈاں ہونیاں نیں اوتھے اینٹی نارکوٹکس نے چھاپے مارے ہین۔ ایس توں اڈ بیجنگ وچ کھیڈ والیاں تھاواں تے جہازاں نوں مارن والے میزائل وی لا دتے گئے ہین۔
جمعے دے دیہاڑے فرانس دے میڈیا نے دسیا سی کہ پردھان نکولس سرکوزی اہناں کھیڈاں دے مُڈھ بجھن دے اکٹھ وچ امریکی پردھان بش نال رلتی ہوون گے۔
