رستم پاک و ہند پنجاب دنگل دے جوڑ 15 اگست توں پینے شروع ہوون گے۔ ایہہ جوڑ پنجاب دے چار شہراں وچ ہون گے۔ لہور وچ رستم پاک و ہند پنجاب دنگل دی پربندھی کمیٹی دے چیئرمین اعجاز گل نے اک نیوز کانفرنس وچ دسیا کہ پاکستان وچ پہلی واری ایہہ دنگل حکومت پنجاب دے آکھن تے کروایا جا رہیا ہے تاں جے روایتی کشتی نوں فیر جیوندیاں کر کے اکھاڑیاں نوں آباد کیتا جا سکے۔
چڑھدے پنجاب دے پہلوان 12 اگست نوں واہگہ راہیں لہندے پنجاب اپڑن گے اتے اوہناں نوں بگھیاں تے لہور لیاندا جاوے گا۔ اوہناں دسیا کہ 15 اگست نوں ملتان وچ چار 17 اگست نوں بہاولپور وچ چار، 24 اگست نوں گوجرانوالہ وچ 9 اتے 26 اگست نوں لہور وچ 7 جوڑ ہوون گے۔
مقابلیاں وچ پاکستان دے حامد خان، اچھی پہلوان اتے رستم پاکستان بشیر بھولا بھالا اتے ہندوستان دے نریندر کمار تے نوین کمار ورگے جگت جانو پہلوان رلتی ہو رہے ہین۔ رستم پاک و ہند پنجاب دے سرناویں لئی بشیر بھولا بھالا اتے نوین کمار دے وچکار جوڑ لہور وچ پوے گا۔
