بیجنگ وچ بھارتی مشن مُک گیا ہے۔ اٹھ وار اولمپک چیمپیئن رہی بھارتی ہاکی ٹیم دا بیجنگ وچ کھیڈن لئی اہلیت ہی ثابت نہ کر پاؤنا بے حد نموشی بھری گھٹنا سی پر اک سونے دے تگمے سنے پہلی وار ٣ تگمے جتن نال بھارتی کھیڈ وچ کافی کُجھ تبدیل ہُندا جاپدا ہے۔
بھاویں سوا ارب دے مُلک لئی ایہہ ٣ تگمے نگونے ہی ہن پر گل شُروعات دی ہے۔ شُروعات ہو گئی ہے تے ہوئی وی چنگی ہے۔ ایہہ تنے دے تنے تگمے اکلے کھڈاری مقابلیاں وچ جتے گئے ہن۔ اس توں وی اہم گل ایہہ ہے کہ ابھنو بندرا، سُشیل کُمار اتے ورندر نے ایہہ کامیابی آپنے دم خم نال حاصل کیتی ہے۔
ابھنو بندرا دا سونے دا تگما جتنا بھارت لئی مہان واقعہ ہے۔ ١١٢ سالاں دی اولمپک تاریخ وچ اکلے کھڈاریاں دے مقابلیاں وچ ایہہ پہلی وار ہویا ہے کہ ترنگا سبھ نالوں اُچا لہرایا۔ ابھنو دے مُقابلے کُشتی وچ سُشیل کُمار اتے مُکے بازی وچ وجندر دا کانسی دے تگمے حاصل کرنا دیکھن سُنن نوں بھاویں تھوڑی گھٹ کامیابی جاپدی ہووے پر تھوڑا نیجھ نال دیکھیاں سمجھیاں پتہ لگدا ہے کہ کئی معنیاں وچ ایہناں دوہاں دا کانسی دے تگمیاں تک پہنچنا کسے وی پاسیوں گھٹ نہیں ہے۔ ابھنو دی درڑھتا، سنجم اتے ڑمچھی دی اکھ ونھ دین دی قابلیت اتے اُوس دے ماپیاں دا اُوس دی کھیڈ بارے سمرپن ساڈے ساریاں دے ستکار دا حقدار ہے۔
ابھنو نوں نشانے بازی ورگی کھیڈ وچ دنیا دے پہلے نمبر دا نشانچی بناؤن وچ اُوس دے ٹبر نے ١٥ کروڑ روپئے خرچے ہن، ایہہ کوئی چھوٹی موٹی گل نہیں ہے۔ اج بھاویں ابھنو تے دھن دی بارش ہو رہی ہے پر جدوں اُوس نوں سکھلائی لئی پیسے دی لوڑ سی تاں اوس دے نیڑے تیڑے اوس دے ٹبر توں بناں کوئی نہیں سی۔ آپنے گھر وچ کروڑاں روپئے لا کے شوٹنگ رینج بناؤنی تے آپنے ہی خرچے تے پردیس وچ کوچنگ لئی بھیجنا تے سونے دا تگما جتن توں بعد تگما کروڑاں بھارتیاں نوں سمرپت کر دین دی گؤرو گاتھا لکھن والے بندرا ٹبر نوں مُلک سدا ہی آپنے چیتیاں وچ سانبھ کے رکھے گا۔
اگلی گل اسیں سُشیل کُمار اتے وجیندر دے حوالے نال کرنی ہے۔ ایہہ دوویں اتے ایہناں دے نال کواٹر فائنل تک پہُنچے مُکے باز اکھل کُمار تے جتندر ہماتڑ خانداناں دے بچے ہن۔ سُشیل کُمار دے پنڈ وچ تاں ساریاں لئی صاف پانی وی مہیا نہیں ہے۔ اجہیاں حالتاں وچ رہن، بہن، کھان پین اتے مٹی دے اکھاڑیاں وچ زور ازمائی کرن والے نوجوان اولمپک توں تگما لے کے پرتدے ہن تاں ایہناں دے سرڑ تے محنت نوں سلام کرنی پوے گی۔ سُشیل کُمار تاں اولمپک دیاں باقی کھیڈاں دے رام رولے وچ لگ بھگ وسار ہی دتا گیا سی۔ پر اک دن لگاتار چار کُشتیاں لڑ کے کانسی دے تگمے نوں چُم کے اُوس نے پُورے مُلک نوں پباں بھار کر دتا۔ اُوس توں بعد وجیندر دا وی کانسی دا تگما جت جانا بھارتی کلغی وچ ہیرے جڑن ورگا احساس ہے۔
اولمپک وچ ساڈے ایہناں نوجواناں دی مان متی کارگُزاری بہُت کُجھ بدل دین ول سینت ہے۔ پلاں وچ ہی بھارتی جوانی دے نویں ہیرو اُبھر آئے ہن۔ ایہہ ہی اصل ہیرو ہن۔ پر ایہناں دیاں کامیابیاں بوہتیاں اکلے بندیاں دیاں ہو کے وی آپنے مُلک دیاں ہن۔ ہُن ایہہ مُلک نوں چلاؤن والیاں نے دیکھنا ہے کہ ایہناں کامیابیاں دا دو چار دن ڈھول وجا کے من راضی کر لینا ہے جاں پھر ایہناں نوں ہور کامیابیاں ول لے کے جانا ہے۔ بناں شک ایہناں نوجواناں نے دکھا دتا ہے کہ بھارت کول صلاحیت دی کوئی تھوڑ نہیں ہے۔تھوڑ اوس ڈھانچے وچ ہے جیہڑا مُلک نوں جام کری بیٹھا ہے۔ آپنا مُلک پُوری طرحاں اساویں اتے غلط سیاسی تے اقتداری ڈھانچے کارن ہی ہر کھیتر وچ ڈھیچک ماردا تُردا ہے۔
کسے وی مُلک دا مان اوس دیاں کھیڈ کامیابیاں وچوں وی تکیا جاندا ہے۔ ساڈے حاکماں نوں ایہہ تاں سوچنا ہی پوے گا کہ کیہ کارن ہے کہ ١٩٨٤ وچ پہلا سونے دا تگما جتن والا چین اج امریکہ دیاں گوڈنیاں لوا کے جگ دی کھیڈ مہان طاقت بن گیا ہے جدکہ ساڈی قومی کھیڈ ہاکی اولمپک وچ کوالیفائی وی نہیں کر سکی۔ کتھے ہے گڑبڑ؟ کس نوں نہیں پتہ گڑبڑ کتھے اتے کس دی پیدا کیتی ہوئی ہے۔ لوڑ ایماندارانہ پہنچ دی ہے۔ اک صحیح سمت والی بجھویں کھیڈ پالیسی ہی دنیا دے کھیڈ نقشے تے بھارت دے نکے جہے بندو نوں اک وڈے سُرخ سورج وچ تبدیل کر سکدی ہے۔ شاعر متر مکھن کُہاڑ دے اس شعر نال دیو اجازت۔
ستارے ہاں اسیں سارے، ہے ساڈے کول سورج وی، بنا کے اک فلک اپنا، دھرتی دی نذر کریئے۔
