اُتے ذکر ہو چکیا ہے کہ ایہہ ٹبر وحشی جُگ ( بربریت) دے وچلے تے اخیرلے وارے دے وچ دے چلاوے ویلے وچ جوڑا ٹبر توں جمیا۔ تے اُس دی پوری جت ایس گل دی نشانی ہے کہ رہتل دا دور چھوہ پیا ہے۔اک تینویں دے ویہار دا مُڈھ مرد دی وڈیائی تے ہے۔اُس دا کھلم کھلا ٹیچا ایہو جہے نیانے جمنا ہے جنہاں دے پیو بارے کوئی شک نہ ہووے۔ ایس دی لوڑ ایس لئی ہُندی ہے کہ ویلا آون تے نیانے اپنے پیو دے اصلی وارث دی حیثیت نال اُس دی دولت دا ترکہ پاون۔اک تینویں تے جوڑا ویاہ وچ فرق ہے۔اک تینویں وچ ویاہ دا ساک بڑا پکا ہُندا ہے تے دوہواں دھراں وچوں کوئی وی جدوں چاہوے ایس نوں توڑ نہیں سکدا۔عام طور تے ہن نرے مرد نوں ہی ایہہ ساک توڑن تے تینویں نوں چھڈن دا حق ہُندا ہے۔ ہن وی اُس نوں اپنی گھر والی نال بےوفائی کرن دا حق ملدا ہے۔گھٹوگھٹ رسماں ریتاں نے تے ایس تے اپنی مہر لا ہی دتی ہے۔ (Code Napoleon 22) وچ کھسم نوں ایہہ حق دتا گیا ہے کہ اوہ چاہے تے رکھیل رکھ سکدا ہے ایس شرط تے کہ اوہنوں گھر دے وچ نہ لیاوے (17)۔ جیویں جیویں وسیب دی بڑھوتری ہُندی ہے مرد ایس حق توں بوہتا لابھ چکدا ہے۔ پر جے تینویں پرانے کام (جنسی) رواجاں نوں چیتے کر کے اوہناں تے عمل کرنا چاہوے تے اوہنوں پہلاں توں وی بوہتی ڈاڈھی سزا ملدی ہے۔ اسیں ویکھنے آں کہ یونانیاں وچ ٹبر دی ایس نویں شکل تے بڑا کڑا عمل کیتا جاندا سی۔جیویں کہ مارکس نے دسیا ہے۔ (23) یونانی متھاس( دیومالا) وچ دیویاں دا جیہڑا مرتبہ ہے اوہ پرانے دور دی گل ہے جدوں زنانیاں نوں بوہتی کُھل سی تے اوہناں دا بوہتا آدر کیتا جاندا سی۔ پر اسیں ویکھنے آں کہ سورمائی جُگ وچ مرداں دے چھاون تے غلام زنانیاں دے ٹاکرے پاروں زنانیاں اپنے اُچے مرتبے توں ڈگ گئیاں۔''اوڈیسی'' وچ تسی پڑھو گے کہ تیلی ماکس اپنی ماں نوں جھڑکاں مار کے چُپ کروا دیندا ہے۔(24) ہومر دیاں نظماں وچ اسیں پڑھنے آں کہ جدوں کدی جنگ وچ جوان زنانیاں پھڑیاں گئیاں،اوہناں نوں کام سواد دا راہ بنایا گیا۔فوج دے افسر اپنی اپنی پوڑی موجب اک توں مگروں اک آؤندے ہین تے سب توں سوہنیاں زنانیاں نوں اپنے اپنے لئی چن لیندے ہین۔اسیں جاننے آں کہ ''ایلیڈ'' دا پورا قصہ ایس اک وقوعے دے دوالے گھمدا ہے کہ اکیلیس تے ایگا ممنون وچ اک ایہوجہی غلام کڑی پاروں جھیڑا ہوگیا ہے۔ ہومر دیاں نظماں وچ ہر اُچے ہیرو دے نال اک غلام کُڑی ضرور ہُندی ہے جیہڑی اُس دے تنبو وچ رہندی ہے تے جیس نال اوہ سوندا ہے۔ایہناں کُڑیاں نوں اوہناں دے مالک اپنے نال گھر لے جاندے ہین جتھے اوہناں دیاں تینویاں ہُندیاں ہین۔ایسکیلس دے ایتھے انج ہی ایگا ممنون کیسندر نوں اپنے گھر لیایا گیا سی۔(25) ایہناں باندیاں توں جیہڑے منڈے جمدے سن اوہناں نوں پیو دی مالکی توں تھوڑا جہیا حصہ ملدا ہے تے اوہناں نوں آزاد سمجھیا جاندا ہے۔تیلامون دا اک ایہو جہیا ہی ناجائز پتر تیوکراس سی جنہوں اپنے پیو دا ناں نال لاون دی اجازت دے دتی گئی سی۔ ویاہی ہوئی تینویں توں آس کیتی جاندی ہے کہ اوہ ایہہ سارا کجھ چُپ چپیتیاں جھل لوے گی تے آپوں کھسم دی پورا پکی رہوے گی۔ایہہ صحیح ہے کہ رہتلی دور دے ٹاکرے وچ سورمائی جُگ وچ یونانی گھر والی دا آدر کیتا جاندا سی۔ پر کھسم دیاں نگاہاں وچ اُس دی تھاں ایس توں بوہتی نہیں سی کہ اوہ اُس دے جائز وارثاں دی ماں ہے، اُس دے گھر دی ویکھ بھال کر دی ہے تے اُس دیاں باندیاں دی راکھی کردی ہے جنہاں نوں اوہ جدوں چاہے رکھیل بنا سکدا ہے تے کئی واری اوہ انج کردا وی ہے۔ اک تینویں دے نال کیوں جو بروبر غلامی دی ریت رہی تے سوہنیاں جوان باندیاں دا وجود رہیا جیہڑیاں ہمیش مرداں دی پوری پوری مالکی ہُندیاں سن، ایس لئی مڈھوں ہی اک تینویں تے ایس دا اثر پیا۔ تے ایسے پاروں اک تینویں دا ایہہ اُچیچا کم ہو گیا کہ زنانیاں لئی تے اک کھسم دی روک ہے پر مرداں لئی اک تینویں دی نہیں ہے۔ تے اج وی ایہو ہی حالت ٹری آ رہی ہے۔ جتھوں تیکر سورمائی وارے توں مگروں یونانیاں دا تعلق ہے سانوں ڈورین تے ایونی لوکاں وچ فرق کرنا چاہیدا ہے ۔ڈورین لوکاں دی سب توں چنگی تے اُگھڑ دی مثال اپارٹا وچ ملدی ہے۔ایہناں وچ ویاہ دے ایہو جہے ساک ملدے ہین جیہڑے کئی گلاں وچ ہومر دے دسے ہوئے ساکاں توں وی ودھ پرانے ہین۔ اسپارٹا وچ سانوں جوڑا ویاہ دی اک شکل وی ملدی ہے جنہوں اوتھوں دی ریاست نے اوتھوں دے خیالاں موجب کجھ بدل دتا ہے۔ جوڑا ویاہ دی ایہہ اک ایہو جہی شکل سی جیس وچ اُس ویلے تیکر جتھے دار ویاہ دے اثر وی موجود سن۔جیس ویاہ توں نیانے نہیں ہُندے سن اوہنوں توڑ دتا جاندا سی۔ بادشاہ انکسندریدس (تقریباََ560 ق ۔م) دی پہلی تینویں بے اولاد سی۔ایس لئی اوس نے دوجا ویاہ کروایا تے دو گھر وسائے۔ ایسے ویلے دا اک بادشاہ ارسطونس ہے۔ اوس دیاں دو تینویاں بے اولاد سن۔اوہنے اک نوں چھڈ دتا تے تیجا ویاہ کیتا۔دوجے پاسے کئی بھرا رل کے اک تینویں رکھ سکدے سن۔ جے کسے بندے نوں اپنے بیلی دی تینویں چنگی لگدی تے اوہ اوس وچ بھیالی پا سکدا سی۔ تے جیویں کہ بسمارک آکھے،جے کِتے کوئی تگڑا ''سانڈھ'' ہووے، بھاویں اوہ بندہ شہری نہ ہووے تے وی اپنی تینویں نوں اُس نوں سانبھنا ٹھیک سمجھیا جاندا سی۔ پلوتارک دی اک کتاب وچ اک تھاں ایہہ ذکر ہے کہ اک اسپارٹن زنانی نے اپنے اک عاشق نوں، جیہڑا بڑے دناں توں اُس دے مگر پیا ہویا سی، اپنے کھسم کول گھل دتا۔ شومان نے ایس توں ایہہ تت کڈھیا کہ اوہناں دناں وچ جنسی آزادی سی۔ زناکاری یعنی کھسم دے مگروں بیوی دا اوس نال ویاہ کرنا، اوہناں دناں وچ سنن وچ نہیں آؤندا سی۔ دوجے پاسے، اسپارٹا وچ ،گھٹو گھٹ ایس دے چڑھتل دے ویلے وچ گھروکی غلامی نہیں سی۔زرعی غلام ایلوٹ، وکھ جاگیراں تے رہندے تے ایس لئی اسپارٹیاٹیز (18) نوں اوہناں زنانیاں نال سون دا اُلار گھٹ ہی ملدا سی۔ایہناں حالاں وچ ایہہ قدرتی گل سی کہ دوجیاں ساریاں یونانی زنانیاں دے ٹاکرے وچ اسپارٹا دیاں زنانیاں دی بوہتی عزت ہُندی سی۔ پچھلے ویلے دے لکھاریاں نے یونانی زنانیاں وچ صرف اسپارٹا تے ایتھنز دی ہیستائری زنانیاں دے سب توں اُچے حصے دا ذکر آدر تے عزت دے نال کیتا ہے تے اوہناں دے قولاں نوں اپنیاں کتاباں وچ تھاں دتی ہے۔ ایونی لوکاں وچ جنہاں دی اُگھڑ دی مثال ایتھنز دے لوک ہین،حالات کجھ ہور سن۔اوتھے کڑیاں بس چرخا کتنا، کپڑا بُننا تے سینا پرونا سکھ دیاں سن۔ بوہت ہویا تے کجھ لکھنا پڑھنا سکھ لیا۔مرداں توں اوہناں نوں اُکا وکھرا رکھیا جاندا۔ اوہ صرف زنانیاں نال ہی مل سکدیاں سن۔ زنانیاں گھر دے اک وکھرے حصے وچ رہندیاں سن۔ایہہ حصہ بہتا اُتلی منزل یاں مکان دے پچھے ہُندا سی۔جتھے مرداں دا تے اُچیچا کسے اوبھڑ مرد دا آؤنا جانا آزادی نال نہیں ہو سکدا سی۔ تے مرد پروہنیاں دے آؤن تے بیبیاں اوتھوں ٹر جاندیاں سن۔ بیبیاں صرف کسے باندی نوں نال لے کے ہی باہر جا سکدیاں سن نہیں تے،گھر وچ اوہناں تے پہرہ جہیا رہندا سی۔اریسطو فینس لکھدا ہے (19) دے بدکاراں نوں دور رکھن لئی مولوسین کتے پالے جاندے سن۔ ایشیائی شہراں وچ زنانیاں تے پہرہ دیون لئی زنانے رکھے جاندے سن۔ ہوروڈوٹس دے زمانے وچ وی جزیرہ کیوس وچ نوکراں نوں کھسی کر کے خُسرے تیار کیتے جاندے سن تے اوہناں دا وپار کیتا جاندا سی۔ تے واکس متھ دا کہنا ہے کہ اوہ صرف بربراں لئی نہیں ہُندے سن۔ یورپاڈیز دے ڈرامیاں وچ تینویں نوں اوئیکوریما (oikurema) آکھیا گیا ہے (26) جیس دے معنے ہین گھر دی راکھی کرن والی شے (ایہہ لفظ بے جنس دا ہے) تے ایتھنز دے لوکاں وچ تینویں دا کم نیانے جمن توں وکھ جے کجھ سی تے صرف ایہہ کہ اوہ گھر دی سب توں وڈی نوکرانی سی۔ کھسم اکھاڑے وچ کسرت تے ورزش کردا سی، شہری معاملیاں وچ حصہ لیندا سی۔تینویں نوں ایس توں وکھ رکھیا جاندا سی۔ ایس توں وکھ کھسم کول کئی واری لونڈیاں باندیاں ہُندیاں سن تے ایتھنز دے چڑھتل دے وارے وچ بوہتیاں کنجریاں سن، وڈی پدھر تے عزت ویچی جاندی سی تے حکومت جے کجھ ہور نہیں تے ایس نوں پسند دی نظر نال تے ویکھدی ہی سی۔ یونان وچ جنیاں زنانیاں نے وی ناں کمایا ایسے عزت ویچن دے مُڈھ تے۔ اوہ اپنی زندہ دلی تے ہس کھیڈ کے بولن تے کلا دے اُچے شوق پاروں پچھلی نسائیت دی عام پدھر توں اینیاں اُچیاں سن جنیاں اسپارٹا دیاں زنانیاں اپنے کردار پاروں۔ایتھنز دے ٹبری ویہار دے گھٹیا ہوون دا ایس توں وڈا کوئی ثبوت نہیں ہوسکدا کہ زنانی نوں اپنا مرتبہ پاؤن لئی پہلاں کنجری بننا پیندا سی۔ سہجے سہجے ایتھنز دا ایہہ ٹبر اک ونگی بن گیا تے صرف ایونی دے رہندے لوک ہی نہیں سگوں اُچیچا یونان تے اُس دی کالونی گیری دے سارے یونانی لوک وی اپنے خاندانی سانگیاں نوں بوہتے توں بوہتا ایسے سچے وچ ڈھالن لگ پئے۔ پر ایس سارے وکھیویں تے راکھی توں مگروں وی یونان دیاں زنانیاں کئی واری اپنے کھسماں نوں دھوکہ دیون دے موقعے کڈھ ہی لیندیاں سن۔اوہناں دے کھسم جنہاں نوں اپنی تینویں نال محبت دا وکھالا کرن وچ نموشی ہُندی سی،کنجریاں تے داشتہ زنانیاں دے نال دل کھول کے سارا کجھ کر دے تے کئی طریقیاں نال محبت دے سواد لیندے سن۔ پر زنانیاں دی ایہہ مند حالی مرداں تے وی پورا اثر کر گئی۔اوس نے اوہناں نوں وی اخلاقی طور تے ہور ہیٹھاں کھڈ وچ سُٹ دتا ایتھوں تیکر کہ اوہ منڈیاں نال محبت دے کام روگی ( جنسی مریض) بن گئے تے گینی مید دا قصہ گھڑ کے اوہناں آپنے آپ تے آپنے خداواں نوں ذلیل کیتا۔ پچھلے ویلے دی سب توں رہتلی تے ودھیج قوم وچ جتھوں تیکر اسیں پتہ لا سکے آں، اک تینویں دی ریت انج ہی ہوئی۔کسے پاروں وی ایہہ اکلی جنسی محبت دا تت نہیں سی۔اوس نال ایس دا کوئی جوڑ نہیں سی کیوں جو ویاہ پہلے وانگوں مُک مُکا دے مڈھ تے کیتے جاندے سن۔ ایہہ ٹبر دی پہلی اوہ شکل سی جیس دا مڈھ قدرتی نہیں سگوں معاشی حالاں تے سی۔۔۔۔ یعنی مڈھلی سانجھی مالکی تے،جیس دی بڑھوتری قدرتی طور تے ہوئی سی۔ذاتی مالکی دی جت، ایہو ہی ایس دا مُڈھ سی۔ یونان والے کھل کھلا کے آکھدے سن اک تینویں دا کلا مقصد ایہہ ہے کہ ٹبر دے وچ مرد دی حکمرانی ہووے۔ انج دے نیانے جمن جیہڑے اُس نطفے توں ہوون تے جیہڑے اوس دے وارث بنن۔اہناں گلاں توں وکھ، ویاہ اک وار سی، خدا ریاست تے اپنے پیو دادے دا لایا ہویا فرض سی جیس نوں پوراکرنا سی۔ایتھنز وچ قنونی ویاہ نوں لازمی آکھ دتا سی۔ تے اینا ہی نہیں۔مرد تے گھٹو گھٹ کجھ خاوند ہوون تے فرض وی لائے گئے سن جنہاں نوں پورا کرنا ضروری سی۔ ایس لئی تاریخ وچ اک تینویں دی ریت نہ تے مرد تے زنانی دی کسے مُک مُکے دا تت سی تے نہ ویاہ دی کوئی اُچی شکل۔ ایس توں الٹ اوہ زنانیاں اُتے مرداں دے رعب داب دا وکھالا سی۔ دوہواں جنساں وچکار اک ایہو جہے پاڑ تے پھڈے دا ہوکا سی جیس دی مثال ایس توں پہلاں دے تواریخی وارے وچ کِتے نہیں ملدی۔میں تے مارکس نے رل کے 1856 وچ اک کتاب لکھی سی جیہڑی حالی تیکر نہیں چھپی (27) ۔ ایس پرانی ان چھپی پوتھی وچ مینوں اک فقرہ ملیا کہ ''محنت دی سب توں پہلی ونڈ مرداں تے زنانیاں وچ نیانہ پالن لئی ہوئی۔'' تے اج ایس وچ اک وادھا کرسکناں کہ وار ( تاریخ) وچ پہلا میل ونڈ پاڑ اک تینویں دے ویہار دے وچ مرداں تے زنانیاں دے پاڑ دے ابھرن دے نال نال اُگڑدا ہے۔ تے پہلا میل ظلم زنانیاں تے مرداں دے ظلم دے نال نال ہندا ہے۔اک بیوی دا ویہار تواریخی پکھ توں ودھا دا اک وڈا قدم سی پر ایس دے نال اوہ اک ایہو جہیا قدم سی جیس نے غلامی تے اک جی دی دولت دے نال اوہ وارا شروع کیتا جیہڑا اج تیکر قائم ہے تے جیس وچ ہر قدم جیہڑا اُٹھ دا ہے اوہ اک پاروں پچھے وی لے جاندا ہے جیس وچ اک جتھے دی خوشحالی تے ودھا دوجے جتھے تے مصیبت تے ظلم ڈھا کے حاصل کیتی جاندی ہے۔اک تینویں دی ریت رہتلی سماج دی اوہ بالکل مڈھلی صورت ہے جیس دے وچ اسیں ہنے توں اوہناں سارے پاڑاں تے پھڈیاں دی قسم نوں پڑھ سکنے آں جیہڑی رہتلی سماج وچ پوری طرحاں ودھ کے ساہمنے آؤندے ہین۔ جوڑا ٹبر یاں اک تینویں توں مگروں وی جنسی تعلق دی پرانی نسبتی آزادی دا اُکا مُکا نہیں ہویا۔''ودھا نہ کرن والے ٹبراں نوں ہن وی ویاہ دا اوہی ویہار گھیرا گھتی کھلا سی جیہڑا پونالوان جتھیاں دے ہولی ہولی مُکن دے کارن توں ہن اک نکے جہے ولیویں دے وچ سنگڑ گیا سی تے پہلے دے پچھے پچھے اوہ ویہار رہتل دے وارے تیکر جا اپڑ دا ہے۔ اخیر وچ اوہ ہیستائرازم دے نویں ویہار وچ گواچ جاندا ہے جیہڑا اج وی رہتل دے وارے وچ ٹبر دے نال لگے ہوئے اک ہنھیرے پرچھاویں وانگوں بندیائی مت(انسانیت) دا پچھا کر رہی ہے''۔ ہیستا ازم توں مارگن دا مطلب ویاہ دے ساک دے باہر مرداں تے ویاہوں بنا زنانیاں دا اوہ کام (جنسی) جوڑہے جیہڑا اک تینویں دے ویہار دے نال نال قائم رہندا ہے تے جیویں کہ ساریاں نوں جانکاری ہے وسیب دے پورے وارے وچ کئی صورتاں وچ ودھدا پھُلدا رہیا ہے تے کھلم کھلی عزت ویچن دی شکل پھڑ جاندا ہے۔ ہیستائرازم دا سدھا ساہنواں جوڑ جتھے دار ویاہ نال ہے ایس دا جوڑ قربانی دے طور تے زنانیاں دی سپرداری دی رسم نال ہے جیہڑا ایہہ مُل بھر کے اپنی پاک دامنی دا حق خرید دیاں سن۔ پیسے لے کے اپنا آپ مرداں دی جھولی پا دینا مُڈھ وچ اک مذہبی کم سی جیس نوں پیار دی دیوی دے مندر وچ کیتا جاندا سی تے پیسہ مندر دے خزانے وچ جمع کروا دتا جاندا سی۔آرمینیا وچ انالیطس دے مندر تے کورنتھ وچ ایفروڈائٹ دے مندر دی ہائر سڈیول (20) تے ہندو ستان دے مندراں دیاں دیوداسیاں،جنہاں نوں بیادیر وی آکھیا جاندا ہے (ایہہ پرتگلی بولی دے لفظ ''bailadeira'' دی وگڑی ہوئی شکل ہے جیس دا مطلب نچن والی کڑی ہُندا ہے)۔۔۔۔۔ایہہ تواریخ دیاں پہلیاں کنجریاں سن۔ قربانی دے ورتارے تے سپرداری دی ایہہ رسم ادا کرنا پہلاں ساریاں زنانیاں لئی لوڑیندا سی۔ مگروں مندراں دیاں ایہہ پجارناں ساریاں زنانیاں ولوں ایہہ ڈیوٹی نبھاون لگ پیاں۔ دوجیاں قوماں وچ ہیستائرازم جنسی تعلق دی اُس آزادی توں شروع ہویا جیہڑی کُڑیاں نوں ویاہ توں پہلاں ملی ہوئی سی۔ ایہہ وی جتھے دار ویاہ دے اثراں وچوں ہے جیہڑی ساڈے تیکر اک دوجے راہ توں ہو کے اپڑی ہے۔مالکی دا پاڑ تے فرق پیدا ہوون تے ۔۔۔۔ جیہڑا بربریت دے اخیرلے وارے وچ ہی ہو چکیا سی ۔۔۔۔ غلاماں دی محنت توں وکھ کِتے کِتے مزدوری تے وی کم ہوون لگ پیا سی۔ تے ایسے دے نال ایس دے لازمی حصے دے پکھ توں لونڈیاں باندیاں دے نال زوریں سون توں وکھ آزاد زنانیاں دے دھندے ور عزت ویچن دا کم وی شروع ہووے۔ جیویں رہتل توں جمن والی ہر شے دو مونہی تے دو پاسڑ ہندی ہے تے ایس دے وچ پاڑ تے پھڈے دیاں پدھراں گُجیاں ہوندیاں ہین۔انج ہی جتھے دار ویاہ توں رہتل نوں جیہڑا ورثہ ملیا،اُس دے وی دو ڈھنگ ہُندے ہین: اک پاسے اک تینویں ہے تے دوجے پاسے ہیتائرازم، جیس وچ بوہت عزت ویچنا وی رلتی ہے۔ دوجے ستھاں (اداریاں) وانگوں ہیستائرازم وی اک وسیبی ستھ ہے۔ایہہ پرانی کام ( جنسی) آزادی دی ہی اک شکل ہے پر ہن ایہہ آزادی صرف مرداں لئی رہ گئی ہے تے بھاویں اصلوں لوک ایہنوں جھل دے وی ہین سگوں بڑی خشی نال ایس تے عمل کردے ہین، پر بولی نال، اُچیچا راج میل دے لوک، ایس دی نندیا کردے ہین،ہیستائری ویہار دی ایس پھٹک توں مرداں نوں، جیہڑے ایس آزادی توں فیدا چکدے ہین اصل وچ کوئی گھاٹا نہیں ہُندا۔ایس دی سٹ اُکا زنانیاں تے پیندی ہے۔اوہناں نال وسیبی تعلق توڑ کے اوہناں نوں وسیب توں باہر کر دتا جاندا ہے تاں جو اک وار فیر زنانی تے مرداں دے پورے راج دا ہوکا دتا جا سکے تے ایہہ وی دسیا جا سکے کہ ایہو سماج دا مڈھلا قنون ہے۔ پر ایس نال آپ ہکڑی تینویں دے وچ اک ہور پاڑ اُگھڑ دا ہے۔ کھسم تے ہیستائرازم دے سواد لے کے اپنی حیاتی نوں رنگ دار بنا لیندا ہے پر تینویں اکلی پئی لیکھاں نوں روندی ہے تے جیویں ادھا سیب کھا لین توں مگروں ہتھ وچ پورا سیب نہیں رہوے گا، انج ایہہ وی نہیں ہو سکدا کہ پاڑ دا اک ڈھنگ ہووے تے دوجا نہ ہووے۔ پر انج لگدا ہے کہ مرداں نوں جدوں تیکر اپنیاں تینویاں توں سبق نہیں ملیا، اوہ ایہہ نہیں وچاردے سن۔ اک تینویں دے نال دو نویاں ہستیاں پکے ڈھب تے وسیب دے پردے تے اُگھڑ آؤندیاں ہین، جنہاں دا پہلاں کوئی وجود نہیں سی۔ اک تے تینویں دا یار تے دوجا قرمساق یعنی بگانے مرداں نال یارانہ لاؤن والی زنانی دا کھسم۔ مرداں نے زنانیاں نوں جت لیا سی پر جتن والے دے سر تے تاج رکھن دا کم ہرن والے نے بڑے دل گردے نال اپنے ہتھاں وچ لے لیا۔اک تینویں تے ہیستائرازم دے نال نال زناکاری وی سماج دا اک بھیڑا دستور بن گئی۔اہنوں ناجائز آکھ دتا گیا، ایس لئی ڈاڈھیاں سزاواں دتیاں گئیاں،پر ایہنوں مٹایا نہیں جا سکیا۔اپنے نیانیاں دی ولدیت بارے پیو دا پک پہلے وانگوں ہن وی بس اخلاقی پک تے بنیا سی تے ایہہ پاڑ جیہڑا کسے طرحاں حل نہیں ہُندا سی، ایس نوں حل کرن لئی ضابطہ نپولین دی دفعہ 312 وچ ہوکا( اعلان) دتا گیا: ''L,enfant concu pendant le marriage a pour pere le mari'' یعنی ــ'' ویاہی ورھی حیاتی دے وچکار جیس نیانے دا بیہہ ہووے گا،اوس دا پیو کھسم نوں سمجھیا جاوے گا''۔
