مغل حکمران شاہ جہاں دا سونے دا ذاتی خنجر لندن وچ ستاراں لکھ پاؤنڈ وچ نیلام ہویا ہے۔ نیلامی کرن والے عالمی ادارے بونہمز نے دسیا کہ خنجر گویڑ توں تن گنا ودھ مُل وچ خریدیا گیا۔شاہ جہاں دے ایس ذاتی خنجر تے اوہناں دا ناں لکھیا ہے تے ایس دی تاریخ سن سولا سو اُنتی تے تریہہ وچکار دسی جاندی ہے۔ بونہمز دی پریس ریلیز موجب خنجر دی دھار تے شاہ جہاں دا شاہی رتبہ، تاریخ تے جمن دی تھاں لکھی ہے تے ایہہ وی ظاہر کیتا گیا ہے جو ایہہ اوہناں دا ذاتی خنجر سی۔
خنجر بیلجیم دے شہری ژاک دیزینفان دے کول سی جنہاں نے اسلامی ہندوستانی تے جنوبی مشرقی ایشیا توں فن دے نمونے جمع کرن وچ پنج دہائیاں لائیاں ہین۔ دیزینفان دا تعلق برسلز دے اک امیر خاندان نال ہے جنہاں دیاں فرانس وچ ٹیکسٹائیل ملاں ہین۔
بونہمز موجب دیزنفان دا نوادرات دا خزانہ ایس ویلے منظر تے آیا جدوں شاہ ایران اُنی سو انہتر وچ اوہناں دے گھر گئے۔ مغل شہنشاہ شاہ جہاں ساری دنیا وچ تاج محل بنوان دی وجہ نال جانے جاندے ہین۔ بونہمز دے جریدے وچ مورخ ولیم ڈیلر مپل نے لکھیا ہے جو شاہ جہان نوں سوہنیاں تے نادر شیواں دا چاہ سی تے ایس دا ذکر اُس دور دے ہندوستان جاون والے کئی لوکاں نے کیتا۔
