اج تیراں مئی ہے تے پاکستان وچ صحافی تیراں مئی نوں آزادی صحافت دے دیہاڑ دے طور مناوندے ہین کیوں جو تریہہ ورہے پہلاں اج دے دیہاڑے تیراں مئی اُنی سو اٹھہتر نوں اُس ویلے دے چیف مارشل لاء ایڈمنسٹریٹر، جنرل ضیاء الحق دے خلاف صحافیاں نے سارے ملک وچ آزادی صحافت دی اک تحریک چلائی ہوئی سی۔
جنرل ضیاء نے کئی اخباربند کروا دتے سی۔ لہور دے اک صحافی نعیم الحسن دی کاہڈ موجب اُنی سواٹھہتر وچ صحافیاں دی ایس تحریک دے وچکار گھٹوگھٹ چار سو صحافی پھڑے گئے سی۔ ایسے تحریک وچ چار صحافیاں نوں اک فوجی عدالت نے دس دس کوڑے مارن دی سزا سنائی سی۔
اہناں صحافیاں وچ خاور نعیم ہاشمی ہین جنہاں نوں کوڑے وجے سی۔ ایس دیہاڑ نوں چیتے کردیاں آکھدے ہین '' اوہ میرا جدوجہد دا زمانہ سی، کجھ چر ہویا سی میں جرنلزم وچ آیا سی۔ ذوالفقارعلی بھٹو دے اخبار مساوات وچ کم کررہیا سی۔ مساوات سنے تریہہ توں ودھ اخباراں تے جریدیاںدی بندش دے خلاف جیہڑی پی ایف یو جے نے تحریک چلائی سی وچ ایس دا اک مجاہد سی۔ میں خش نصیب ہاں کہ مینوں میرے تن سنگیاں سنے کوڑیاں دی سزا دتی گئی سی'۔
جنہاں چار صحافیاں نوں کوڑیاں دی سزا سنائی گئی سی اوہناں وچ مسعود اللہ خان، ناصر زیدی، اقبال جعفری تے خاور نعیم ہاشمی رلتی سن۔ تناں نوں تے کوڑے مارے گئے پر مسعود اللہ خان نوں معذوری کارن ڈاکٹر دے آکھن تے کوڑے نہیں مارے گئے۔
خاور نعیم ہاشمی کہندے نیں ' رات اٹھ وجے مارشل لاء ایڈمنسٹریٹر ولوں سانوں کوڑیاں دی سزا ہوئی تے ویہہ منٹ توں مگروں ایس تے عمل کردتا گیا سی۔ اوہ منظر سانوں اج وی چیتے ہے جدوں سانوں جیل وچ اک نکے جہے کمرے وچوں واری واری سدیا جاندا سی تے الف ننگا کر دتا جاندا سی۔ تے تہاڈے کول ننگیاں ہوون توں وکھ ہور کوئی راہ نہیں سی۔ ایس ویلے وردی پوش اوتھے موجود سی۔ ساڈے ہتھاں پیراں نوں بنھیا گیا سی تے ساڈا تماشا ویکھیا جارہیا سی۔'
اوہناں آکھیا ' اسیں چار ساتھی اک دوجے دی بے وسی تے لہو دے گھٹ بھر رہے سی۔ ساڈے کول کوئی راہ نہیں سی۔ پر کوڑیاں دی سزا تے کوڑے جھلنا ساڈا عزم۔ سانوں جے نموشی ہوئی تے کپڑے لاون تے ہوئی سی۔ اوہ شرم دی کیفیت ساڈی شرمندگی دی کیفیت نہیں سی اوہ ساڈی جرات تے بہادری دی کیفیت سی۔'
ہاشمی کہندے نیں کہ دو بندے واری واری اک فرلانگ توں نس کے کوڑے ماردے سن۔ ' اسیں اُکے شرمندے نہیں ہوئے سی سگوں اسیں چواں نے اکھاں وچ اکھاں پا کے چپ کر کے فیصلہ کیتا سی کہ اسیں آمریت دے خلاف ننگے ہوون نوں تیار واں، کوڑے کھاون لئی تیار واں۔'
ہاشمی کہندے ہین کہ اوہناں نے کوڑے کھاون توں مگروں سٹریچر تے جاون دی بجائے پیدل ٹرن نوں ترجیح دتی سی تے جیل سپرنٹینڈنٹ نے اوہناں نوں آکھیا کہ کہ جے اسیں لوک سٹریچر تے نہیں جاواں گے تے فوجی جنتا اوہناں توں اوہناں دا عہدہ کھو لوے گی۔
اخیر وچ ہاشمی کہندے نیں کہ صحافی جتھے تریہہ ورہے پہلوں کھلوتے سی ہن وی اوتھے کھلوتے ہین تے اوہناں دیاں قربانیاں دا پھل انڈسٹری دے مالک کھا رہے ہین۔
