شیواں دیاں بولیاں لواؤن والے اک وچولے نے دسیا ہے کہ ایس ہفتے لندن وچ البرٹ آئن سٹائن دی اک چٹھی دی بولی لوائی جاوے گی جیہدے وچ اوہنے رب تے یقین نوں اک بالاں والا بھلیکھا دسیا ہے تے لکھیا ہے کہ یہودی رب دے چونویں بندے نہیں سن۔
آئن سٹائن نظریہ ضرورت دا جد امجد منیا جاندا ہے۔ ایس توں پہلاں اوہدے مذہبی وچاراں بارے جانکاری رولے رپے وچ سی تے ایس تے بڑی بحث ہندی رہی ہے۔ اوہنے ایہہ گل 1954 وچ اک فلاسفر دی گل دے جواب وچ آکھی سی۔
آئن سٹائن آپ وی یہودی ہے تے اوہدا آکھنا ہے کہ اوہنوں یہودی لوکاں نال پیار ہے پر اوہدا ایہہ وی آکھنا ہے کہ اوہنوں یہودیاں وچ جگ دے باقی لوکاں توں ودھ کوئی اچیچی گل نظر نہیں آؤندی۔ اوہدا آکھنا ہے کہ ''میرے لئی 'رب' دا لفظ اک وکھالے دے وسیلے تے بندے دی کمزوری توں اڈ کجھ وی نہیں ہے۔ بائیبل اک آدر جوگ کتاب ہے پر ایہدے وچ بوہت ساریاں گلاں بالاں والیاں ہین۔''
ایس چٹھی وچ آئن سٹائن لکھدا ہے کہ ''میرے لئی یہودی مذہب بالاں دی بھلیکھے والی حیاتی ورگا ای ہے۔ تے یہودی لوک جیہناں نال میرا سانگا اے اوہناں وچ جگ دے دوجے لوکاں توں چنگی کوئی وی گل نہیں ہے۔''
ایس توں پہلوں آئن سٹائن دی ایس گل تے وی بڑی بحث ہوئی سی جیہدے وچ اوہنے آکھیا سی کہ '' سائنس مذہب توں بنا لنگڑی ہے تے مذہب سائنس توں بنا انھا ہے''۔
