دکھنی ایشیا دی تاریخ وچ حاکم میل دے اک ناں اک دھڑے نے ہمیشہ ہی آپنے مفاد لئی حملہ آوراں اتے دھاڑویاں نوں حملے لئی سدیا اتے اوہناں توں لوکاں دی لٹ کھسٹ کروائی ہے اتے اس لٹ کھسٹ وچ اوہ سانجھیوال بنے ہن۔
کیہا جاندا ہے کہ سکندر نوں ہندوستان تے حملہ کرواؤن لئی راجا انبھی نے ہی سدیا سی اتے انبھی اتے ہورناں راجیاں نے سکندر توں لوکاں دی قتل و غارت اتے لٹ مار کرواؤن وچ اس دا ساتھ دتا۔ کیہا جاندا ہے کہ اس غداری کرکے پنجاب وچ اج تائیں لوک کسے بچے دا ناں انبھی نہیں رکھدے۔ ایہہ وی دسیا جاندا ہے کہ بابر نوں وی دولت خان لودھی نے ہی لہور تے حملہ کرن لئی سدیا سی۔ بابر نے جیہڑی قتل وغارت کیتی اوس دا بیان بابا نانک بابر بانی وچ بہت ہی وستار نال کردا ہے:
جن سر سوہن پٹیا مانگی پائے سندھور سے سر کاتی مؤنین گل وچ آوے دھوڑ
نادر شاہ نوں وی نظام الملک نے ہی سدا دے کے ہندوستان تے حملہ کروایا سی۔ اوس وقت شاعر نجابت لکھدا ہے۔۔۔۔
دتا قول تورانیاں، وساہ کیتو نے۔ کوڑ خلاف الاف کے، بادشاہ چڑھیو نے۔ ہُنڈر دغے فریب دا، چا جال سٹیو نے۔ دھیاں تے بھیناں بیٹیاں، نہ شرم کیتے نے۔
ایسے طرحاں ایسٹ انڈیا کمپنی وی آپنے پیر حاکم میل دے دھڑیاں نال گنڈھ تپ کرکے ہی ہندوستان تے راج کرن دے قابل بنی سی۔ پلاسی دی جنگ وچ میر جعفر دی غداری کارن ہی کمپنی نوں فتح حاصل ہوئی سی۔وارث شاہ ہوراں انگریز نال سانجھیوالتا بارے لکھیا سی۔۔۔
وارث شاہ فرنگی دے گھر وڑ کے اوس قلعے دے کھوہ نوں گیڑیا سی۔
رنجیت سنگھ دی موت دے بعد پہاڑا سنگھ اتے کجھ ہورناں سرداراں نے آپنے مفاد لئی پنجاب نوں انگریز دا غلام بنا دتا۔ شاہ محمد لکھدا ہے۔۔۔۔
اوتھوں ہو گیا ہرن ہے خالصہ جی، چوداں ہتھ دی مار کے مرگ چھالی شاہ محمدا، سانبھ لے سلھیخانے، چھڈ گئے نے سنگھ میدان خالیٰ
١٨٥٧ دی پہلی جنگ آزادی دے ویلے وی مہاراجہ پٹیالہ ، مہاراجہ سندھیا اتے کجھ ہورناں راجیاں دی غداری دی وجہ کرکے ہی اس غدر نوں انگریز کچلن وچ کامیاب ہوئے سی۔ اس غداری لئی ایہناں حاکم میل دے آگواں نوں انگریز نے جاگیراں اتے انعام دتے۔ جواہر لال نہرو دا دادا وی ایہناں انگریزاں دے سانجھوالاں وچوں ہی سی۔
ایہہ کوئی حیرانی والی گل نہیں کہ انگریز نوں جدوں مجبور ہوکے ہندوستان چھڈنا پیا تاں اوہ راج بھاگ حاکم میل دے اوس دھڑے نوں سونپ گیا جس نے پلاسی توں لے کے ٤٧ تائیں ہندوستان دی لٹ وچ اوہناں دا ساتھ دتا سی۔
من موہن سنگھ، مشرف، زرداری وغیرہ وی حاکم میل دے اوس دھڑے دی پیروی کردے ہن جو کہ مقامی اتے پردیسی کمپنیاں ولوں دکھنی ایشیا دے قدرتی وسیلیاں اتے لوکاں دی محنت دی لٹ کھسٹ کرا کے آپنے منافعے ودھا رہیا ہے۔ پرانے انبھی اتے میر جعفر وانگ ایہہ وی لوکاں دی دھرتی اتے محنت دی بولی لا رہے ہن۔ اک ایسٹ انڈیا کمپنی دی تھاں تے کئی ایسٹ انڈیا کمپنیاں لٹ مار کر رہیاں ہن۔ غداری تے تجارت دا ورق پایا گیا ہے۔لٹ مار دے سدے نوں لبرلائیزیشن، انویسٹمیٹ اتے ہورناں انگریزی لفظاں نال لکایا جا رہیا ہے۔پر اصلیت اک کھڑپے سپ وانگ سبھ دے ساہمنے کھڑی ہے جیہڑی ایہو جہیاں برقعیاں نال چھپ نہیں سکدی۔ تجارت دے ورق نال لوکاں نال غداری لک نہیں سکدی۔
