Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> کہندا بلھے شاہ >> کافی بلھے شاہ

کافی بلھے شاہ

July 27th, 2007
5 / 5 (1 Votes)

عشق دی نویوں نویں بہار
جاں میں سبق عشق دا پڑھیا
مسجد کولوں جیوڑا ڈریا
ڈیرے جا ٹھاکر دے وڑیا
جتھے وجدے ناد ہزار
عشق دی نویوں نویں بہار
جاں میں رمز عشق دی پائی
مینا طوطا مار گوائی
اندر باہر ہوئی صفائی
جت ول ویکھاں یار و یار
عشق دی نویوں نویں بہار
ہیر رانجھے دے ہو گئے میلے
بھُلی ہیر ڈھوڈیندی بیلے
رانجھا یار بکل وچ کھیلے
مینوں سدھ رہی نہ سار
عشق دی نویوں نویں بہار
بید قرآناں پڑھ پڑھ تھکے
سجدے کر دیاں گھس گئے متھے
نہ رب تیرتھ نہ رب مکے
جس پایا تس نور انوار
عشق دی نویوں نویں بہار
پھوک مصلیٰ بھن سٹ لوٹا
نہ پھڑ تسبیح عاصا سوٹا
عاشق کہندے دے دے ہوکا
ترک حلالوں کھا مردار
عشق دی نویوں نویں بہار
عمر گوائی وچ مسیتی
اندر بھریا نال پلیتی
کدے نماز توحید نہ نیتی
ہن کیہ کرنائیں شور پُکار
عشق دی نویوں نویں بہار
عشق بھلایا سجدہ تیرا
ہن کیوں اینویں پاویں جھیڑا
بلھا ہوندا چپ بتیرا
عشق کریندا مارو مار
عشق دی نویوں نویں بہار

مشکل لفظاں دے معنے

ٹھاکر۔رب، مندر وچ رکھے بت نوں وی ٹھاکر کہندے ہین
مینا۔ بولن والی طوطی
بیلے۔ جنگل
بید۔وید، چار وید، رگ وید، سام وید، اتھر وید تے یجر وید
تیرتھ۔ پاک تھاواں تے نہاونا، ہندومت وچ عقیدہ ہے جو کئی تیرتھ ہین، بوہتے مشہور، بنارس، ہردوار، رامیشورم، ترپتی وغیرہ
انوار۔ چانن
مصلیٰ۔ دری جیس تے نماز پڑھی جاندی ہے
عاصا۔ مولانا لوکاں دے ہتھ وچ پھڑی کھونڈی
ترک۔ چھڈ دینا، کسے شے توں توبہ کر لینا
توحید۔ اکائی، عام طور تے رب دے اک ہوون لئی ورتیا جاندا ہے

بیان

عشق دی بہار نویں توں نویں ہے، یعنی ہر پل نویں ہو رہی ہے، ایہہ کدی بہی نہیں ہوندی۔ جے بہارسُکیاں رُکھ بوٹیاں دا ہرا ہونا ہے، ڈال تے پھل کھڑنا ہے تے پھیر عشق دی بہار سُکیاں ساہواں وچ نویں جان پینی ہے، روگ دا مُکنا تے نرویا ہونا ہے جیویں جو ہر پل نویں پتر نِسردے تے نویں پُھل کِھڑدے ہوون۔

ایس ہر پل دی بہار دی کہانی وچ اک ان کہی ایہہ وی ہے جو ہر پل، ہر ساہ نوں سوکے دا تے خزاں دا ڈر ہے، تے جے ایس توں بچا عشق کرواندا ہے جِیہڑا کسے پل نوں سُکن نہیں دیندا۔ عشق ہر پل نواں جیون ہے تے عشق توں وانجے جانا سُک جانا ہے۔ پر عشق جمیا کیویں، پہلی منزل تے کیویں پجیا؟

عشق دا پہلا سبق پڑھدیاں ہی مسیت توں جی ڈر گیا تے اوس ڈیرے جا وڑیا جتھے ہزاراں ناد وجدے سن۔ مسیت ملانے دی سوڑی سوچ دی ولگن سی، اوتھے اک سوکے پئی اکہری سوچ دا رِچھ جپھا سی، ایس لئی اوس دا ڈر، اوس توں بھج جانا، عشق ول جاون لئی پہلا قدم سی، تے دُوجا قدم اوتھے جا وڑنا سی جیہڑا ویکھن نوں تے بت خانہ ہے پر اوتھے جتھے ہزاراں ناد وج رہے ہین، جتھے رنگ رنگ دے پُھل کھڑے اپنی اپنی بہار وکھا رہے سن۔ پر مسلمان بلھے شاہ لئی مسیت نوں چھڈ کے ٹھا کر دے ناداں والے دوارے وڑن دا مطلب دتی ریت نوں ترک کرکے سب توں بہتی مناہی تھاں وچ جا وڑنا ہے، ایہہ حلال نوں چھڈ کے حرام کھانا ہے اپنے آپ نوں پُورا ڈھاہ کے نواں اسارنا ہے، تے ایہو عشق دا مُڈھ ہے۔

جاں عشق دا پہلا پرانے وجود دی نفی کر کے سبق پڑھیا گیا تے عشق دی رمز دی وی سار لگ گئی، تے ایسے سار نال اندر جیہڑی طوطے مینا دی دُوج سی اوہ مُکی۔ طوطا مینا اوہو بولدے سن جو سائیاں پڑھایا سکھایا سی، اپنے وچار اپنی ہوند دی اوہناں وچ کوئی سُرت سار نہیں سی۔ سائیاں دے پڑھائے سکھائے جیون ڈھنگ نے ہی بندے دے اندر مینا طوطا جمایا سی تے اوہناں دی دُوج پیدا کیتی سی۔ جدوں عشق دی رمز نتری تے ایہہ کسے ہور دی بولی بولن والے طوطا مینا اپنی دُوج سمیت مر گئے۔ ایسے نال ہی اندر باہر دی اِکو ویلے صفائی ہوگئی، اصل وچ اندر باہر دی دُوج ہی طوطا مینا وی سی تے ناپاکی دی جڑ وی، جد ایہہ جڑ ہی پُٹی گئی تے صفائی ہو گئی۔ تے ہُن ایس صفائی وچ صرف یار ہی دسدا ہے، اک حقیقت دا لشکارا دسدا ہے، ہن اوس حقیقت نال وتھ مک گئی۔

ہیر رانجھے دے میل دا وی تت ایہو ہے۔ ہیر دے اندر وی جد تائیں سائیاں پڑھائی سکھائی طوطا مینا بولدے سن اوہ باہر بیلیاں وچ رانجھے نوں ٹولدی پھردی۔ جد اوس دے اند طوطا مینا مرے تے پتہ لگا جو رانجھا یار تے ہر دم اوس دی بُکل وچ کھیڈاں کردا سی۔ سچل سرمست ہوریں کہندے ہین
رانجھو کھیڑا دوہیں میں ہاں
ہیر گئی ونج کتھے کتھے
تے جد رانجھے یار نوں بُکل وِچوں لبھ لیا تے پھیر اوہ ہوش گواچ گئی جیہڑی دُوج تے اُسری ہوئی سی۔

دُوجے پاسے اوہ لوک ہین جیہڑے قرآن تے وید پڑھ پڑھ تھک گئے ہین، اوہناں دے متھے سجدیاں نال گھس گئے ہین پر اوہ پھیر وی رب نوں، مڈھلی حقیقت نوں پا نہیں سکدے کیوں جو رب نہ تے مکے وچ رہندا ہے تے نہ ہی تِیرتھاں تے جتھے ہندو جاکے اشنان کردے ہین تے سمجھدے ہین بھگوان نوں مل لیا۔ رب تے کِتے وی نہیں وسدا اوہ تے اندر ہے، رانجھا بن بن بکل وچ کھیڈا دا ہے تے ایس لئی اوسدا چانن اندروں ہی عشق راہیں ملدا ہے

قرآن تے وید پڑھن والیاں دا اپنے مڈھلے روگ توں بچن دی اک ہی راہ ہے جو اوہ مصلے نوں اگ لا دین تے وضوواں والے لوٹے توڑ دین، ہتھوں تسبیح تے کھونڈیاں چھڈ دین۔ جے اوہ عاشقاں دا کہا منن تے اوہ جیس نوں حلال سمجھدے ہیں اوس توں توبہ کر لین تے جو حرام سمجھدے ہین اوہ کھاون۔ کیوں جو اوہناں دی مت الٹی ہوئی ہے، اصل وچ جیس نوں حرام سمجھدے ہین اوہ ہی حلال ہے۔ ایس لئی اہناں نوں پٹھا گیڑ گیڑنا پوسی تاں اوہناں دی صفائی ہونی ہے۔

اجے تیکر اوہ مسیتی وچ بہ بہ کے عمر گواندے نیں پر اوہناں دے اندروں پلیتی نہیں جاندی تے اوہ کدی توحید دی نماز نہیں پڑھ سکدے، اوہ کدی حقیقت نوں اک نہیں من سکے۔ عمل وچ اوہناں لئی حلوے مانڈے، دولت تے طاقت وغیرہ ہی اصل رب نیں۔ ایہو اوہ طاقتاں نیں جیہڑیاں اوہناں نوں چلاوندیاں ہین تے اوہ اصل وچ اہناں نوں ہی سجدے کر دے ہین۔ مسیتے بہ کے قرآن پڑھنا، متھے گھساونا، تسبیحاں پھیرنا تے ریت پوری کرنا ہے، اک روز دی عادت ہے جیس پاروں ایہہ سب کجھ ہوئی جا رہیا ہے۔ اصل وچ اند لوبھ تے لالچ ہین جیہڑے اصلی رب بنے بیٹھے ہین، تے مینا طوطا بن بن بولدے ہین۔

جد عشق نے ڈیرہ کر لتا، جد پٹھا گیڑ گیڑن لئی تیار ہو گئے تے پھیر سچ آپ ہی پھٹدا ہے اندروں۔ پھیر بلھا چپ وی کرنا چاہوے تے عشق چپ نہیں ہون دیندا۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels