Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> نانک بانی >> کلام نانک پہلا بول

کلام نانک پہلا بول

May 26th, 2007
5 / 5 (1 Votes)

اک اونکار سَتِ نام، کرتا پرکھ، نِر بھو، نِرویر
اکال، مورتِ اجونی، سے بھنگ، گر پرساد

مشکل لفظاں دے معنے

اک اونکار۔ اوہ اک ہے، اوس دا کوئی شریک نہیں
ست نام۔ ست دا مطلب ہے سچ، تت، ست نام ہویا اوہ سچ دا ناں ہے، یا اوہدا ناں سچ ہے
کرتا پرکھ۔ کرن ہار، جیہڑا کردا ہے ، یا جیہڑا شیواں وچ حرکت لیاوندا ہے
نر بھو۔ نر دا مطلب نہیں ، تے بھو دا مطلب ڈر۔ جیس نوں ڈر نہیں
نر ویر۔ ویر دا مطلب دشمنی۔ نر ویر، جیس دی کوئی دشمنی نہیں
اکال۔ جیہڑا ویلے توں آزاد ہے، مدام ہے، سدا توں ہے تے ہووے گا
مورت اجونی۔ اس دی کوئی شکل نہیں، تے اوہنوں کسے نے جمیا نہیں
سے بھنگ۔ اپنے آپ وچ چانن ہے ، ایس دا ایہہ مطلب وی ہو سکدا ہے جو اوسدیاں کئی صورتاں ہین۔
گر پرساد۔ اوہدا حاصل گرو دی نعمت ہے، یا گرو اوس دا حا صل ہی نعمت ہے

مطلب
ایس مڈھلے بول وچ گرونانک جی ایس جہان دے مڈھ تے اوس دی حقیقت بارے گل شروع کر رہے ہین۔ سدھا سدھا مطلب تے ایہہ ہے جو اوہ واحد لا شریک ہے، اوہ سچ دا مڈھلا ناں ہے، اوہو کرن ہارا ہے، اوس نوں کسے دا ڈر خوف نہیں تے اوس داکسے نال ویر نہیں۔ اوہ مدام یاں ویلے دی قید توں باہر ہے، اوس دی کوئی صورت نہیں یاں صورت دا قیدی نہیں تے کسے نے اوس نوں جمیا نہیں، اوہ اپنے آپ وچ چانن ہے یا اوس دے سے رنگ ہین ، تے اوس دا حاصل اک نعمت ہے۔

کھلارواں مطلب

ایس پہلے بول وچ جہان دی مڈھلی حقیقت دا پتہ دسیا جا رہیا۔ ایہہ مڈھلی حقیقت اک ہے تے اوہ ہی سچ دا تت ہے۔ ایس لئی جو کجھ ہوندا ورتدا اوسدا کرن ہارا اوہو ہی ہے، یاں ایس نوں انج وی سمجھ سکنے ہاں جو جو کجھ ہوندا ہے اوس دے پچھے اک ہی جہانی اصول ہے۔

ایہہ اصول اجیہا ہے جو کسے نال نہ ڈر دا ساک (رشتہ) رکھاوندا ہے نہ نہ ڈر دا۔ ڈر تے ویر توں پاک ہوون دا مطلب ہے جو اوس دی کسے کرنی وچ وی کسے توں ڈرنا ، ڈراونا یا ویر نہیں ہوندا۔ ایہہ نہیں جو دنیا دے کسے ہونی ورتی توں اوہ ڈردا یا ڈراوندا ہے یا کسے دی کرنی یا عمل نال اوس نال ویر بنا لیندا ہے۔ اوہ اہناں گلاں توں پاک ہے۔

جے اوہ اہناں سب گلاں توں پاک ہے تے پھیر ملاں یا پنڈتاواں دا ایہہ دعوی جھوٹ ہے جو جے بندہ فلانا کم کرے گا تے اوہ ویر وچ آجاوے گا تے اوس نوں مناون لئی ملاں پنڈتاں نوں نذر نیازاں دینیاں پین گیاں۔ملاں پنڈت اوس دے ویر دا خوف دواؤندے ہین، پر جے اوہ 'نربھو'' ہے تے ایس دا مطلب ہے جو اوس کولوں خوف رکھنا ہی غلط ہے کہ اوہ خوف توں پاک ہے۔ سو ایس دا مطلب ہویا کہ ملانیاں پنڈتاں تے باقی مذہبی پیشہ وراں دی ایہہ ساری دلیل ہی غلط ہے کہ اوہ ویری ہو سکدا ہے تے اوس توں خوف کھانا چاہیدا ہے تے اوس نوں راضی کرن لئی چڑھاوے چڑھانے چاہی دے نیں۔

اوہ ویلے دی قید توں آزاد ہے، کیوں جے اوہ ویلے دے بندھن وچ ہووے تے پھیر اوس دیاں حالتاں بدل سکدیاں ہین۔ مطلب جے اوہ اک ویلے وچ پیار کرے گا تے دوجے ویلے وچ ویر، اک ویلے وچ ڈرے گا تے دوجے ویلے وچ ڈراوے گا۔ اک ویلے اوہ اک طرحاں دیاں کرنیاں کرے گا تے دوجے ویلے دوجیاں ۔ پر جے اوہ ویلے دی قید توں آزاد ہے تے تاں ہی اوس دیاں باقی سب وقتی خصلتاں (غصہ ، ڈر، ویر) توں اتے ہے۔

اوس دی کوئی مورت یا صورت نہیں تے اوس نوں کسے نے جمیا نہیں۔ ایس دا مطلب وی ایہہ ہویا دیوتاواں دیاں گھڑیاں مورتیاں دا اوس نال کوئی سنبندھ نہیں یا ملانیاں دے اوس دے کھچے نقشے سب کوڑ ہین۔

اوہ چانن ہے تے ایس چانن دا حاصل ہونا اک نعمت ہے۔ مطلب ملاں پنڈتاواں دے دسے فارمولے تے نسخیاں نال ایس مڈھلے اصول یا مڈھلی سچائی تائیں اپڑیا نہیں جا سکدا۔ گر پرساد دا عام مطلب تے ایہہ کڈھیا جاندا ہے جو جو ایہہ گرو یا ہادی دی دین نال مل سکدا ہے۔ پر جے ایس بول دے پہلے لفظاں تے گوہ کرو تے ایہہ تشریح پھوکی جیہی لگدی ہے۔ ایس لئی ایس دا مطلب ایہہ ہو سکدا ہے جو آپ گرو پرساد ہے یعنی آپ ہدایت دی نعمت ہے۔


Share |


 

Depacco.com


 

 

Visitors Comments

Name:Iqbal Qaisar
Date:15th May

Comment: on this page you have made wrong translation of some words
like
1- SAY BHANG: which means ohno maut nahi ya ohday wajood nu zaval nahi.
2- GUR PARSAD: oh tamam guruan to vad gura hai.

please make the corrections and dont publish any thing like this without making sure that it is ready for being published.
thanks

Iqbal Qaisar
Punjabi Khoj Garh
Lalyani, Kasur
0092-300-9432852


Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels