Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> نانک بانی >> نانک بانی جپ جی

نانک بانی جپ جی

June 4th, 2007

اسیں بابا نانک ہوراں دی وچاردھارا دی مڈھلی لکھت شروع کر رہے ہاں۔ اسیں مشکل لفظاں دے معنے تے کجھ تشریح دیاں گے۔ تسیں وی اپنے وچار ساڈے نال سانجھے کر سکدے ہو۔ ایہہ لمی لکھت ہے تے پتہ نہیں کنی کر سکئیے۔ باقی بھل چک معاف کر چھڈیو۔

جپ

آد سچ، جگاد سچ ہے بھی سچ
نانک ہوسی بھی سچ

مشکل لفظاں دے معنے
جپ۔ ورد، دھیان
آد۔ ابد
جگاد۔جگ دا مطلب ہے زمانہ، کہیا جاندا ہے جو ویلے دے ست جگ ہین۔ پر جگاد= جگ آد دا مطلب ہے سارے جگ، جیس نوں ازل تائیں وی آکھ سکنے ہاں۔

مطلب

انج تے ایس بول دا سدھا سادھا سدھا مطلب ہے جو سدا سچ دا ہی وارا رہیا ہے تے آون والے ویلیاں وچ وی سچ ہی ہووے گا۔

سوال ایہہ ہے جو سچ ہے کیہ جیہڑا سدا ورت ہے؟ جے دنیا وچ بندیاں دی تاریخ ویکھئے تے ایتھے بڑے بڑے ظالم زمانے وی رہے ہین۔ بابے نانک ہوراں نوں تاریخ دے موڑاں دی بڑی سار سی۔ سگوں اوہناں تے تاریخ نوں جیویں ریکارڈ کیتا اونویں شاید ہی کسے صوفی یا بھگت نے کیتا ہووے۔ جیویں بابر دی مار دھاڑ نوں بابے نانک ہوراں بابر بانی وچ الیکیا اوہ کتے ہور نہیں لبھدی۔ ایس لئی ایہہ گل تے صاف ہے بابے نانک ہوراں دا سچ توں مطلب ایہہ نہیں ہے جو کجھ ظاہرا تاریخ وچ ہوندا رہیا یا ہووے گا اوہ سچ دا وکھالا سی۔

ایتھے اوہناں دا سچ توں مطلب رب یاں پرماتما دا اوہ تصور وی نہیں ہو سکدا جو اوس ویلے ہندو دھرم دے پنڈت یا مسلمان ملاں قاضی کردے سن۔ اوہ اہناں دوہاں مذہباں دی ریت پوجا توں اک کے ہی نویں راہ لبھن ٹرے سن۔ اوہناں دوہاں مذہباں دیاں ملاں پنڈتاں دیاں گھسیاں ریتاں نوں چیلنج کیتا۔ ایس لئی جے سانوں اپنی پڑھت وچ ریت پوجا دا ملاں یاں پنڈت سنیوے تے سمجھو اسیں بابے نانک ہوراں نوں پڑھ ہی نہیں رہے۔اج کل سکھ بھائیاں دیاں تشریحاں سنو تے لگدا ہے جیویں کسے مولوی یاں پنڈت نے بابا نانک تے مل مار لئی ہووے۔

جے اُتلی دسی گئی گل نوں من لیا جاوے (جیس نوں اسیں من کے چل رہے ہاں) تے پھیر ایتھے 'سچ' دا مطلب ہے شیواں دی، زمانے دی، ویلے دی حقیقت دا مڈھلا سچ۔ اوہ سچ جیہڑا سدا ورت رہیا ہے تے رہوے گا۔ مثلاً جے کوئی کہوے جو رب ایس گل توں ساڈا ویری ہو جاوے گا تے ایہہ گل سچ نہیں ہووے گی کیوں جو اوہ ویر توں پاک ہے۔

پر جے اسیں اجیہا کم کرئیے جیس نال سدا تباہی آوندی ہے تے اوہ مڈھلا سچ ہووے گا۔ مثال دے طور بابا نانک ہوریں کہندے ہین جو جدوں بابر ہندوستان تے حملہ کیتا تے کسے پنڈت دے منتر جادو نے اوس دا کجھ نہ وگاڑیا۔ مطلب جے اسیں من لیئے جے کجھ منتر یاں دعاواں تاریخ دا راہ روک سکدیاں ہین تے ساڈی تباہی لازم ہے۔ سو سدا ورت سچ ایہہ ہویا جو منتراں نال دھاڑویاں نوں روکدیاں مدھے جانا یاں تباہ ہو جانا۔

ایس لئی بابا نانک ہوریں 'سچ' نوں سدا سچ ثابت ہوون والے اصولاں دے معنے وچ لے رہے ہین۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels