Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> نانک بانی >> جپ جی پوڑی ٣

جپ جی پوڑی ٣

July 4th, 2007

گاوی کو تان ہووے کسے تان
گاوے کو دات جانے نی سان
گاوے کو گن ودیائی آچار
گاوے کو ودیا وکھم وچار
گاوی کو ساج کرے تن کھیہ
گاوے کو جیہ لے پھر دیہ
کتھنا کتھی نہ آوے توٹ
کتھ کتھ کھتی کوٹی کوٹ کوٹ
دید دے لیدے تھک پاہ
جگا جگنترکھا ہی کھا
حکمی حکم چلاوے راہ
نانک وِگسے وی پروا

مشکل لفظاں دے معنے

تان۔ طاقت، وس
دات۔ دیونا، ونڈنا، نعمت
نی سان۔ نشان، پچھان
گن۔ خوبیاں
آچار کرنیاں، فعل
ودیا۔ عقل، علم
وکھم ۔ اوکھا
وی چار۔ وچار، سوچ وچار
ساج۔ ساجنا توں، بناونا
کھیہہ۔ مٹی
جیہ۔ جیون
جاپے۔ لگے
حاورا۔ حاضرحدور
کھتنا۔ کہانی، بیان
کتھی۔ بیاں کیتی گئی
توٹ۔ گھاٹ، کمی
کتھ کتھ کتھی۔ کئی طرحاں بیان ہوئی
کوٹی۔ لکھوکھہا
کوٹ۔ بے شمار واری
لیدے۔ لیندے
تھک پاہ۔ تھک جاندے
جگا ۔جُگاں توں، زمانیاں توں
وگسے۔انچنت

سدھا مطلب
کوئی طاقت تے وس دے جس گاوندا ہے جو اوس نوں طاقت وس ملے
کوئی نعمتاں دیون دے گیت گاوندا ہے جو اوس دا نشان بنے، اوہ پچھانیا جاوے، مشہور ہووے
کوئی اوس دی سرجنا تے کوئی تباہی دے گاون گاوندا ہے
کوئی جیون دین تے کوئی لین دا گاوندا ہے
کوئی ایس لئی گاوندا ہے اوہ اوس توں دوری محسوس کردا ہے
کوئی اوس نوں اپنیاں حداں وچ حاضر جان کے گاوندا ہے
اہناں بیاناں تے حکائیتاں دی کوئی گھاٹ نہیں ہے
ایہہ حکائیتاں تے بیاں انموہنے لوک انمونہی طرحاں کردے ہین
کوئی دئی جاندا ہے تے کوئی لیندے تھک جاندے نیں
جگاں توں کھادا جاندا رہیا ہے
[پر]متھن والا اپنے متھے ہوئے اصول نال راہ تے چلاوندا ہے
نانک اوہ [سب حکائتاں تے بیاناں] توں نچنت تے بے پرواہ ہے۔

کھلارواں مطلب

ایس پوری وچ گل پھیر حکمی تے حکم دی ہو رہی ہے۔بابا نانک ہوریں پہلیاں چار مصرعیاں وچ اوہ وکھالے دس رہے ہین جیہڑے حکم دی مانتا دا دم بھردے ہین۔ اہناں چاراں مصرعیاں وچ پھیر اوہ سماج دے وکھ وکھ پرتاں دا ذکر کردے ہین جو اوہ کیویں ایس گل نوں سمجھ رہے ہین تے اوس دی مانتا کردے ہین۔

حاکم میل نوں طاقت یا وس دا لوبھ ہے اوہ اوس دے وس دے گن گاندے ہین۔ اوہ اصل وچ وس اپنے ہتھ لین لئی اوس دے جس گاوندے ہین۔ ایسے طرحاں کجھ لوک ہین جیہڑے اوس دے دیالو ہوون دی چرچا کردے ہین، اوہ ایہ اپنا نام اچا کرن کرن لئی تے اپنی پچھان لئی اجیہے کم کردے ہین۔

کجھ لوک اوس دے گناں دے گیت گاوندے ہین تے ایس وچ ہی اپنی وڈیائی لوڑدے ہین۔ ایہ پرچارک میل دے لوک ہین۔ ایسے طرحاں سوجھوان اوس دے علم تے عقل دے چرچے کرکے اوکھے اوکھے فلسفے گھڑدے ہین۔ اہناں سوجھواناں دا وی اپنا ہی لوبھ ہوندا ہے۔

پھیر عام سدھارن لوک ہین جیہڑے اوس دی سرجنا تے اوس دے برباد کرن کرن دے لوبھ تے ڈر وچ اوس دا جس کردے ہین۔ اوہ جیون تے پیدا ہوون تے مک جاون راہیں اوس نوں محسوسدے ہین۔

ایہ اپر دتیاں رنگا رنگ حکائیتاں تے کہانیاں دی کوئی گھاٹ نہیں ، ایہ ہر تھاں تے ہو رہیاں ہین تے انمونہے لوک ان گنت واری ایہ سارا کجھ کردے ہین۔

پر اوسدی دین جاری ہے تے ج'گاں توں دنیا کھاندی چلی آ رہی ہے۔ ایہدا ایہ مطلب نہیں جو ہر کوئی کھا رہیا ہے ، ایس دا صرف اینا مطلب ہے جو جگ جگ توں ایہ حیاتی پل رہی ہے جیس وچ ایہ سارا کجھ ہو رہیا ہے۔

پر اصل گل ایہ ہے جو اوس دے تان، دات تے ہور گناں دے گاون دا اوس تے کوئی فرق نہیں پیندا۔ اوسدا اک متھیا ہویا ہویا راہ ہے جیس اتے حیتی چل رہی ہے، اوہ جس گاون والیاں توں بے پرواہ تے نچنت ہے۔ نہ اوہ اوہناں دے گاوناں توں پربھاوت ہوندا ہے تے نہ ہی ویر سہیڑدا ہے۔ اوہ اک متھی ہوئی قدرت تے تاریخ دی راہ ہے جیس اتے کسے دیاں عبادتاں، یا قربانیاں دا کوئی اثر نہیں۔

بلھے شاہ ہورہیں وی ایسے ریت دے کھریاں تے ٹردے جد زمانے تے ویلے دی گل کردے کہندے ہین
بلھیا حکم حضوروں آیا
اس نوں کون ہٹائے

بابا نانک ہورہیں اہناں پوڑیاں وچ حکمی تے حکم راہیں پیشہ ور مذہبیاں تے اپنی اپنی غرض لئی اوس ہستی نوں منن والیاں دا رد کر رہے ہین۔ اوہ ایہ دسنا لوڑدے ہین جو اوس دی راہ متھی ہوئی ہے، اوس متھی ہوئی راہ وچ جیہڑا آوے گا اوہ دلیا جاوے گا۔ اوس متھی ہوئی راہ نوں منتراں، عبادتاں، نیازاں دین نال تے ایس طرحاں دے ہور ٹسن کرن نال نہ بدلیا جا سکدا ہے نہ اوس تے کوئی اثر پایا جا سکدا ہے ۔ کیوں جو اوہ ''اوہ بے پرواہ ہے تے اہناں سب گلاں دا اوس نال کوئی سانگا نہیں''




Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels