Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> آکھیا وارث شاہ نے >> ہیر وارث شاہ بند ۸۶

ہیر وارث شاہ بند ۸۶

ڈاکٹر منظور اعجاز
November 29th, 2008

ہیر وارث شاہ بند ۸۶

ہیر آکھیا رانجھنا بُرا کیتو تیں تاں پچھنا سی دہرائیکے تے
میں تاں جاندا نہیں ساں ایہو سُونہا خیر منگیا سو میتھوں آئیکے تے
خیر لیندو ہی پچھاں نوں تُرت بھنا اُٹھ وگیا کنڈ ولائیکے تے
نیڑے جاندا ہئی جا ہل نڈھیے نی جا پُچھ لے گل سمجھائیکے تے
وارث شاہ میاں اس تھیں گل پچھیں دو تن اڈیاں ہِک تے لائیکے
 
اوکھے لفظاں دے معنے
سُونہا: خبردار، جانن والا
بھنا: نس گیا
کنڈ ولاونا:پچھانے جاون دے ڈر توں مونہہ پھیر لینا

سدھا مطلب

ہیر نوں پچھتاوا لگا ہویا اے تے  اوہ رانجھے نوں کیہندی اے جو توںکیدو نوں چوری دیون توں پہلاں کئی واری  چنگی طرحاں  پچھنا سی۔ رانجھے کہندا ہے جو مینوں کیہہ پتہ سی جو ایہہ کوئی مخبر ہے تے ساڈی سوہ لین آیا ہے۔ میں تے لوڑ وند جان کے خیرات دے دتی۔تے جد میں اوس نوں خیرات دے دتی اوہ چھیتی نال کنڈ ولا کےبہج  گیا۔ اجے دور نہیں گیا لاگے ہی ہووے گا تے توں جاکے چنگی طرحاں اوس کولوں گل پچھ ۔ سگوں اوہندی ہک تے دو تن اڈیاں مار کے گل پچھیں۔

کھلارواں مطلب

ایہہ بند کافی سدھا پدھرا ہے پر ایس وچ دو گلاں نکھڑدیاں ہین۔ اک تے ایہہ جو عورت تے مرد دا سماج بارے وکھرا ورتارا تے دوجا خود سماج دے اندر رہن والے تے باہر والے دا نکھیڑ۔

رانجھا اک مرد ہے تے عام طور تے مرد دی بھل چُک معاف کر دِتی جاندی ہے، بُھلا دتی جاندی ہے، پر زنانی نوں کوئی بخشن لئی تیار نہیں ہوندا۔ایسے لئی عورت ہر پیر چکن توں پہلاں کئی واری پُن چھان کردی ہے۔ ایسے لئی ہیر رانجھے نوں کہندی ہے  جو توں چوری خیرات وچ دین توں پہلاں پوری پن چھان کرنی سی جو توں کیس نوں چوری دے رہیا ہیں۔ رانجھا اک تے مرد ہے تے دوجا سب کجھ چھڈ چھڈا کے آپ ملنگ ہو گیا ہویا ہے۔ ایس لئی اوس لئی لوڑ وند دی لوڑ پوری کرن لئی کسے پن چھان دی لوڑ نہیں۔

ایس دے نال ایہہ وی ہے جو ہیر اجے اپنے ٹبر تے سماج وچ رہ رہی ہے، اوس نوں اوس دے اندر رہ کے لڑنا ہے ایس لئی اوہ ہر پیر تے ایہہ سوچ کے چلدی ہے جو اوس دے ہر پیر پٹن دا اوس دے  ٹبر تے سماج وچ کیہ اثر پوے گا۔ اوس دے الٹ رانجھا اپنا ٹبر چھڈ کے آیا ہے تے اوہ نویں سماج دا وی حصہ نہیں ایس لئی اوہ  آلے دوالے ہو رہیاں چتر چالاکیاں دا وی بہتا جانو نہیں ۔

وارث شاہ دے سمے جو اتھل پتھل تے ٹُٹ بج ہو رہی سی اوس وچ وی کیدو ورگے کردار عام سن ۔جیویں جیویں سماج بدل رہیا سی، جٹالی مغلاں دے ورتارے نوں پلٹا کے اپنی شاہی قائم کر رہی سی اوس وچ وی کیدو ورگیاں سماج دیاں ردیاں طاقتاں سماج دے راکھیاں نوں صلاحاں دے رہیاں سن۔ مطلب سماج اینا کھوکھلا ہو چکیا سی جو اوس وچ کیدو ورگے بندے  فیصلیاں دے صلاح کار ہو چکے سن۔

اگے ودھو لہر وچ ہیر تے رانجھے والے نکھیڑ ہوندے ہین۔ کجھ دھڑے رانجھے وانگوںصرف نظریے دے زور تے اگے ودھنا چاہندے نیں تے کجھ دھڑے ستھاں وچ اوہ ہوندے نیں جیہڑے وچاردے ہین جو نظریے دے نال نال سماج دے اندر ہوندیاں ورتیندیاں ول دھیان دینا چاہیدا ہے۔ جے اہناں دھراں دا اک دوجے نال ہیر رانجھے وانگ جوڑ جڑیا رہوے تے گل اگے ودھدی ہے تے جے اجوڑ ہو جاوے وکھرپ ہو جاوے تے پھیر کیدو دی جت ہو جاندی ہے۔  

 


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels