Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> آکھیا وارث شاہ نے >> ہیر وارث شاہ بند ۸۸

ہیر وارث شاہ بند ۸۸

February 16th, 2009
1 / 5 (1 Votes)

ہیر ڈھائےکے آکھیا میاں چاچا چُوری دے جے جیویا لوڑنا ہیں
نہیں مار کے جِند گوا دیساں مینوں کسے نہ ہٹکنا ہوڑنا ہیں
بنھ پیر تے ہتھ لٹکا دیساں لڑ لڑکیاں نال کیہ جوڑنا ہیں
چُوری دے کھاں نال حیا آپے کا ہے اَساں دے نال اجوڑنا ہیں


اوکھے لفظاں دے معنی


جیویا لوڑنا ایں: جے زندگی دی لوڑ نہیں تے
لوڑنا: چاہنا
ہٹکنا: کسے نوں زبانی کلامی کسے کم توں روکنا
ہوڑنا: کسے تھاں جاون یاں باہر نکلن توں روکن لئی عملی تدبیر
لڑ جوڑنا: ساک گنڈھنا
اجوڑنا۔نکھیڑ پاونا

 

سدھا مطلب

ہیر نے کیدو نوں ڈھاہ کے آکھیا جے تینوں اپنی جان پیاری ہے تے چوری موڑ دے

جے توں نہ منیا تے میں تینوں جانوں مار چھڈنا ہے ، تے مینوں ایس توں کسے نے روکنا وی نہیں

میں  تیرے ہتھ پیر بنھ کے تینوں لٹکا دینا اے، کیوں جو توں کڑیاں نال پواڑے پا رہیا ہیں

جے تینوں اپنی شرم ہے تے چوری موڑ دے  کیوں جے میرے نال دشمنی  چنگی نہیں

 

کھلارواں مطلب

 

ناٹک کاری دی پدھر تے ایس وارث شاہ وکھا رہیا ہے جو ہیر کیدوں ناک کیویں بنھڑ رہی ہے، اوہ اوس نوں جان توں مارن دے، پٹھیاں ٹنگن دے ڈراوے دے کے اوس کولوں چوری کھوہنا چاہندی ہے۔ اوہ اوس نوں ایہہ وی چتاونی دیندی ہے جو سردار دی دھی ہاں تے مینوں کسے نے تینوں جانوں مارن توں روکنا نہیں تے تیری حیثیت کجھ وی نہیں ہے۔

 

پر نیجھ نال ویکھو تے ہیر دو پینترے ورت رہی ہے ، اک تے طاقت دا تے دوجا گجھا جیہا کیدو نوں الزام وچ پھساون دا وی۔ ہیر دی کیدو نوں دھمکی اک طرحاں اوس ویلے دے سماج دی طبقاتی ونڈ وی سینت ماردی جاندی ہے۔ مطلب جے حاکم میل دا کوئی جی تھلڑے طبقے دے بندے نوں جانوں وی مار دیوے تے اوس نوں کوئی روک نہیں سکدا۔ سو ہیر اوس ورتارے دا وکھالا وی ہے، کیوں جو کیدو سماج توں ردیا ہویا بندہ ہے جیس دی کوئی حیثیت نہیں۔

 

دوجی پدھر تے ہیر ایہہ کہ کے جو "لڑ لڑکیاں نال کیوں جوڑنا ایں" ایہہ وی دس رہی ہے جو میں تیرے تے جنسی الزام وی لا سکنی ہاں۔تے ظاہر ہے جو اک ایویں جیہا بندہ سردار دی دھی نال جنسی جوڑ جوڑن دے الزام راہیں ماریا جا سکدا ہے۔ جاگیرداری سماج وچ ایس طرحاں دے بھیڑوچ  قتل کردینا عام جیہی گل ہے۔ایسے لئی ویکھو اخیری مصرعے وچ ہیر کیدو نوں حیا کھان دا کہندی ہے، مطلب جے توں کڑیاں نال پاڑ پایا تے تیری حیا وی داء تے لگ جانی ہے۔

 

ہیر نے چوری عشق وچ کٹی ہے ایہہ اوہدے عشق دا وکھالا ہے۔ کیدو اوسے عشق دے وکھالے راہیں ہیر دے عشق تے اپنے من نال جوڑ جوڑن دا ویری ہے۔ ہیر نے چوری صرف رانجھے لئی کٹی ہے اوس دنیاداری دے ورتارے موجب ہوون والے خاوند لئی ضیافت نہیں کیتی۔ کیدو شیطان وانگ اوس آزادی دا ویری ہے جیس دا سفنا ہیر تے رانجھا ویکھ رہے ہین۔ ایہہ گل اسیں پچھلے بند دی تشریح وچ کر آئے ہاں ایس لئی تسیں اوس تے اک واری پھیر جھات مار لؤو۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels