Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> آکھیا وارث شاہ نے >> ہیر وارث شاہ ۔ بند ۹۰

ہیر وارث شاہ ۔ بند ۹۰

May 3rd, 2009

چُوچک آکھیا کُوڑیاں کریں گلّاں ہیر کھیڈدی نال سہیلیاں دے
پینگھاں پائیکے سیاں دے نال جھوٹے تِرنجن جوڑ دی وِچ حویلیاں دے
ایہہ چُغل جہان دا مگر لگا فقر جاندے ہو نال سہلیاں دے
کدی نال مداریاں بھنگ گھوٹے کدی جانچے نال چیلیاں دے
نہیں چُوہڑے دا پُت ہو سید گھوڑے ہون نہیں پُتر لیلیاں دے
وارث شاہ فقیر بھی نہیں ہوندے بیٹے جٹاں تے موچیاں تیلیاں دے

اوکھے لفظاں دے معنے

کُوڑیاں: جھوٹھیاں
سیلھی: بکریاں دی جت یاں کالی اُن دء پتلی رسی جیہڑی ستھرتے فقیراں دے گل وچ پنج چھ گھیریاں وچ ہوندی سی
مداری: حضرت شاہ مدار نوں منن والے جٹا دھاری فقیر

سدھے معنے

[ہیر دے پیو چوچک نے کیدو نوں جواب دیندیاں کہیا] توں جھوٹی گلاں کر رہیا ہیں کیوں جے ہیر تے سہیلیاں نال کھیڈدی ہے (مطلب رانجھے نوں ملن نہیں جاندی)
اوہ تے اپنیاں سہیلیاں نال پیگھاں پاکے جھوٹدی ہے تے حویلی دے اندر ہی ترنجن جوڑدی ہے ۔
ایہہ [کیدو] سارے جہان دا وڈا چغل خور ہے جیس نے گل وچ فقیراں والی مالا پائی ہوئی ہے۔
ایہہ کدی مداریاں نال بہہ کے بھنگ گھوٹدا ہے کدی اپنیاں چیلیاں نال رل کے نچدا ہے۔
چوہڑے دا پتر کدی سید نہیں ہوندا جیویں گھوڑے بھیڈاں دے گھر نہیں جمدے۔
وارث شاہ کہندا ہے جو جٹاں، موچیاں تے تیلیاں دے مُنڈے فقیر نہیں بن سکدے۔ 

کھلارواں مطلب

ایہہ بند سدھا پدھرا ہے جیس وچ ہیر دا پیو کیدو دے الزاماں نوں نندا ہے۔ پہلاں تاں اوہ ہیر دے روز دیہاڑےدے ورتارے بارے دسدا ہے جو اوہ تے صرف اپنیاں سہلیلیاں نال ہی موج میلا کردی ہے۔ تے پھیر وکیلاں طرحاں کیدو دے بطور گواہ ہوون نوں شک شبے وچ پاون دا جتن کردا ہے۔

چوچک کہندا ہے جو اک تے کیدو انج ہی چغل خوری وچ مشہور ہے تے دوجے جیہڑا بندہ مداریاں نال بہہ کے بھنگ گھوٹ کے پیوے یا چیلیاں نال رل کے نچے اوس دی گل تے اعتبار کیویں کیتا جا سکدا ہے۔ مطلب گواہ وی کوئی ساؤ بندہ ہونا چاہیدا ہے۔ چوچک دا ایہہ اوہ پینترا ہے جیہڑا حاکم میل عدالتاں وچ مقدمے جتن لی۔ تھلڑے میل دے لوکاں دے خلاف ورتدا ہے۔ اوہناں دی نکی موٹی چوری چکاری دی چرچا کرکے اوہناں دے سچ نوں وی جھوٹ ثابت کردتا جاندا ہے۔

اخیری دو مصرعیاں وچ وارث شاہ اپنے ویلے مطلب جاگیرادار وسوں دی منطق ورتدا ہے ۔ ایس منطق وچ یا کوئی شے چٹی ہوندی ہے یا کالی یا کوئی گل جھوٹ ہوندی ہے یا سچ۔ کالے تے چٹے ، جھوٹ تے سچ دے وچکار کجھ نہیں ہوندا۔ وارث شاہ بڑا اگونہی وچارا والا روشن خیال وچار وان ہے پر اپنے ویلے دیاں حداں دا قیدی وی ہے۔ کوئی بندہ ا پنے ویلے دیاں حداں النگھ نہیں سکدا۔ اوہ اوس دے اندر ہی رہ کے اگونہے خیال گھڑ سکدا ہے۔

ایسے نوں مکھ رکھدیاں وارث شاہ دیاں مثالاں ویکھو، جو کدی چوہڑے دا پتر سید نہیں ہو سکدا جیویں بھیڈ دا جمیا گھوڑا نہیں ہو سکدا۔ چوہڑے تے بھیڈ نوں اک ہی من کے نتیجے کڈھنا جاگیرداروارے دے وچار دی متھی ہوئی منطق ہے۔
مطلب ذات پات دا نظام انج بجھا ہویا جیویں ایہہ ربی قانون ہووے۔ ایہو گل ہی اخیری مصرعے وچ سامنے آؤندی ہے جو جٹاں تیلیاں تے موچیاں دے پتر فقیر نہیں بن سکدے۔ ایس وچ لکی ہوئی سینت ایہہ ہے جو پنڈت تے سید ہی فقیری دیاں منزلاں مار سکدے ہین۔

جاگیرداری وارے دے سماج وچ ہر بندے دا رول متھیا ہوندا ہے۔ موچی دے پتر نے موچی بننا ہے تے تیلی دے پتر نے تیلی۔ جٹ نے واہی کرنی ہے تے اوس دی اولاد نے وی۔ موچی تیلی نہیں بن سکدا تے جٹ موچی نہیں ہو سکدا۔ سب دے رول جمن توں پہلاں ہی متھے ہوئے نیں۔ وارث شاہ دا ایہہ تے ہور بہت سارے بند ایس قطعیت پسندی دا لشکارا ماردے ہین تے سانوں دسدے ہین جو کیویں ویلا اگونہے توں اگونہے وچاروان دی راہ متھدا ہے۔

ایس گل نوں ایویں وی لیا جا سکدا ہے جو ایس بند وچ وارث شاہ ہیر دے پیو چوچک دا بولارا ہوندیاں اوسے دی منطق وچ گل کر رہیا ہے تے چوچک ورگے بندے اپنی گل دے ثبوت وچ ایسے طرحاں دیاں مثالاں دیندے ہین۔ اوہناں دا ورتارا ذات پات تے چلدا ہے تے اوہ اوس نوں ہی مذہب طرحاں من کے اپنی گل منواندے ہین۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels