Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> آکھیا وارث شاہ نے >> ہیر وارث شاہ بند 92

ہیر وارث شاہ بند 92

May 20th, 2009

کیدو آکھدا دِھیو نوں ویاہ ملکی دھروہی رب دی من لے ڈائنے نی
اکّے مار کے وڈھ کے کرس بیرے منہ سِر بھن چواں ساڑ سائنے نی
ویکھ دھیو دے لاڈکیہ دند کڈھیں بہت جھورسیں رنیں قصائنے نی
اکّے بنھ کے بھوہرے چا گھتو لنب وانگ بھڑولے دے آئنے نی

اوکھے لفظاں دے معنی
 
دھروہی: واسطہ، ظلم دی فریاد؛ بیرے: نکے نکے ٹوٹے ؛ چوآ : لاڈ ،چاء؛ دند کڈھنا : فضول ہسنا؛ جھُورسیں: توں پچھتاویں گی
لِنب: لیپ دے

سدھا مطلب:

کیدو ہیر دی ماں ملکی نوں کہندا ہے جو ڈائنے تینوں رب دا واسطہ ای اپنی دھی نوں ویاہ دے؛ یاں پھیر ایس دے (ہیر دے) نکے نکے ٹوٹے کردے یا وڈئیے چوہدرانئیے ایس دا منہ سر بلدے لکڑ دے دے چو نال ساڑ دے؛ توں ہن تے اپنی دھی دیاں پٹھیاں سدھیاں گلاں ویکھ کے دند کڈھنی ایں یاں ایویں فضول ہسدی پئی ایں توں اگے جا کے بہت پچھتاویں گی؛ یاں پھیر ایس نوں کسے بھوہرے وچ بند کردے جیویں بھڑولے دا منہ لنب دتا جاندا ہے۔

کھلارواں مطلب

ایس بند وچ جیہڑی پہلی گل سامنے آوندی ہے اوہ کیدو دا ہیر دی ماں ملکی نال گل کرن دا ڈھنگ ہے۔ کہن نوں ملکی قبیلے دے سب توں وڈھے سردار چوچک دی گھر والی ہے تے کیدو قبیلے دا دھتکاریا ہویا بندہ ہے جیس دا ذکر پہلاں اک بند وچ ایویں آیا سی جو اوہ مداریاں نال نچدا ہے تے بھنگ چرس دا عملی ہے۔ پر قبیلے دی پوڑی دے سب توں تھلڑے ڈنڈے دا مرد قبیلے دی سب توں اچی زنانی نال حاکماں وانگ گل کرسکدا ہے تے اوس نوں کسے وی طرحاں دا مندا بول سکدا ہے۔ وارث شاہ ہوراں سدا وانگ سماج وچ ہوون والے ڈرامے دا اصل وکھاون لئی بڑی ہوشیاری نال ایہہ بند ایس تھاں تے پرویا ہے۔ کیدو کولوں ملکی نوں مندا بلوایا تے اوس دی پت لواہی ہے جے ایہہ گل صاف ہوجاوے جو جاگیرداری سماج وچ عورت دی حیثیت سب توں ماڑے طبقیاں (کامے، چاک، نوکر) وانگ ہی ہوندی ہے۔

کیدو کولوں ہیر دی ماں ملکی دی پان پت لہوا کے وارث شاہ ہوریں ہیر دے بھلک تے وی چانن پا رہے ہین۔ مطلب اوہ ودھ توں ودھ چوچک ورگے وڈے سردار دی گھر والی بن سکدی ہے پر پھیر وی سماج وچ حیثیت اپنی ماں وانگ انج دی ہی ہووے گی جو کیدو وانگ ٹکے دا بندہ وی اوس نوں گاہل مندا کر سکدا ہے۔ مرداں وچوں سب توں رہیا کھیاہ مرد وی اوس توں اتے ہی ہووے گا۔

انج بند وچ اوہ سب ڈھنگ دسے گئے ہیں جیہناں نال اوس سماج وچ کڑیاں نوں ماریا، توڑیا بھنیا جاندا ہے۔ اوہناں نوں نکے نکے ٹوٹے کرکے مار دتا جاندا ہے، بلدیاں لکڑاں نال اوہناں دا منہ ساڑیا جاندا ہے یا پھیر گھٹو گھٹو اوس نوں بھورے وچ انج تاڑ دتا جاندا ہے جیویں جنس بھڑولیاں وچ پا کے اوہناں دا منہ لپ دتا جاندا ہے۔ مطلب کڑیاں نوں نکی توں نکی سزا وی جنس وانگوں ہنیری کوٹھڑی وچ قید کر دینا ہے۔ ایس مارا ماری دے پینتریاں نوں پڑھ کے پہلے مصرعے ول جاؤ تے لگدا ہے جو اوس سماج وچ ویاہ وی اک سزا یا ڈنڈ ہے جیہڑا ہر کھل مانن دی چاہت وند روح نوں دتا جاندا ہے۔ مطلب ویاہ تے ہور قاتل سزاواں وچ کوئی فرق نہیں ہے۔ ایس دا ثبوت ملکی آپ ہے جیس دی چوہدراہٹ اک ماڑے جیہے مرد کیدو دے اگے گلیاں دے ککھاں نالوں وی ہولی ہے!


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels