Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> آکھیا وارث شاہ نے >> ہیر وارث شاہ: بند 93

ہیر وارث شاہ: بند 93

June 10th, 2009

غُصے نال ملکی تپ لال ہوئی جھب دوڑ توں مٹھیے نائنے نی
سَدّلیا توں ہیر نوں ڈھونڈ کے تے تینوں ماؤں سدیندی ہے ڈائنے نی
کھڑ دُنبیے موہنیے پاہڑےے نی مشٹنڈیے یار دیے واہنے نی
وارث شاہ وانگوں کِتے ڈُب موییں گھر آ سیاپے دئیے نائنے نی

اوکھے لفظاں دے معنی
جھب۔چھیتی
کھڑ دُمبیے: اپنے مخصوص عضو توں پُوچھ چک کے ٹرن والی، بے حیا۔
موہنی: حسن روپ دے فریب نال لُٹن والی
پاڑھی: چتکبری ہرنی،بارہ سنگھی
مشٹندی۔مچھری ہوئی، لچی لفنگی
یارے دی واہن۔ جیس نوں یار واہندا ہے، یا جیہڑی یاری دے رستے تے چلدی ہے کیوں جو واہن دا مطلب رستہ وی ہے
بار: بے آباد، جنگلی علاقہ
سیاپے دی نائن:جیہڑے گھر وچ سوگ ہووے اوتھے پروہنے آوندے رہندے ہین ایس لئی اوتھے نائن کھانا پکاون لئی مسلسل کئی دیہاڑ رہندی ہے تے اپنے گھر نہیں جاسکدی۔

سدھا مطلب

رشتے دارنیاں دیاں گلاں سن کے ہیر دی ماں ملکی غصے نال تپ کے لال رتی ہوگئی تے پنڈ دی نائن نوں کہن لگی جو اوسدے پچھے چھیتی توں چھیتی جا۔
توں ہیر نوں لبھ کے لے آ، اوسنوں آکھیں جو ڈائنے تینوں ماں سددی ہے۔
اوہنوں آکھیں توں دم کھڑی کر کے ویہر (جنسی منگ تے آئی مجھ گاں) تے آئی ہوئی ایں، تینوں حسن دا فریب چڑھیا ہویا اے جیویں چتکبری ہرنی ہوندی ہے۔توں لچی لفنگی ہو گئی ایں تے اپنے یار دی راہ تے ٹرنی ایں ( یا یار تینوں واہندا ہے)
تیرا حال وی وارث شاہ وانگ ہے جیہڑا پتہ کتھے ڈب مویا ہے، توں گھر وچ سیاپے دی نائن ہین یا توں گھر وچ سوگ دی سینت بن گئی ہیں۔

کھلارواں مطلب

ایس بند وچ ویکھو جو ہیر دی ماں کرودھ وچ انج ہی بول رہی ہے جیویں کیدو اوس تے چڑھائی کیتی سی۔ مرد اپنا سارا بھار تے غصہ زنانی تے پا دیندا ہے ۔ جے ایس نوں باہر کوئی مندا بولدا ہے تے اوہ گھر آکے اوسے طرحاں اپنی زنانی نال مندا بول کے اپنا دماغی بھار ہولا کردا ہے۔ گھر دی زنانی اپنا بھار نیانیاں تے ہور اپنے توں تھلے دے طبقیاں دے لوکاں تے لاہندی ہے۔ ایہہ اوہ راہ ہے جیس تھائیں حاکماں دا جبر ماڑے لوکاں تیکر پوڑیو پوڑی پجدا ہے۔

ایہو جیہے موقعے تے جدوں گل پردے والی ہووے تے زمیندار لوکاں دا بھار کمی ہی چکدے ہین۔ ایسے لئی ہیر دی ماں مٹھی نائن دے ساہمنے اوس نوں رج کے گالہاں کڈھدی ہے۔ اوس نوں ڈائن، جنس دی بھکھی تے یار کول بہندی تیکر آکھ دیندی ہے۔ اوس نوں پتہ ہے جو مٹھی اک کمی نائن ہے اوہ ساریاں گلاں پی جاوے گی تے گل باہر نہیں جاوے گی۔

پر تسیں اخیری مصرعے وچ ویکھو جو جیس نائن کولوں گل لکان دا، کڑی نوں گھر لیاون دا کم لتا جا رہیا ہے اوسے نین نوں سیاپے نال جوڑ دتا گیا ہے۔

جاگیرداری سماج وچ مندے کماں لئی بنے محاورے وی کمی تے تھلڑے طبقے نال جوڑے گئے ہوندے نیں جیویں جلاہے دا مشکریاں ماں بھین دے نال یاں کہیا جاندا ہے جو "توں بندہ ایں کہ نائی" ۔ ایتھے وی ویکھو سیاپے ویلے زمینداراں دا بھار چکن والی نائن نوں کیویں بھیڑے انگ وچ ورتیا گیا ہے۔

ایس پکھ توں ویکھو تے طبقاتی نظام دی زبان ہی اوس دے وچ اچے نیویں بندیاں دی ونڈ توں کیویں اثر لیندی ہے۔ سو اتلے طبقے دی کُڑی سب توں بھیڑا کم کرکے اوہ نائن بن گئی ہے جیہڑی سیاپے ویلے موجود رہندی ہے۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels