Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> آکھیا وارث شاہ نے >> ہیر وارث شاہ بند 94

ہیر وارث شاہ بند 94

June 18th, 2009

ہیر آن کے آکھدی ہس کے تے اَنی جھات نی امڑیے میرئیے نی
تینوں ڈونگھڑے کھوہ وچ چا بوڑاں کل پٹیو بچڑیے میرئیے نی
دِھیو جوان جے کسے دی بُری ہووے چُپ کےتڑے چانبڑئیے نی
تینوں وڈا اُدماد آء جاگیائے تیرے واسطے منس سہیڑئیے نی
دِھیو جوان جے نکلے گھروں باہر لگے وس تے کھوہ نہ نگھیرئیے نی
وارث جیوندے ہون جے بھین بھائی چاک چوبراں نہ سہیڑئیے نی

اوکھے لفظاں دے معنے

امڑئیے: ماں
ڈوہنگڑے: ڈوہنگے
بوڑاں: ڈوب دیاں
کُل پٹنا: خاندان دی عزت نوں خراب کرنا
نبیڑنا: مکا دینا
منس: خاوند، مرد
سہیڑئیے: رشتہ لبھئیے، جوڑ جوڑئیے
نگھیرنا: ہولی ہولی پانی دی ہیٹھلی پدھر تیکر اپڑانا، ڈوبنا
اُد ماد: جنسی چاہ

سدھا مطلب

ہیر ماں دے بلاون تے گھر آوندی ہے ناٹک کردی ہے۔ اوہ ماں دیاں اکھاں پیار نال بند کرکے کہندی ہے ماں جھات۔
ماں کہندی ہے جو میریئے دھیے توں ایس لائق ہیں جو تینوں ڈوہنگے کھوہ وچ ڈوب دتا جاوے۔
جے کسے دی دھی بری (مطلب اوہدی شہرت خراب ہو گئی ہووے) تے اوس نوں چپ کرکے کسے پاسے لا دینا چاہیدا ہے تے اوس دا نبیڑا کر دینا چاہیدا ہے۔
تیری جنس دی منگ کھل کے ساہمنے آگئی ہے، ایس لئی تیرے لئی کوئی خصم لبھیا جاوے۔
جے جوان دھی گھروں باہر نکلن لگ پوے (آوارہ ہو جاوے) اوس نوں کھوہ دی پتال تیکر پنچا دینا چاہیدا ہے۔
جے بھین بھرا جیوندے ہوون تے تھلڑے میل دے نوکراں نال جوڑ نہیں جوڑنا چاہیدا۔

کھلارواں مطلب

ہیر جد ماں دے بلاون تے گھر آوندی ہے تے ظاہر کردی ہے جو جیویں نہ کجھ ہویا تے نہ ہی اوہنوں پتہ ہے جو ماں گھنی تپی ہوئی ہے۔ اوہ ناٹکی رنگ وچ ہسدی آؤندی ہے تے نیانیاں دے لاڈ وچ ماں دیاں اکھاں تے ہتھ رکھ کے کہندی ہے "ماں جھات"۔ ایس ناٹک وچ ایہہ رمز وی ہے جو ماں حیاتی دیاں اوہناں رمزاں نوں ویکھ جیہڑیاں توں اجے تیکر نہیں ویکھیاں تے میں ویکھ رہی ہاں۔ظاہر گل ہے ہیر رانجھے دے ملاپ راہیں اک ہور جہان ویکھ رہی ہے جیہڑا اوہدی ماں لئی ان ڈٹھا تے پرایا ہے۔

ماں دی واج وی ہیر دے ناٹکی رنگ نال کجھ مدھم پے گئی ہے تے کہندی ہے میرئیے دھیے توں کل دی یا قبیلے دی لج پت لاہ دتی ہے ایس لئی توں ڈوہنگے کھوہ وچ ڈوبن جوگی ہیں۔ ایتھے تسیں ویکھو جو ہیر دی ماں ملکی سب توں پہلاں قبیلے دی آن دی گل کردی ہے ایہہ نہیں کہندی جو توں میری لج پت لاہ دتی ہے۔ سو قبیلے دے نظام وچ بندے دی اپنی کوئی ہوند نہیں ہوندی ساری لج ، پت، مان، آدر قبیلے دا ہوندا ہے۔ ایس لئی ہر فیصلہ وی قبیلے دے مفاد وچ قبیلے والیاں دی صلاح نال کیتا جاندا ہے۔ ایس پکھ توں ویکھو تے عشق قبیلے دے نظام دا ورودھی ہے، اوس دا توڑ ہے کیوں جو جنا زنانی اک دوجے لئی فیصلہ کردے ہین قبیلے دے مفاد یا اوس دی لج پت لئی نہیں۔ ایہہ بغاوت ہے جیس نوں قبیلہ سہہ نہیں سکدا۔

اگلے مصرعے وچ وی ہیر دی ماں قبیلے دی ہی زبان بولدیاں کہندی ہے جو جے کسے دی جوان دھی خراب ہو جاوے تے اوس نوں چپ چپیتے ٹکانے لا دینا چاہیدا ہے۔ کڑیاں نوں جمدیاں ہی مار دینا یا کسے وی ہور گل تے قتل کردین دا رواج اجے تیکر قبائلی تے پچھڑے ہوئے سماجاں وچ چلیا آ رہیا۔ اج وی جاگیرداری علاقیاں کارو کاری راہیں منڈے کڑیاں نوں قتل کر دتا جاندا ہے۔

ہیر دی ماں اوس تے الزام لاؤندی ہے جو تیری جنسی بھکھ بہت ودھ گئی ہے تے ایس لئی تینوں اک خصم لے کے دینا پوے گا جیہڑا تیری بھکھ لاہ دیوے تے توں رانجھے دے عشق نوں بھل جاویں۔ عام سماجی ورتارے وچ کڑی منڈے دے میل نوں جنسی بھکھ توں ودھ کجھ نہیں سمجھیا جاندا۔ ایہہ گل کسے حد تائیں ٹھیک وی ہوندی ہے ، جو نویں جوانی وچ ایہہ طلب ہڑ وانگ ہوندی ہے۔ پر اصل وچ تے ایس طلب دے پچھے دوجے نال جڑت دی چاہ وی ہوندی ہے، دوجے نال اندر دی سانجھ ودھانا وی ہوندا ہے۔ ہیر تے رانجھا دوہیں سوہنے سلکھنے تے ایہو جیہی سماجی پچھوکڑ وچوں آئے ہین جو اوہناں لئی جنسی بھکھ مارنا کوئی اوکھا نہیں سی۔ اوہ اجیہا ساک لبھ رہے سن جیہڑا موجود سماج وچ نہیں ہو سکدا۔ پر ہیر دی ماں یا سماج نوں ایہہ گل سمجھ نہیں آسکدی، اوہناں دے فارمولے دے مطابق جے کڑی منڈے نال میل ملاپ کرے تے اوسدا مطلب ہی جنسی فعل ہے۔

ایسے لئی جے جوان دھی گھروں باہر پھرن لگ پوے تے اوس نوں کھوہ دی پاتال وچ دب دینا چاہیدا ہے۔ ایتھے وی جوان دھی دے باہر نکلن دا مطلب ہی ایہہ ہے جو اوہ جنسی بھکھ لئی کسے نال وی منہ کالا کر سکدی ہے۔ زنانی نوں بندی وان بنا کے رکھن دا پربندھ نکیاں ہوندیاں توں ہی کیتا جاندا ہے۔ اوس نوں اندر ہی تاڑ کے رکھیا جاندا ہے تاں جو اوس نوں ٹبر تے قبیلے دی مرضی نال کسے مرد دے پلے بنھیا جاوے۔

اخیری مصرعے وچ ایہہ وی دس دتا گیا ہے جو جے ماں پیو تے بھین بھرا جیوندے ہوون تے تھلڑے میل دے چاکاں چوبراں (بنگالی زبان وچ وی چاک چوبر دا ایہو مطلب ہے) نال لڑ نہیں لاؤنا چاہیدا۔ ایس دے دو مطلب ہین جو جے ایہہ ماں پیو تے بھین بھرا جیوندے نہ ہوون تے کوئی پچھن دسن والا یا کوئی سنبھالن والا نہیں ہووے گا تے پھیر جو لبھے اوہ لے لوو۔ پر ایس توں بہتا ٹھکواں مطلب ایہہ ہے جو کڑی جو کردی ہے اوس دا اثر اوس دے ماں پیو تے بھین بھراواں دی عزت آن تے وی پیندا ہے۔ ایس لئی کڑی نوں اپنیاں سدھراں نہیں اپنے ٹبر دی لج پت لئی جیونا چاہیدا ہے۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels