پنڈاچت کے آرسی نال ویکھن تنھاں واہن کیہا ہل واہنا اے پنڈا پال کے چوپڑے پٹے جنہاں کسے رن کیہ اوہناں تھوں چاہنا اے ہنے بھوئیں دے جھگڑے کرے منڈا ایس توڑ نہ مول نباہنا اے دیہنیں ونجھلی واہے تے رات گاوے، کوئی روز ایہہ پراہنا ہے
مشکل لفظاں دے معنے
پنڈا۔ جسم ، تن چت۔ چیتنا توں ۔ جسم تے پھل بوٹے تے ہور نقش بناونا جیس نوں اجکل ٹے ٹو کہیا جاندا ہے۔ آرسی۔ انگوٹھی وچ جڑیا شیشہ، آئینہ جیس وچ زنانیاں اپنا منہ ویکھدیاں ہین۔ تنہاں۔ اوہناں، ایہو جیہیاں واہن۔ پہلے توں ہل واہی زمین۔ ایس وچ ہل واہنا مشکل ہوندا اے کیوں جے بھوئیں اچی نیویں ہوندی اے پنڈا پالنا۔ تن پروری کرنا۔ ویہلیاں رہ کے چنگا کھا کے جسم بناونا چوپڑنا۔ کسے تھندی شے (گھیو تیل ) وغیرہ نوں کسے تھاں تے ملنا، جیویں روٹی چوپڑنا، وال چوپڑنا پٹے۔ لمے وال، زلفاں رن۔ عورت توڑ۔ اخیر تیکر مول۔ باالکل، ہڈوں دیہنیں۔ دن نوں ونجھلی۔ بنسری ونجھلی واہنا۔ بنسری بجانا پراہنا۔ مہمان کوئی روز دا پراہنا۔ کجھ دناں دا مہمان
سدھا مطلب۔
(پچھلے بند توں جوڑ: بھابیاں پنڈ وچ رانجھے بارے ایس طرحاں دا پروپےگنڈہ کیتا ہویا ہے)
جنہاں (مرداں) جسم تے نقش نگار بنائے ہوئے ہوون تے اپنا چہرہ شیشے وچ ویکھدے رہندے ہوون اوہناں واہناں وچ کیہہ ہل واہ سکنا اے۔ جنہاں (مرداں) پنڈا ہی پالیا ہے تے اپنے لمے وال یا زلفاں نوں چوپڑ کے رکھدے نیں، کسے زنانی نے اوہناں کولوں کیہہ لینا ہے (مطلب اوہ روٹی ٹک دا تے پربندھ نہیں کر سکدے)۔
ایہہ منڈا جیہڑا ہنے توں بھوئیں وندں تے لین دے جھگڑے کردا پیا ہے، ایس نے اخیر تائیں نباہنی کوئی نہیں( مطلب ایس ٹبر توں وکھ ہو جانا اے)
(ایہہ) دن نوں بنسری وجاوندا رہندا ہے تے رات نوں گاوندا رہندا اے۔ (ایس توں ) لگدا ہے جو ایہہ ایتھے کجھ روز دا ہی مہمان ہے (مطلب ایس چھڈ کے کتے ہور ٹر جانا ہے)
کھلارواں مطلب۔
پچھلے بند دی اخیرر انج ہوئی سی جو ''گل بھابیاں ایہہ بنا چھڈی، مگر جٹ دے پھکڑی لائی آہی''۔ ایس بند وچ جنہاں گلاں توں دھیدو رانجھے دی پھکڑی لائی جاندی ہے اوہناں دی تفصیل ہے۔مطلب اوس نے پنڈے تے نقش بوٹے بنائے ہوئے نیں، اوہ شیشہ ویکھدا ہے، اوہ وال چوپڑ کے رکھدا ہے، اوہ رب واسطے بھوئیں توں لڑدا ہے۔ اوہ دنے ونجھلی جاوندا تے رات گاوندا ہے وغیرہ وغیرہ
ایہہ بند حاکمی دی منی پر منی چال دا وکھالا ہے۔حکمران لوک دشمن کم کرن لئی یا اپنے کیتے کماں تے پردہ پاون لئی میڈیا نوں ورتدے نیں۔ پرانے ویلیاں وچ پینڈو سماج وچ میڈیا دا کم کمی کارا تے زنانیاں کردیاں سن۔ ایس لئی رانجھے دی کتھا وچ اصل کم تے بھرا وکھا رہے ہین، تے میڈیا دا کم بھرجائیاں دے ذمے ہے۔
اوہ گل نوں بنا کے ایویں پیش کر رہیاں ہیں جو اصل گل ایہہ نہیں جو دھیدو رانجھے نوں زمین بنجر دتی گئی ہے سگوں ایہہ ہے جو اوہ نازک تے ملوک ہے، گاون وجاون والی روح ہے اوہ واہی کر ہی نہیں سکدا۔ تے چونکہ اوہ واہی نہیں کر سکدا ایس لئی سارا قصور اوہدا ہے بھائیاں تے بھرجائیاں دا نہیں جنہاں نے رشوت دے کے ساری بھوئیں آپ لے لئی ہے تے بنجر زمین اوہنوں دے دتی ہے۔اوہ آپ بھوئیں کھوہن دیاں سازشاں کر رہے ہین تے الزام دھیدو تے لا رہے ہین جو اوہ بھوئیں ونڈن دیاں گلاں کردا ہے۔ مطلب اپنے بھیڑے کارے وی اوس دے نانویں لادیندے نیں۔
میڈیا دا کم ہی ایہہ ہوندا ہے جو اپنی مرضی نال نکی گل نوں وڈھا تے وڈھی گل نوں نکا کر کے پیش کردا ہے۔ ایتھے بھرجائیاں وی اوہو ڈھنگ ورتدیاں ہین۔ ظاہر گل ہے جو دھیدو رانجھا پیو دا نکا تے لاڈلا پتر سی۔ پھیر اوس دا اُلار (رجحان) گاون وجاون ول سی۔ اوہ واہی بیجی وچ ہتھ نہیں پواندا ہووے گا۔
اوہ ہور آرٹسٹاں وانگراپنے جسم نوں تھوڑا بنا سنوار کے وی رکھدا ہووے گا پر بھرجائیاں نے اوس دا جو نقشہ پیش کیتا ہے جو اج دے پنک گاون والیاں نالوں وی ودھ ہے۔ایہہ سب ودھا چڑھا کے گل بناون وچ بھابیاں دا تے اپنا مقصد ہے اوہ اوس دے ایس جیون ڈھنگ نوں ودھا چڑھا کے انج لوکاں نوں دس رہیاں ہین جو اوہ بالکل نکھٹو منڈا ہے۔
ایتھے ایہہ گل وی وچار یوگ ہے جو جو بھائیاں بھرجائیاں دا رانجھے نال ویر پیو دے پیار دے ساڑے پاروں وی ہے تے اوس دے جیون ڈھنگ پاروں وی۔ اوہ اوس ٹھپے وچ بنیا ہی نہیں جیس وچ اوہ بنے ہین ، اوہ اوس کم لئی جمیا ہی نہیں جیس لئی اوہ جمے ہین۔ ایس لئی ایہہ ٹکرا حیاتی دے دو ڈھنگاں دا وی ہے۔
اک پاسے عام واہی وان مل مارو دنیاداری رکھن والے بھرا ہین تے دوجے پاسے اک آرٹسٹ تے گویا۔ اہناں دوہاں ڈھنگاں دا ملاپ ہو ہی نہیں سکدا۔ایسے لئی دنیا داری والے غیر دنیادار نوں ٹھگی نال یاں دھگانے نال باہر کڈھ دیندے نیں۔
اک دوجی وچار یوگ گل ہے جاگیرداری سماج دا سوڑا گھیرا جیہدے وچ زمین والاں نوں چھڈ کے ہور کوئی آدر یوگ منیا ہی نہیں جاندا۔ گاون والا کمی بن کے تے رہ سکدا ہے برابر دا بھائی وال بن کے نہیں۔ ایس لئی رانجھے کول چون کوئی نہیں سوائے ایس دے جو اوہ یاں تے بھراواں طرحاں بھوئیں تے مل مارے تے یاں ایس نوں چھڈ کے اگے تُر پوے۔
