Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> آکھیا وارث شاہ نے >> ہیر وارث شاہ: بند 96

ہیر وارث شاہ: بند 96

July 23rd, 2009
مائے رب نے چاک گھر گھلیا سی تیرے ہون نصیب جے دُھروں چنگے
ایہو جیہے جے آدمی ہتھ آون سارو ملک ہی رب تھیں دعا منگے
جیہڑے رب کیتے کم ہو رہے سانوں ماں کیوں غیب دے دَیں پنگے
کُل سیانیاں ملک نوں مت دتی تیغ مہریاں عشق نہ کرو ننگے
نہیں چھیڑیئے رب دیاں پوریاں نوں جنہاں کپڑے خاک دے وچ رنگے
جنہاں عشق دے معاملے سریں چائے وارث شاہ نہ کسے تھوں رہن سنگے

اوکھے لفظاں دے معنی
دُھروں: شروع توں، رب ولوں۔ سارو:سارا۔ غیب دے پنگے: الزام جنہاں دی کوئی وجہ نہ ہوئے۔ پنگا:کنڈا۔

سدھا مطلب
ہیر ماں نوں کہندی ہے جو ایہہ تے رب دا کرم سی سی جیس نے چاک ساڈے کول گھل دتا۔ ایہہ چھڑا نصیب والیاں نوں ہی ملدا ہے۔ ایہہ جو کجھ ہویا ایہہ رب نے کیتا پر توں کیوں من گھڑت تے ہوائی الزام لا رہی ہیں۔سب سیانیاں نے دنیا نوں ایہہ مت دتی ہوئی ہے جو تلوار، مہریاں تے عشق نوں ننگا نہیں کرنا چاہیدا۔ اوہناں نوں نہیں چھیڑنا چاہیدا جیہڑے مٹی وچ مٹی ہوکے رب دے پورے بندے بن چکے ہین۔ جیہڑے لوک وی عشق دے پینڈے تے تُر پیندے اوہناں نوں کسے کولوں کوئی شرم یا سنگ نہیں۔

کھلارواں مطلب
ہیر دی ماں نے جتھے گل مکائی سی جو کسے دے ماں پیوتے بھین بھرا جیوندے ہون تے اوس نوں چاکاں چوبراں نال یاری نہیں لاؤنی چاہیدی، ہیر اوتھے ہی گل نوں پرتاوندی ہے۔ اوہ کہندی ہے جو چاک گھر بیٹھیاں رب دی دین سی تے ایہہ تے نصیبے والیاں دے حصے وچ آوندا ہے۔ مطلب ہیر دی ماں لئی جو مہنہ تے فساد دی جڑ ہے اوہ ہیر لئی رب دی گھلی سوغات ہے۔ ایہو جیہی سوغات تے رب بھانے ہی ملدی ہے کیوں جے سماج دے اندر تے ایس طرحاں مرد پیدا نہیں ہوندے تے نہ ہی لبھیاں لبھے جا سکدے ہین۔ ایہہ تے چھڑا چنگا نصیبہ سی جو رانجھا آپ ہی ٹر کے ہیر کول آگیا۔ ایہو جیہے بندے دے حاصل لئی تے سارا جہان دعا منگدا ہے۔ مطلب رانجھا اوہ بندہ ہے جیہڑا جہان وچ کدی کدی جمدا ہے تے ملدا ہے۔

ہیر ماں دیاں ٹوکاں نوں الٹاؤندیاں کہندی ہے ایہہ جو کجھ ہویا ایہہ رب دا بھانا سی ایہہ عام بندیاں یا سماج دی ولگن وچ ہوون والا جوڑ نہیں سی۔ تے ماں جو کجھ سمجھدیاں ٹوکاں مار رہی ہے اوہ ازغیب یا خیالی گلاں ہیں ہین۔ ماں نے کہیا سی جو ہیر نوں جنسی بھکھ پاروں چاک نال یاری کیتی ہے پر ہیر کہندی ہے جو ایہہ بے مڈھ دی ٹوک ہے، اوسدا تے رانجھے دا میل جنسی بھکھ پاروں نہیں ہویا۔

ایتھے وارث شاہ ہوریں اصلی گل ایہہ کہہ رہے ہین ہیر دی ماں دے مرد زنانی دے جوڑتے سماج دیاں تہمتاں بارے دے ڈر دیاں سب گلاں خیالی ہین اوہ رب دیاں بنائیاں نہیں ہین۔ مطلب جو کجھ سماج نے آپسی تے مرد زنانی دے جوڑ بارے گلاں گھڑیاں ہویاں نیں اوہناں دی کوئی حقیقت نہیں تے حقیقت جو رب نے بنایا ہے، فطرت نے گھڑیا ہے جیس وچ بندہ بندے نوں طبقے، ذات پات تے قبیلہ واری دیاں حداں نوں اک پاسے رکھ کے ملن دی سک رکھدا ہے، ایہہ اک ویلے وچ سماج سے دے گھڑے ہوئے ازغیب دے اصول جو اوہ ایہہ نہیں کر سکدا۔

اک ہور طرحاں ویکھو تے جو ماں کہہ رہی ہے اوہ اک خاص ویلے دے خیالاں دی گھڑت ہے۔ ویلا لنگھدا ہے تے اوہ سب خیال کُوڑے ہو جاندے نیں۔ مثلاً اج دے زمانے وچ کسے زنانی دا اپنی مرضی دے مرد نال جوڑ جوڑنا کوئی خاص گل نہیں ہے جیہڑی ہیر دے ماں دے سماج وچ سوچیا وی نہیں جا سکدا۔ تے جو اوس ویلے سوچیا نہیں جا سکدا اوسے نوں ہیر رب دا بھانا کہہ رہی ہے۔

فیر ہیر خبردار وی کردی ہے جو تاریخ وچ سیانیاں نے تت کڈھیا ہویا ہے جو تلوار تے عشق نوں ننگا نہ کرو کیوں جو دوہاں دی خاصیت ایہہ ہے جو اپنے ساہمنے آؤن والی ہر شے نوں کٹ دیندے ہین۔ جیویں تلوار جثے نوں کپ دیندی ہے ایسے طرحاں عشق سماج دی بنتر نوں ہلا دیندا ہے۔ ایس لئی جد تائیں تلوار تے عشق تے پردہ پیا ہویا ہے تد تائیں بچا ہے۔

سماج دیاں حداں نوں ٹپ جان والے تے طمع لالچ نوں چھڈ دین والے رب دے پورے بندے ہوندے ہین۔ اوہ پہلاں ہی مٹی نال مل کے مٹی ہو چکے ہوندے نیں ۔ ایس لئی اوہناں نوں چھیڑنا یا ستاونا فائدہ نہیں گھاٹا ہی دیوے گا۔ تے ایہو جیہے لوکاں وچ عشق کرن دی جوگتا ہوندی ہے۔ مطلب عشق دے درجے تے پہنچیا ہی اودوں جا سکدا ہے جدوں پہلاں مٹی نال مٹی ہو جائیے تے ایہو رب دا پورا بندہ ہونا ہے۔ یعنی طبقے، سماج تے اُچے نیویں دی قید وچوں نکل جانا ہی رب دا پاونا ہے۔ تے جے کوئی ایہہ ساریاں منزلاں لنگھ کے عشق دا بھار سر تے چاء لیندا ہے تے اوس نوں کسے کولوں کوئی سنگ شرم نہیں۔ کیوں جو سنگ شرم تے آپ سماج دیاں ریتاں نوں من اوس وچ اپنی تھاں بناون دے عمل وچ جمدی ہے۔ تے جے کوئی پہلاں ہی مٹی ہو گیا ہووے تے اوس نوں کاہدی شرم۔ اوس نوں سماج دیاں تہمتاں تے بھیڑا آ کھن نال کوئی فرق نہیں پیندا۔

Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels