Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> آکھیا وارث شاہ نے >> ہیر وارث شاہ: بند 98

ہیر وارث شاہ: بند 98

August 18th, 2009

چُوچک آکھدا ملکیے جمدی نوں گل گُھٹ کے کاہے نہ ماریو ای
گُھٹی اَک دِی گھول نہ دِتیائی اوہو اج صواب نتاریو ای
منجھ ڈونگھڑے دھےو نہ بوڑیائی وڈھ لوڑھ کے مول نہ ماریو ای
وارث شاہ خدائے دا خوف کیتو قارون وانگ نہ زمین نگھاریو ای

اوکھے لفظاں دے معنی
کاہے:کیوں۔ گھُٹی:جمن توں مگروں ماں دے ددھ توں وکھ پہلی شے جیہڑی نیانے نوں ماسا اک چکھائی جاندی ہے کہندے نیں گھٹی دیون والے بندے تے اوہدی گھٹی دی تاثیر ساری عمر نیانے دے کردار وچ رہندی ہے۔ اک:پنجاب دا اک جھاڑ جیس وچوں کوڑا ددھ نکلدا ہے۔ صواب: نیکی دا کم۔ منجھ: وچکار۔ بوڑنا: ڈبونا۔ لوڑھنا: روڑھ دینا

سدھا مطلب
چوچک اپنی بیوی ملکی نوں کہندا ہے جو توں ایس نوں جمدیاں ہی گل گھٹ کے کیوں نہ مار دتا۔ یا توں ایس نوں مارن لئی اک دے ددھ دی گڑھتی کیوں نہ دتی ، تے توں ایہہ کیہڑا بھلا کیتا ای۔ توں ایس نوں دونگھے (دریا) دے وچکار کیوں نہ ڈوب دتا، یا فیر ایس دے ٹوٹے ٹوٹے کر روڑھ کیوں نہ دتا۔ توں خدا دے خوف پاروں ایس نوں قارون وانگوں زمین وچ دھسا کے دب کیوں نہ دتا۔

کھلارواں مطلب
ایس بند وچ ویکھو جو جد کم وِگڑ جاندا ہے تے مرد اوسدا سارا بھار زنانی تے پا دیندا ہے۔ جے کر ہیر کسے وڈے سردار یا شہزادے نال ویاہی جاندی تے تے زنانی نوں کسے پچھنا وی نہیں سی تے سارا مان سمان مرد نے ہی لینا سی۔ نیانہ بھیڑا ہو جاوے تے کہیا جاندا ہے ایس دا روا (ماں ولوں) ہی بھیڑا ہے۔ تے جے نیانا سماج وچ اُچا ناں بنا لوے تے کہیا جاندا اخیر ایہہ ہے تے فلانے چوہدری یا سردار دا نیانا نا۔ سو اک طرحاں ایہہ بند سماج وچ مرد زنانی دیاں اجوڑویاں حیثیتاں دا لشکارا ماردا ہے۔

بند دے چاراں مصرعیاں وچ جمدی دھی نوں مارن دے ڈھنگاں بارے دسیا گیا ہے۔ گل گھٹ کے ماردیو، اَک دا ددھ پوا کے ٹوٹے ٹوٹے کر کے دریا وچ روڑھنا تے زمین وچ جیوندی نوں دفن کر دینا۔ مطلب ایہہ ہے جو اوس ویلے جمدیاں دھیاں نوں مارن دا کجھ نہ کجھ رواج ہووے گا۔ جے دھی نوں نہیں ماریا گیا تے ایہہ زنانی دا قصور ہے جیس نے رحم کر لیا۔ مطلب چوچک دا اپنا ماڈل تے قارون ہے جیس دی پیروی وچ دھی نوں زمین وچ دب دینا چاہیدا سی پر ملکی نے خدا کولوں خوف کھان دی غلطی کیتی۔ حاکم میل خدا خوفی دی غلطی بہت گھٹ کردے نیں تے جد ایہہ غلطی ہو جاوے اوس تے پچھتاوندے نیں۔

پچھلے بند وچ وی حاکم میل دے رب دے تصور تے گل ہوئی سی کہ اوہناں دا رب اوہناں دی سرداری تے جبر دی طاقت ہے۔ ایس بند وچ وی دھی نوں جمدیاں مارن تے ایڈا زور ایس گل دا ثبوت ہے جو ایس میل لئی رب دا آکھیا جو دھیاں نوں مارنا حرام ہے کوئی معنی نہیں رکھدا۔ اوہناں لئی اپنی جھوٹی شان رب دے حکم توں ودھ ہے۔ سو جو سو توں اُتے اُتے منی جاوے اوہو رب ہے، مطلب حاکم میل لئی اوہناں دا رتبہ ہے۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels