کریں آکڑاں کھائے کے ددھ چاول ایہہ رج کے کھان دیاں مستیاں نیں آکھن دیورے نال نہال ہوئیاں سانوں سب شریکنیاں ہسدیاں نیں ایہہ رانجھے دے نال ہین گھیو شکر پر جیو دا بھید نہ دسدیاں نیں رناں ڈگدیاں ویکھ کے چھیل منڈا جویں شہد وچ مکھیاں پھسدیاں نیں اک توں کلنک ہیں اساں لگا، ہور سب سکھالیاں وسدیاں نیں گھروں نکلیں تے پیا مریں بھکھا، وارث بھل جاون خرمستیاں نیں
مشکل لفظاں دے معنے آکڑاں۔ آکڑنا توں، ویہرنا، بغاوت کرنا ددھ چاول۔ ایہہ پرانیاں ویلیاں وچ بڑا اعلی کھنا منیا جاندا سی رج کے کھان دیاں مستیاں۔ یعنی پیٹ بھریا ہووے تے پٹھیاں سدھیاں مستیاں وی ہوندیاں نیں (بھکھے کولوں مستیاں نہیں ہوندیاں)۔ دیورے۔ دیور نہال۔ خوش ہونا، اک مک ہوکے موج کرنا، ایتھے مطلب ہے دیور نال پھسیاں ہوئیاں نیں۔ شریکنیاں۔ برادری دیاں دوجیاں عورتاں۔ گھیو شکر ہونا۔ اک مک ہونا (اک جان دو قالب ) شیر و شکر ہونا ڈگنا۔ ایتھے مطلب ہے کسے تے پھٹر پنچھی وانگ ڈگ پینا، عاشق ہو جانا، پروانہ وار شمع تے جان دینا چھیل۔ چھیل چھبیلا۔ بانکا، سوہنا سندر کلنک۔ کالا داغ، بدنامی دا داغ سکھالیاں۔ سوکھیاں۔ چین آران نال رہندیاں خرمستیاں۔ کھوتے والیاں مستیاں، مطلب، لاپواہی دی موج
سدھا مطلب۔ ایس بند وچ بھابیاں کہندیاں نیں جو توں ددھ چاول (چنگا تے ودھیا کھاونا ) ہے تے ایسے لئی تےنوں مستی چڑھی ہوئی ہے۔ برادری دیاں زنانیاں ساڈے تے ہسدیاں نے جو ایہہ دیور نال اک مک نیں ، مطلب اوس نال پھسیاں ہویاں نیں شریکنیاں کہندیاں نیں جو ایہہ رانجھے نال شیو شکر نیں پر کسے نوں ایہہ راز دسدیاں نہیں۔ [اوہ سن ایہہ گلاں ایس لئی وی کہندیاں نیں ) رانجھے اک چھیل چھبیلا منڈا ہے جیس تے عورتاں پھٹر ہو ہو کے انج ڈگدیاں نیں جیویں شہد وچ مکھی پھسدی دی اے۔ [ایس کر کے] توں ساڈے لئی کلنک بدنامی دا داغ بن گیا ہیں، ہور سب [شریکنیاں] سوکھیاں نیں جے گھر چھڈ کے کتے جاویں گا تے بھکھا مر جاویں [کیوں جو تینوں کجھ کرنا نہیں آوندا] تے ایہہ ساریاں مستیاں بھل جان گیاں۔
کھلارواں مطلب۔
ایہہ بند بڑا ہورواں جیہا ہے، بھابھیاں رانجھے نوں ایہہ طعنہ نہیں ماردیاں جو اوہ نکھٹو ہے، کم چور ہے یا اوس وچ کوئی ہوئی ہور بھڑ ہے۔ اوہناں دا سارا زور ایس گل تے ہے جو توں سوہنا تے چھیل چھبیلا منڈا ہیں ، ترے تے ہر زنانی مردی ہے تے واری واری ہو جاندی ہے۔ ایسے لئی شرکیکنیاں نوں ایہہ شک ہے جو اسیں وی تیرے نال پھسیاں ہوئیاں ہاں۔ کیہہ ایتھے بھابیاں اندر دا ساڑ کڈھ رہیا ہین ، جو اوس تے باہر دیاں زنانیاں کیوں مردیاں ہین تے اوہ کجھ نہیں کر سکدیاں؟ کیہہ رانجھے دا چھیل چھبیلا ہونا تے اوس دا حیاتی ڈھنگ بھابیاں لئی وی من کھچواں ہے پر اوہ بے وس ہین ، اوہ اوس دے بھرواں دیاں بیویاں ہین تے کجھ وی نہیں کر سکدیاں؟ پر ایتھے ایہہ گل اگڑ کے آوندی ہے وچوں ہر زنانی اوس مرد تے مردی ہے جیس دا حیاتی ڈھنگ مستی تے کلاکار والا ہووے۔ پر ایہو جیہا بندہ سماج دی چلت وچ سما نہیں سکدا۔ ایس لئی اوس دیاں ساریاں خوبیاں تے چنگیائیاں ہی اوس دیاں ویری بن جاندیاں نیں ۔ جے رانجھا اپنے بھرواں ورگا عام بندہ ہو جاوے، اپنا حیاتی ڈھنگ چھڈ دیوے تے شاید بھرجائیاں نوں اوس تے کوئی اعتراض نہ ہووے۔ اوہ وی باقیاں وانگ ہل واہ کے کٹیا پھنڈیان گھر آیا کرے گا۔ پر جے اوہ چھیل چھبیلا ہے، مستی وچ رہندا ہے تے پھیر اوہ ایس سماج وچ کیویں سما سکدا ہے۔ سو ایہہ مڈھلا ٹکرا ہے اک فنکار دا سماج نال جیس دا وکھالا بھابیاں راہیں ہو رہیا ہے۔
