بھابی آکھدی گنڈیا منڈیا وے، اساں نال کیہہ رکتاں چائیاں نی الی جیٹھ تے جنہاں دے فتو دیور، ڈب موئیاں اوہ بھرجائیاں نی گھرو گھری وچاردے لوک سارے، سانوں کیہیاں پھائیاں پایاں نی ساڈا حسن پسند نہ لیاونا اے، پرنا لیا سیالاں دیاں جائیاں نی
مشکل لفظاں دے معنے
رکتاں۔ شرارتی دلیلاں، گھڑیاں ہوئے بہانے الی جیٹھ تے فتو دیور۔ جیوں ماجھا گاما ، ایتھے مطلب ہے نکمیتے تھلڑے طبقے دے بندے وچاردے۔ سوچدے، گلاں گھڑدے ، بناوندے پھاہیاں ۔ جال پرنا لیا۔ ویاہ لیا ، پرناونا مصدر توں جائیاں ۔ جمیاں، سیالاں دیاں جائیاں، سیلاں دیاں جمیاں، مطلب ہیر
سدھا مطلب۔
بھابی کہندی ہے جو توں گنڈیاں وانگ ہیں تے ساڈے نال گھڑ گھڑ کے دلیل بازی کر رہیاں ۔ جنہاں دے نکمے جیہے دیور ہوون اوہناں بھرجائیاں نوں تے آپ ہی ڈب مرنا چاہیدا ہے۔ ہر گھر وچ لوک (ساڈے) بارے گلاں کردے نیں تے ایہہ پھائیاں سانوں توں پائیاں نیں۔ تیرا ساڈے نال نباہ نہیں ہونا تے توں جاکے سیالاں دی کڑی (ہیر) ویاہ لیا
کھلارواں مطلب۔
ایس بند وچ بھابی رانجھے دیاں عورت دے خلاف دلیلاں ردن لئی کہندی اے جو اک تے توں گنڈیاں وانگ ہیں تے دوجے گھڑ گھڑ کے دلیلاں دینا ایں۔ پھیر اوس نوں ایہہ وی بولی مار دیندی ہے جو تیری پنڈ وچ کوئی حیثیت نہیں ، توں الی تے فتو ورگا ایویں بندہ ہیں جیس دی کوئی عزت غیرت نہیں۔ تے تیری ایہو جیہی نکمی حیثیت پاروں سارا خانداں نیواں ہو رہیا ہے، ''ڈب موئیاں اوہ بھرجائیاں نی'' دا ایہو مطلب ہے۔
تیجے مصرعے وچ پھیر اشارہ ہے جو پنڈ وچ وچ گھر گھر لوک سوچدے نیں جو اسیں تیرے ورگے نکمے بندے کیوں رکھیا ہویا ہے یا کیوں جھلنیےآں۔ تے لوک ایہو سوچدے نیں جوتوں سوہنا تے چھیل چھبیلا ہیں تے اسیں تیرے نال پھسیاں ہویاں ہاں۔
چوتھے مصرعے وچ مہنا ہے جو ساڈے نال تیرا نباہ ہونا نہیں توں جا کے وڈھے ناں والے سیالاں دی کڑی ویاہ کے لے آ۔
ایس بند وچ بھابی دی ایہہ دلیل تے ہی جو توں نکما تے بحثی ہیں پر بہتا زور ایس گل تے ہے جو تینوں پنڈ والے آوارہ، بے حیثیت کہندے نیں تے ایس نال پورے خانداں دی لہائی ہے۔
پرانے سماج وچ ٹبر دے اک بندے دیاں کرنیاں نال سارے ٹبر دی شان بندی سی یا اوس دی عزت گواچ جاندی سی۔ بندے دے اپنی کوئی حیثیت نہیں سی، جے حیثیت سی تے ٹبر دی۔ تے ٹبر دی حیثیت بندی سی سماج وچ اوہ کم کرن نال جیہدے نال دولت تے طاقت ودھے۔ جے رانجھے ورگا بندہ اوہ سارے کم نہیں کردا تے ظاہر گل ہے جو ٹبر دی عزت وچ گھاٹ ہی آونی ہے۔ تے ایسے گل نوں بھابھی سامنے لیا رہی ہے۔
