Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> آکھیا وارث شاہ نے >> ہیر وارث شاہ: بند 99

ہیر وارث شاہ: بند 99

August 19th, 2009

راتیں رانجھے نے مہیں جاں آن ڈھویاں چُوچک سیال متھے وَٹ پایا ای
بھائی چھڈ مہیں اُٹھ جا گھر نوں تیرا طور بُرا نظر آیا ای
سیالو کہو بھائی ساڈے کم نہیں جائے اودھرے جدھروں آیا ای
اساں سانھ نہ رکھیا ایہہ نڈھا دھیاں چارنا کس بتایا ای
اِتّقُوْا مَوَاضِعَ التُّھَمْ وارث شاہ ایہہ دُھروں فرمایا ای

اوکھے لفظاں دے معنی
ڈھونا:کسے منزل دے نیڑے لیاونا۔ طور:طریقہ، کردار۔ سانھ: مجھاں یا گاواں دے اجڑ وچ اک چنگی نسل دا نر رکھیا جاندا ہے جیہڑا مجھاں گاواں نوں گبھن (حاملہ)کردا ہے۔ اِتّقو مَوَاضِعَ التَّھُم: تہمت والی تھاں توں بچو

سدھا مطلب
رات نوں جدوں رانجھا مجھاں لے کے آگیا، تے چوچک نے متھے تے وٹ پایا (تیوریاں چڑھیاں ہویاں) ہویا سی۔ اوس رانجھے نوں کہیا جو میاں توں ساڈیاں مجھاں چھڈ کے اپنے گھر ٹر جا کیوں جے تیرا بھیڑا کردار نظر آگیا ہے۔ چوچک سیالاں نوں پچھدا ہے جو (تسیں جاندے ہو) ہو ایہہ ساڈے کم دا بندہ نہیں تے جدھروں آیا ہے اودھر ہی چلا جائے۔ اسیں ایہہ مشٹنڈا ایس لئی نہیں رکھیا سی جو ایہہ ساڈیاں کڑیاں دا سانھ بن جاوے (کڑیاں نال عشق لڑاوے تے اوہناں نوں گبھن کرے)۔ وارث شاہ نوں پچھ لوو ایہہ ازل توں حکم ہے جو تہمت والی تھاں توں بچو۔

کھلارواں مطلب
پہلیاں دو مصرعیاں وچ تے گل سدھی ہے جو جد رانجھا مجھاں لے کے آیا تے چوچک وِٹریا ہویا سی۔ اوس نے رانجھے نوں کم توں جواب دے دتا تے کہیا جو تیرا کردار بھیڑا ہے تے توں اپنے گھر نوں ٹر جا۔ پر تیجے تے چوتھے مصرعے وچ قبیل داری وسوں دا سانجھے فیصلے کرن دا لشکارا ملدا ہے کیوں جو چوچک اپنی برادری نوں پچھدا ہے جو ایہہ بندہ ساڈے کم دا نہیں تے جتھوں آیا اوتھے ہی چلا جاوے۔ ایس صلاح دا مطلب ایہہ وی ہے جو برادری دا ہور کوئی بندہ رانجھے نوں نوکری تے نہ رکھ لوے یا چوچک تے ٹوک مارے جو اوس نیاں نہیں کیتا۔ ایسے لئی اوہ اگلے مصرعے وچ گل صاف کردیندا ہے جو اسیں تے کاماں رکھیا سی تے ایہہ ساڈیاں کڑیاں وچ سانھ بن کے بہہ گیا ہے۔

پر اخیرلے مصرعے وچ وارث شاہ چوچک دی مذہبی منافقت تے پورے حاکم میل دے مذہب نوں اپنیاں لوڑاں مطابق ورتن تے سٹ ماردا ہے۔ اوہو چوچک جیہڑا پچھلے بند وچ اپنی گھر والی نوں ایس گل تے مندا کہہ رہیا سی جو اوس نے دھی نوں جمدیاں ہی کیوں نہ مار دتا۔ ایس گل تے ہرکھ کر رہیا سی جو اوس دی بیوی نے قارون بن کے دھی نوں زمین وچ دب کیوں نہیں دتا یکدم مذہب دا سچا پجاری بن کے قرآن دیا آئیتاں پڑھن لگ پیا ہے۔ دھی نوں مارن دا ہرکھ کرن ویلے اوس نوں نہ رب یاد آیا تے نہ ہی قرآن دا حکم جو دھیاں نوں مارنا حرام ہے پر ہن رانجھے نوں کڈھن وچ اوہنوں مفاد نظر آوندا ہے تے جھب قرآن دیاں آئیتاں یاد آؤن لگ پیندیاں ہین۔

وارث شاہ اپنی پوری لکھت وچ سماج دے وکھ وکھ طبقیاں وچ چالو مذہب دے ناں تے بے ایمانی تے انیاں ول دھیان دواندا جاندا ہے۔ پہلاں تخت ہزارے دا قاضی آوندا ہے جیہڑا اوسدے بھراواں کولوں رشوت لے کے اوہناں نوں چنگی زمین دے دیندا ہے۔ پنڈ دے پینچ وی اوس جھوٹ وچ رلتی ہین۔ مطلب سماج دے سارے ٹھیکیدار مذہب دا ناں لے کے لوکاں نوں لٹدے ہین۔ فیر اوہ رانجھے دا ملاں نال ٹاکرا کرواکے مذہبی ستھاں نوں ننگا کردا ہے۔ تے ایتھے فیر اوہ چوچک راہیں حاکم میل دی مذہبی منافقت ول پرتدا ہے۔

وارث شاہ ایہہ کم ایڈی کاریگری نال کردا ہے جو عام پڑھن والے نوں پتہ وی نہیں لگدا جو اوہ کیہ ہتھ کر گیا ہے۔ ایس بند وچ وی ویکھو چوچک پہلاں برادری نال صلاح کردا ہے جیہڑی چوچک لئی مذہب توں وی ودھ ہے۔ پر اخیر پولے جیہے چوچک کولوں اک قرانی آیت وی بلوا دیندا ہے ۔ جیویں کوئی شنگار دی شے ہووے۔ مطلب اصل تے برادری سی قرآنی آیت تے ایویں شنگار لئی لائی گئی ہے۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels