مونہہ برا دسیندڑا بھابئیے نی، سڑے ہوئے پتنگ کیوں ساڑنی ہیں تیرے گوچرا کم کیہ پیا ساڈا سانوں بولیاں نال کیوں ساڑنی ایں اُتے چاڑھ کے پوڑیاں کھچ لیندی، کیہے کلا دے محل اسارنی ہیں اساں نال کیہ معاملہ پیا تینوں ، پر پیکیاں ولوں گوارنی ایں
مشکل لفظاں دے معنے
دسیندڑا۔ دسدا پتنگ۔ پتگا (جیہڑا شمع تے سڑ مردا ہے) گوچرا۔ قابل ۔ نال ، تیرے گوچرا۔ تیرے نال بولیاں ۔ طعنے، مہنے چاڑھ کے پوڑیاں لاہ لیندی۔ اتے چاڑھ کے تھلیاں پوڑی کھچ لینا۔ کلا۔ آرٹ فن، فریب اسارنا۔ بناونا، گھڑنا، تعمیر کرنا معاملہ پینا۔ کسے نال کوئی کم پے جانا یا کسے نال کسے گل توں جھگڑا بن جانا، جیویں زمین وغیرہ توں پیکیاں۔ ماپیاں گوارنی۔ جاہل، نکے دماغ دی
سدھا مطلب۔
رانجھا آکھدا ہے بھیڑے منہ والیئے بھرجائیے توں سڑے ہوئے پتنگیاں نوں کیوں ساڑ رہی ایں، مطلب ستائے ہوئے لوکاں نوں ہور کیوں ستا رہی ایں۔ تیرے نال کیہڑا سانوں کوئی کم پے گیا ہے جو توں انج دے طعنے مہنے مار رہی ایں۔ توں اوہناں چالاک عورتاں وچوں ہیں جیہڑیاں پہلے کسے نوں اتے چڑھاوندیاں نیں تے پھیر تھلیوں پوڑی کھچ لیندیاں نیں۔[تیریاں ایہہ چالاکیاں ہین] جو توں فن فریب نال ہوائی محل بنا دینی ایں ۔ آخر تیرے نال ساڈا معاملہ یا جھگڑا کیہہ ہے؟ [جے کوئی نہیں] تے پھیر توں ایہہ ساڑن تے طعنے مہنے دا کم ایس لئی کر رہی ہیں جو توں ماپیاں ولوں جاہل ہیں (نکے گھر دی ہیں)۔
کھلارواں مطلب۔
رانجھے دے پچھلے ڈائیلاگ وچ وارث شاہ سماج وچ عورتاں بارے وچار دا مناظرہ کر رہے سن ، پر ایس بند وچ رانجھا پھیر پنڈ دا چھیل چھبیلا پر ستایا ہویا منڈا بن گیاہے۔ ایہہ بند ٹبر دے عام ڈرامے وچ پورا ہے۔
پہلے بند وچ تے سدھا سادا الزام تے الاہمہ ہے جو بھیڑے منہ والئے توں ستیاں نوں ستاں رہی ہیں۔ دوجے مصرعے وچ رانجھا ایہہ وی کہندا ہے جو مینوں تے تہاڈے نال کوئی کم نہیں کوئی لینا دینا نہیں پھیر کیوں طعنے دے رہے ہو۔
تریجا مصرع بڑا سوہنا تے پیچواں ہے۔ گل تے ایہہ ہے جو رانجھا بھابی نوں چالاک تے فریبی کہنا چاہندا ہے پر لفظاں دی بنتر ویکھو۔ مصرعے دے پہلے حصے وچ پوڑیاں چاڑھ کے کھچ لین نال اک ٹسویر بندی ہے جو کیویں کسے نوں اتے چڑھا کے ٹنگیا جاندا ہے۔ ایتھے مطلب ایہہ وی ہے جو اک پاسیوں تے بھابیاں رانجھے نوں سوہنا، چھیل چھبیلا دسدیاں ہین جیس تے ہر زنانی مردی ہے ''رناں ڈگدیاں ویکھ کے چھیل منڈا جیویں شہد وچ مکھیاں پھسدیاں نیں'' تے دوجے پاسیوں ایہہ وی کہندیاں ہین جو اوس دی کوئی حیثیت نہیں ، تے نتھو فتو ہے جیہا ہے۔ مطلب اک پاسیوں اوہنوں اُتے چاڑھیا جا رہیا ہے تے دوجے پاسیوں اُتے لٹکایا جا رہیا۔
تریجے دے اخیری ادھے ،مصرعے وچ بھابی نوں کلا دے محل اسارن والی دس کے اوہدے فریبی گلاں دے فن نوں سامنے لیاندا گیا ہے۔ مطلب اوہ رانجھے دی اوہ تصویر اوس دے ہی سامنے کھچ کے وکھا رہی ہے جو اوہ ہے ہی نہیں، اوس نے رانجھے نوں بدنام کرن انج ہی تصویر گھڑی ہے جیویں کلا دا محل ہوندا ہے۔
چوتھے مصرعے وچ رانجھا بالکل عام دیور ہے جیہڑا بھرجائی نوں ساڑن لئی اوس دے ماپیاں دے نیویں ہوون دا طعنہ دیندا ہے۔ مطلب اوس نوں سمجھ نہیں آوندا جو ایس نال میرا معاملہ وی کوئی نہیں پر ایہہ پھیر وی میرے پچھے پئی ہوئی تے ایس دی وجہ ایہو ہووے گی جو ایہہ پچھوں کسے گنوار خاندان دی ہے۔
