سدھا ہوئیکے روٹیاں کھا جٹا، بھواں کاسنوں ایڈیاں چائیاں نی تیری پنگھٹاں دے اتے پیو پئی، دھماں ترنجناں دے وچ پائیاں نی گھر بار وسار کے خوار ہوئیاں، جھوکاں پریم دیاں جنھاں نوں لائیاں نی زلفاں کنڈیاں کالیاں ہونک منگو، جھوکاں ہک تے آن بٹھائیاں نی وارث شاہ ایہہ جنھاں دے چن دیور، گھول گھتیاں اوہ بھرجائیاں نی
مشکل لفظاں دے معنے بھواں چانا۔ غصے تے غرور نال تکنا کاسنوں۔ کیس وجہ توں پنگھٹاں۔ جتھے کڑیاں پانی بھرن لئی اکٹھیاں ہوندیاں نے پیو پئی۔ مشہوری ، شہرت ترنجناں۔ کڑیاں دے اکٹھ، کھیڈن یا چرخہ کتن لئی یا ہور کماں لئی وسار کے۔ بھل کے جھوکاں۔ نشہ ہونک منگو۔ گھول گھتیاں۔ قربان ہو گیاں۔
سدھا مطلب۔
جٹا سدھا ہو کے روٹیاں کھا، ایہہ غرور نال اکھیاں دیاں بھواں کیوں چکی پھرنا ایں۔ پنگھٹاں وچ تیری مشہوری ہے تے ترنجناںوچ وی تیری دھم ہے (مطلب پنڈ دیاں کڑیاں وچ توں ہر تھاں تے مشہور ہیں یاں اوہ تیری چاہت وچ ہین)۔ جنہاں نوں پریم دا نشہ لایا ہے اوہ سب اپنا گھر بار بھل کے خوار ہوئیاں پھردیاں نیں۔ توں اپنیاں کنڈھیاں تے کالیاں زلفاں دا جال اکٹھا کر کے اوہناں (کڑیاں) دے ہک دے تے آن بہایا اے۔ وارث شاہ کہندا ہے (بھابی ولوں) بئی جنہاں دے تیرے ورگے چن دیور ہوون اوہ تے بس قربان ہی ہو گیاں۔ (مہنے دے طور تے چن دیور تے گھول گھتیاں ورتیا گیا ہے)۔
کھلارواں مطلب۔
بھابیاں دے رانجھے نال طعنیاں دے کل چھ بند ہین۔ اوہدیاں ست بھرجائیاں سن۔ تے بنداں توں لگدا ہے جو وارث شاہ ہوریں ہر بند وچ اک وکھری بھابی ولوں طعنے مہنے لکھ رہیا ہے۔ لگدا ہے ستویں کوئی چپ کیتی ہووے گی۔ ہر بھابی انج تے وکھرے پاسیوں اوس تے حملہ کردی ہے پر ساریاں دی گل وچ اک سانجھ ہے جو اوہناں نوں ساڑ ایہہ ہے جو رانجھا چھیل چھبیلا منڈا ہے جیس تے پنڈ دیاں کڑیاں عاشق ہین۔
ایس بند وچ وی ویکھو جو بھابی اوسنوں خبردار کر رہی ہے جو سدھا ہوکے روٹی کھایا کر تے ایڈیاں اکھاں غرور نال چک چک اوہناں (بھرجائیاں) نال گلاں نہ کریا کر۔
پھیر دوجے مصرعے توں رانجھے دے کردار تے حملہ کردیاں کہیا جاندا ہے جو جتھے وی کڑیاں دا اکٹھ ہوندا اوتھے تیری ہی مشہوری ہوندی ہے۔ تے اوہناں وچ جنہاں نوں توں پریم دے نشے تے لا دتا ہے اوہ جھلیاں ہو گیاں ہین۔ گھر بار بھل کے خوار ہوئیاں پھردیاں ہین۔
چوتھے مصرعے وچ وارث شاہ اپنا شاعری دا کمال وکھالدیاں کہ تے کالیاں کنڈھیاں زلفاں ہے جیہڑیاں ہک تے بٹھا دتیاں گیاں ہین۔ پر لگدا انج ہے جو کوئی پریم دا کالا جنڈھلی ناگ کسے دی ہک تے بہہ گیا ہے تے اوس نوں ڈنگ رہیا ہے، ایہہ عشق تے پریم دی حالت دا بڑا سوہنا نقشہ کھچیا گیا ہے۔
اخیر تے بھابی اوس نوں چن دیور طعنے تے ٹھٹھولی نال کہ رہی ہے تے اپنے آپ نوں قربان کرنا وی ایس طعنے تے بولی مارن دا ڈھنگ ہے۔ کسے نوں کرودھ نال ''چن ' کہنا یا کوئی ہور تعریف کرنا دی پان پت پت لاہون لئی عام ڈھنگ ہے ۔
ایس بند وچ تے پہلیاں بنداں وچ ایہہ گل وچار یوگ ہے جو بھابیاں نوں ایس تے بہتا دکھ ہے جو پنڈ دیاں کڑیاں اوس تے مردیاں ہین۔ ظاہر گل ہے اوہ کھلے من والا کلاکار منڈا ہے تے ایہو جیہے منڈیاں تے پنڈ دیاں کڑیاں عاشق ہو ہی جاندیاں نیں۔ پر بھرجائیاں کیہہ کرن؟ اوہ اک تے اوسدے وڈھے بھراواں دیاں گھر والیاں ہین تے اوہ کجھ نہیں کر سکدیاں جیہڑیاں دوجیاں کڑیاں کر سکدیاں ہین۔
