اٹھکیلیا اہل دیوانیا وے، تھکاں موڈھیاں دے اتوں سٹنائیں چیرا بنھ کے بھنڑے وال چوپڑ، وچ ترنجناں پھیریاں گھتنائیں روٹی کھاندیاں لون جے پوے تھوڑا، چا انگنے دے وچ سٹنائیں کم کریں ناہیں، ہچھا کھائیں پہنیں، جڑ اپنی آپ توں پٹنا ئیں
مشکل لفظاں دے معنے
اٹھکیلا۔ چنچل ، شوخ، اٹھکیلیاں لین والا اہل۔ جوانی دا جوش، بہار دی خوشی اہل دیوانہ۔ جونی دے نشے نال مست تھکاںموڈھیاں اتوں سٹنا۔ غروریا ہویا ہونا، مطلب موڈھے توں تھک سٹن والا ایہہ نہیں ویکھدا جو اوس دے پچھے کون ہے جیس تے اوہ تھک پے سکدی ہے۔ چیرا۔ جوان منڈیاں دی لال رنگ دی یا دھاریاں والی پگڑی بھنڑے۔ اک وکھری خوشبو والے، چوپڑ۔ تر کر کے (تیل نال چوپڑ کے) بھنڑے وال چوپڑ۔نویں خوشبو والے تیل نال چوپڑے وال پھیریاں گھتنائیں۔ پھیریاں پاونا ایں۔ اپنی جڑ آپ پٹنا۔ اپنے آپ نوں برباد کرنا
سدھا مطلب توں اٹھکیلیاں کرنا ایں تے جوانی دے نشے وچ مست ہیں تے تینوں غرور چڑھیا ہویا اے (توں کسے دی پرواہ نہیں کردا) سرخ یا دھاریاں والی پگ بنھنا ایں، تے اپنے نویں طرحاں دی خوشبو والے یا نویں طرز نال رنگے ہوئے وال چوپڑ کے کڑیاں دیاں ترنجناں دوالے پھیرے ماردا رہنا ایں۔ جے روٹی کھاندیاں لون (نمک) گھٹ پیا ہووے تے توں [غصے نال] روٹی چونترے وچ وگا مارنا ایں۔ توں کم کردا نہیں تے کھانا پینا چنگا ہیں، تے ایہہ حیاتی دا ڈھنگ تیری بربادی ہے
کھلارواں مطلب ایہہ بند پچھلے بند ہی دوجا حصہ ہے جیس وچ وارث شاہ ہوراں بڑے ٹھکویں پنجابی محاریاں وچ اک غرورے ہوئے تے وگڑے ہوئے بندے دا مہاندرا الیکیا ہے۔ ظاہر گل رانجھا اوہ ہووے نہ ہووے بھابیاں اوس دا ایہو کردار پیش کرنا چاہندیاں ہیں تے اوس نوں جھوٹا کرن لئی اوس تے الزام لا رہیاں ہین۔
بھابیاں ایس گل تے پوچا پھیرن لئی (لکاون لئی) جو اوہناں دیاں خاونداں نے رانجھے کولوں بھوئیں کھوہ لئی ہوئی ہے ایہہ سارا بہتان بنا رہیاں ہین۔ مظلوم بندے تے اپنے آپ تے یا دوجیاں تے ظلم کرن دا بہتان لاونا (To blame the victim) پرانا تے ازمایا ہویا ڈھنگ اے۔
