بھل گئے ہاں وڑے ہاں آن ویہڑے سانوں بخش لے ڈارئیے واسطہ ای ہتھوں تیریوں دیس میں چھڈ جاساں رکھ گھر ہنسیاریئے واسطہ ای دینہ رات توں ظلم تے لک بدھا مڑیں روپ سنگھارئیے واسطہ ای نال حسن دے پھریں گمان لدی سمجھ مست ہنکارئیے واسطہ ای وارث شاہ نوں مار نہ بھاک بھرئیے انی منس دیے پیارئیے واسطہ ای
مشکل لفظاں دے معنے
ویہڑے۔ آنگن ، صحن، چونترا ڈارئیے۔ مکار، ڈالی، بنا ہتھے دے چاقو دا پرا، تیز دھار والی ہتھوں تیریوں۔ تیری وجہ توں دیس۔ ملک، علاقہ، جمن تھاں ہنسیارئیے۔ قتل کرن والی، ظالم دینہ۔ دن لک بدھا۔ تیار۔ کمر باندھی ہوئی روپ سنگھارئیے۔ حسن نال مارن والی ۔روپ نال شنگھاری ہوئی وی ہو سکدا ہے گمان۔ غرور گمان لدھی ۔ غرور نال لدھی ہوئی ، غرور نال بھری ہوئی مست۔ مستی وچ آئی ہوئی، مستی ہوئی ہنکارئیے۔ مغرور بھاگ بھری۔ ایہدا لفظی مطلب تے ہے خوش قسمت، بھاگ والی، نصیباں والی پر پنڈاں وچ عام وسدی رسدی دی زنانی لئی ورتیا جاندا ہے۔ جیویں عام جیہے بندیاں لئی الی، فتو، ماجھا گاما ہے منس۔ گھر والا۔ خاوند
سدھا مطلب اسیں بھل کے گھر دے چونترے تے آگئے ہاں سانوں ایس دا بخش دے تیرے دکھ پاروں، تیرے ستون پاروں میں اپنا وطن چھڈ جانا ہے تے توں ، ظالمے، قاتلے، ایہ گھر سنبھال لویں توں دنے راتیں ظلم کرن لئی تیار رہنی ایں، تیرا روپ ہی قتل کرن والا ہے توں حسن دے غرور نال لدی پھرنی ایں، توں مستی ہوئی تے مغرور ہین۔ توں گل نوں سمجھ وارث شاہ رانجھے دے مونہوں کہندا ہے، جو اپنے خاوند دئیے پیارئیے بھاگ بھرئیے سانوں نہ مار
کھلارواں مطلب
ایس بند وچ لگدا ہے جو رانجھا سے بھرجائیاں وچوں اوس نال گل کر رہیا ہے جیہڑی سوہنی اے تے اپنے حسن تے بڑا مان کردی ہے۔ ایس لئی ایس بند وچ اخیری تن مصرعیاں وچ سارا زور عور دے حسن نال جمن والے غرور تے ظلم اتے ہے۔ ایتھے وارث شاہ ایہہ وی دس رہیا ہے جو لوکاں وچ اک ہی طرحاں دے بھیڑ وکھریاں وکھریاں کارنا یا وجہاں توں پیدا ہوندے نیں۔ جے کر بھابی دے پچھلے بند (١٩) وچ بھیڑ دی جڑ چیتر چالاکی تے پیکیاں ولوں گوار ہونا دسیا گیا سی تے ایس بند وچ بھیڑ دی وجہ حسن تے روپ نال پیدا ہون والا غرور دسیا گیا ہے۔ مطلب بھڑے لوکاں دی ایکتا دی وجہ حسد ، لوبھ، چالاکی وی ہو سکدا ہے (جیویں پچھلے بنداں وچ دسیا) تے سوہنی شکل نال جمن والا غرور وی ہو سکدا ہے۔ سو اپنے حسن نال پیدا ہوون والا غرور وی اونے ہی بھیڑ پیدا کردا تے خطرناک ہے جنا لالچ تے حسد ۔ ایہ سب عادتاں وچوں اک ہی ہین۔
ایس بند دا اخیری مصرع واچا یوگ ہے۔ کیوں جے ایہہ مصرع ہے جیس توں کہانی گھڑی گئی جو وارث شاہ جیس کڑی تے عاشق سی اوس دا ناں بھاگ بھری سی ۔ گھڑی کہانی ایہہ ہے جو اوہ ملک ہانس دے جٹ قبیلے دی کڑی سی تے اوسے دی وجہ توں وارث شاہ ملکہ ہانس دی مسیت وچ ٹک کے ہیر رانجھے دی کہانی لکھدا رہیا۔ کہیا جاندا ہے جو کڑی دے بھراواں نوں پتہ لگ گیا تے اوہناں اوہدا ویاہ کر کے ٹور دتا۔
جے ایہہ سارا کجھ ایس مصرعے توں گھڑیا گیا ہے تے پھیر ایس کہانی وچ کوئی ساہ ست نہیں۔ کیوں جو ایہہ وارث شاہ دا انگ ہے جو بہتیاں تھاواں تے اوہ اخیری مصرعے وچ اپنے آپ نوں رانجھے دا سنگی بنا کے ڈائیلاگ نوں مکاوندا ہے۔ جیویں اگلے بند (٢٣) وچ اخیری مصرع ہے ''وارث شاہ نوں نال لے جائیکے تے جیہڑا داؤ لگے سو ای لا لیاویں'' ہن ایہدا ایہہ مطلب تے ہو نہیں سکدا جو رانجھا سچی مچی وارث شاہ نوں نال لے جا سکدا ہے۔۔۔۔
