Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> آکھیا وارث شاہ نے >> ہیر وارث شاہ: بند 103

ہیر وارث شاہ: بند 103

August 24th, 2009

مائی چاک تراہیا چا بابے ایس گل اُتے بہت خوشی ہونی
رب اوس نوں رزق ہے دین ہارا کوئی اوس دے رب نہ تُسی ہونی
مہیں پھرن خراب وچ بیلیاں دے اندر کھوہبیاں دے پھسو پھسی ہونی
وارث شاہ اولاد نہ مال رہسی جہدا حق کُھتھا اوہ تاں دکھی ہونی

اوکھے لفظاں دے معنی
تراہنا: ڈرا کے دور نسا دینا
کھوہبیاں: چیکڑ ، دلدل
کھتھا: کھویاگیا
دکھی : دکھیا، دل سڑیا

سدھا مطلب
(ہیر ماں نوں کہندی ہے) ماں بابے نے چاک نوں ڈرا کے نسا دتا ایس گل تے تہانوں ساریاں نوں خوشی ہونی چاہیدی ہے
تسیں اوس دے رب تھوڑا ہی ہو جو اوہدا رزق تہاڈے ہتھ وچ ہے، رب آپ اوس نوں رزق دین دی شکتی رکھدا ہے
ہن مجھاں جنگل وچ گواچیاں پھردیاں نیں تے یا کھوہبیاں اندر پھسیاں رہندیاں نیں۔
وارث شاہ دا کہنا ہے جو جے کسے دا حق کھوہیا جاوے تے اوہدے دکھ نال ہی اولاد تے مال کھس جاوے گا۔

کھلارواں مطلب
ہیر نوں وی اپنے ٹبر دیاں کمزوریاں دا ڈاہڈا پتہ ہے، اوس نوں وی پتہ ہے جو سیال تے اوہناں دے کامے مجھاں چارن جوگے نہیں رہ گئے، ایس لئی ہُن اوہ اپنی ماں نوں ہنورا ماردیاں کہندی ہے جو پیو نے چاک نوں دھمکا کے کم توں نسا دتا سی۔ ایس گل تے تے تہانوں تے بہت خوش ہونا چاہیدا ہے۔ ہیر نوں ایہہ وی پتہ ہے جو اوس دی ماں نے وی اوہدے پیو نوں چکیا سی رانجھے نوں نوکری توں کڈھن لئی۔ ہیر دی ماں نے ہی چوچک نوں کہیا سی:

"کڈھ چاک نوں کھوہ لے مہیں سبھے اَساں چاک تھوں جیو بیزار کیتا" ایس لئی ہن ہیر دا مہنا بندا ہے۔

ہیر اپنے معنے نوں ہور ترکھا کرن لئی رزق دی گل کرنا شروع کر دیندی ہے۔ ظاہر تے اوہ ایہہ کہہ رہی ہے جو رب رزق دے دین والا ہے تے چوچک رب نہیں ہے جو اوہ رانجھے دا رزق کھوہ لوے گا۔ پر گوہ نال ویکھو تے ہیر رزق نال رب نوں جوڑدی ہے، رب اوہ ہے جیہڑا پیدا کردا ہے تے کاما وی اوہ ہے جیہڑا پیدا کردا ہے۔ سو ایس لئی کاما رب دی شکتی دا کُھلا وکھالا ہے۔ رانجھے وچ اوہ شکتی ہے تے چوچک ایہہ شکتی اوس کولوں کھوہ نہیں سکدا۔ سگوں چوچک یا سیالاں نوں رب نہ کہہ کے ہیر اوہناں نوں رزق پیدا کرن دی شکتی توں وانجھیا کہہ رہی ہے۔ ظاہر گل ہے شاعر عام زبان تے عام لفظاں وچ ہی گل کردا ہے پر اوہ لفظاں دی کھیڈ وچ وچلی گل کہہ جاندا ہے۔

ہیر سیالاں دے سماج دے ہینے تے بے طاقتے ہوون نوں مجھاں دے بیلیاں وچ رلن تے چکڑ وچ پھسن راہیں اگھیڑ رہی ہے۔ یاد رہوے جو کدی کدی مجھاں اجیہے چکڑ وچ پھسدیاں ہین جو اوس وچوں آپ نہیں نکل سکدیاں تے اوس لئی زورا ور تے جانو لوکاں دی لوڑ پیندی ہے۔ اسیں ایس توں پہلے بند وچ ویکھ چکے ہاں جو ایہہ زور تے جانکاری نہ سیالاں کول ہے تے نہ ہی اوہناں دے بھاڑے دے کامیاں کول کیوں جو اوہناں دے کامے وی مار کھا کھا کے پولے پے گئے ہوئے نیں۔ بہت ویلے حاکم میل اپنے کھسی پن نال کامیاں نوں وی کجھ کرن جوگا نہیں چھڈدا تے نظام ڈھیہ جاندا ہے۔ ایہہ اوہ طعنہ ہے جیہڑا ہیر ایس مصرعے وچ مار رہی ہے۔

چوتھے مصرعے وچ وی ہیر اک طرحاں ایسے گل نوں ودھا رہی ہے، جو حق کھوہن والے اخیر اپنی اولاد تے مال وی گوا دیندے ہین۔ سیالاں دا سماج لوکاں دا، کامیاں دا حق کھوہ کھوہ کے ایڈا تھوتھا پے گیا ہویا ہے جو ہن اوہناں دا مال تے اوہناں دی اولاد کھسنی لازمی ہو گئی ہے۔ ہیر دی شکل وچ سیال اولاد تے پہلاں ہی ہتھوں گواہ بیٹھے ہین تے ہن اپنے رزق دے ذریعے مجھاں نوں گوا رہے ہین۔

حاکم میل ایہہ سدا کردا ہے تے اوس دا سٹا وی سدا ایہو نکلدا ہے۔ جے تاریخ تے ویکھو تے کیہ ایہہ صاف نہیں ہو جاندا لوکاں دا حق کھوہن والے بادشاہاں تے راجے نہ اولاد بچا سکے تے نہ ہی مال۔ دور نہ جاؤ مغل شاہی نوں ہی ویکھ لوو۔ کتھے نیں اج اوہناں دا مال تے اولاد؟ پچھلے دناں وچ اخبار وچ اک خبر سی جو اخیری مغل شہنشاہ بہادر شاہ ظفر دی پڑپوتی کسے جھگی وچ بھکھی مر رہی ہے تے حکومت کولوں رحم ہیٹھ نوکری منگ رہی ہے۔

ہیر وی ایس تاریخ تے ربی قانون دا حوالہ دے رہی ہے۔ جو رانجھے دا حق کھوہ کے اوہناں دی وی اولاد مال نہیں بچے گا۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels