Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> آکھیا وارث شاہ نے >> ہیر وارث شاہ: بند 105

ہیر وارث شاہ: بند 105

September 5th, 2009

چُوچک آکھیا جا منا اس نوں ویاہ تِیک تاں مہیں چرا لئیے
جَدوں ہیر ڈولی پا ٹور دئیے رُس پوے جواب تاں چا دئیے
ساڈی دِھیو دا کُجھ نہ لاَہ لیندا سبھا ٹہل ٹکور کرا لئیے
وارث شاہ اَسیں جَٹ ہاں سدا کھوٹے جٹکا پھند ایتھے ہِک لا لئیے

اوکھے لفظاں دے معنے
ٹہل ٹکور: سیوا۔ فند: فریب۔ ہک: ایک۔

سدھا مطلب
چوچک اپنی بیوی، ہیر دی ماں ملکی نوں کہندا ہے جو اوس (رانجھے) نوں منا کے واپس لے آ تاں جو ہیر دے ویاہ تیکر تاں مجھاں چروا لئیے
جدوں ہیر ڈولی وچ بہہ کے چلی گئی، فیر جے اوس گل تے رُسے گا تے اسیں نوکری توں جواب دے دیواں گے۔
ساڈی دھی دا کجھ نہیں لتھدا، جنی ہو سکے سیوا کروا لئیے۔
وارث شاہ کہندا ہے جو جٹ کہندے نیں (اوہناں نوں پتہ ہے ) کہ اسیں سدا دے کھوٹے ہاں تے ایتھے وی وی اک جٹکا دا لا لئیے۔

کھلارواں مطلب
پچھلے بند وچ جو گل ہیر دی ماں ملکی نے ولیھٹ کے تے مذہبی چولا پوا کے کہی سی چوچک اوس دا ترجمہ کر کے اوسے گل نوں کھول کے دسدا ہے۔ دوہیں میاں بیوی گل اک ہی کر رہے نیں کیوں جو دوہاں نوں پتہ ہے کہ مڈھلی گل تے ایہہ ہے جو ہور کوئی مجھاں چار نہیں سکدا تے مجھاں بنا اوہناں دا رزق یا چوہدراہٹ کوئی نہیں ۔سو مڈھلا مسئلہ معاشی لوڑ ہے۔ اوس دا حل حاکم میل دی اک زنانی روحانی چادر وچ ولھیٹ کے کڈھنا چاہندی ہے تے مرد اوس دا روحانی دا برقعہ لاہ کے کھردری تے کوری زبان وچ کہہ دیندا ہے۔

ایہناں دو بنداں وچ وارث شاہ دے ناٹک تے وچاردھارا دے استاد ہون دا پتہ لگدا ہے۔ اوہ مسئلے دا مڈھ معاشی لوڑاں نوں دس کے اوس دی نینہہ تے اسردی زبان، مذہبی تے فلسفیانہ وچار دھارا دی اساری دے عمل نوں بڑے سدھ پدھرے لفظاں وچ بیان کر جاندا ہے۔ سگوں اوہ ایڈے پدھرے تے سرل سبھاء نال دو بنداں وچ جگت سچ بارے ایڈی ڈوہنگی گل کر جاندا ہے جو عام پڑھیار ناٹک وچ مست ہویا تلک کے اگے چلا جاندا ہے۔

ہیر دی ماں نے بڑا گھما کے لوکاں دیاں بد دعاواں دا ذکر کرکے رانجھے نوں فقر دے رتبے تے بٹھا کے اپنے گھر والے نوں کہیا سی جو اوس دے پیریں پے کے منا کے موڑ لیا۔ پر چوچک اپنی مچھ اُچی رکھن لئی وی اپنی بیوی نوں کہندا ہے جو اوہ رانجھے دے پیریں پے کے منا کے نہیں لیانا چاہندا۔ سگوں اوہ جا کے پھپھے کٹنیاں والے دا پیچ لڑا کے اوس نوں موڑ لیاوے کیوں جو چار دن ہور مجھاں چروائیاں جا سکن۔

دوجے مصرعے وچ "ساڈی دھی دا کجھ نہ لاہ لیندا" کہ کے چوچک حاکم میل دے لالچ تے اوس دی جھوٹی ریت تے آن بان دا اصل وکھا دیندا ہے۔ مطلب جے رانجھا ساڈی دھی نال عشق لڑا وی رہیا ہے تے فیر کیہ۔ مڈھلی لوڑ مجھاں دا چرنا تے مفت دی محنت دی ورتوں ہے۔ سو حاکم میل محنتیاں نوں مفت ورتن لئی اپنیاں دھیاں وی ورت لیندے ہین۔ ہو سکدا ہے کجھ پڑھیاراں نوں ایہہ مصرعہ غیر لگدا ہووے تے اوہ سوچن بئی کوئی وی پیو ایہہ کیویں کہہ سکدا ہے ، پر وارث شاہ تے زبان راہیں اوہ کہوا رہیا ہے جو چوچک دے دل وچ ہے تے اصل گل ہے۔

چوچک نوں ایہہ وی پتہ ہے جو اوہ ٹھگی کر رہیا ہے تے اوس نے ہیر نوں کتے ہور ویاہ دینا ہے، پر اوس تے معاشی لوڑ دا بھار اینا ہے جو اوہ ویلا ٹپاون لئی رانجھے نوں فیر لارے تے رکھ کے کم کروانا چاہندا ہے۔ اوہ ایہہ وی جاندا ہے جو رانجھا ہیر دے ڈولی چڑھن توں بعد کم نہیں کرے گا پر اوس دی جاچ وچ اونا چر مفت دا کم کروا لینا بہتا چنگا ہے۔

اخیری مصرعے وچ وارث شاہ جٹ ذات دی نہیں پورے حکمران ٹولے دی گل کر رہیا ہے۔ اک تے اوس ویلے پنجاب وچ تے خاص طور تے جھنگ ولے جٹ ہی سردار سن تے دوجے ناٹک وچ سیال جٹ ہی حاکم وکھائے گئے سن ایس لئی وارث شاہ ڈائیلاگ وچ جٹ ورتدا ہے۔ پر اوس دا مطلب ایہو ہے جو حاکم میل سدا ہی کھوٹا ہے تے رانجھے نوں موڑ لیا کے مجھاں چروان وچ حاکم میل سدا دا ازمایا فن فریب ورتن جا رہیا ہے۔ وارث شاہ "سدا" دے لفظ نال حاکم میل دی صدیاں بدھی ریت نوں ننگا کر رہیا ہے۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels