Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> آکھیا وارث شاہ نے >> ہیر وارث شاہ بند ٢٤

ہیر وارث شاہ بند ٢٤

May 20th, 2007

نڈھی سیالاں دی ویاہ کے لیاوساں میں کرو بولیاں اتے ٹھٹھولیاں نی
بہے گھت پیڑھا وانگ مہریاں دیہوون تساں جہیاں اگے گولیاں نی
مجھو واہ وچ بوڑئیے بھابیاں ہوون تساں جہیاں بڑبولیاں نی
بس کرو بھابی اسیں رج رہے بھر دتیاں جے سانوں جھولیاں نی


مشکل لفظاں دے معنے

بولیاں۔ مہنے، طعنے
ٹھٹھولیاں۔ مذاق ، ٹھٹھہ
پیڑھا۔ کرسی طرحاں دا بہن لئی چوکی، عام لوک پیڑھی تے بہندے نیں تے وڈھے لوک پیڑھے تے
مہریاں۔ سردارنیاں، ملکہ، رانیاں
گولیاں۔ باندی، کنیز ، غلام
مجھو واہ۔ مجھ دا مطلب ہے وچکار جیویں منجدھار، واہ دے معنے ہین ، وگنا (پانی دا دا کسے وی شے دا چلنا)۔ مجھو واہ، دا مطلب ہے وگدے پانی دے عین وچکار
بوڑئیے۔ ڈھوئیے
بڑبولیاں۔ وڈا بول بولن والیاں، جیوں اردو وچ ہے ''بڑ مارنا'' ۔ شاید بڑھک وی ایس توں ہی نکلیا ہے تے پھڑ مارنا دا اصل وی بڑ مارنا ہی ہووے گی۔ ایتھے مطلب ہے بھری محفل وچ گلاں دسن والی
رج رہے۔ رج گئے ، انگریزی وچ ایس لئی عین ٹھکواں اظہار ہے
Fed-up، مطلب ہن اسیں تہاڈے توں نکو نک آگئے

سدھا مطلب

[رانجھا کہندا] تسیں طعنے مار لوو تے ٹھٹھے کر لو، پر میں ہن سیالاں دی کڑی (ہیر) ہی ویاہ کے لیاواں گا۔
اوہ جد ایتھے آوے گی، تے سردارنیاں وانگ پیڑھا ڈاہ کے بہوے گی تے تہاڈے جیہیاں اوس دے ساہمنے باندیاں وانگ لگن گیاں۔
بھابیاں وگدے دریا دے عین وچکار (منجدھار) وچ ڈوب دینا چاہیدا ہے ، کیوں جے ایہہ بڑیاں بڑبولیاں نیں۔
بھابھی تسیں ہن بس کرو اسیں تہاڈے کولوں رج ہٹے، ہن تہاڈے کولوں نکو نک آگئے ہاں ، تسیں ساڈیاں جھولیاں بھر دتیاں جے

کھلارواں مطلب

بند ٢٤ دے وچ ہی رانجھے نے اعلان کردتا سی جو اج میرے تے طعنیاں دے تیر چلائے جا رہے نیں تے میرا ٹھٹھہ بنایا جا رہیا جو میں ہیر سیال ویاہ کے نہیں لیا سکدا۔ پر میں ہن اوس نوں ہی ویاہ کے لیاواں گا۔ اوہ آوے گی سردارنیاں تے رانیاں وانگ پیڑھے تے بیٹھے گی تے تسیں اوہدے سامنے باندیاں تے کنیزاں لگو گیاں۔

ایس بند دے تریجے چوتھے مصرعے وچ رانجھا بھابیاں توں اک جان دا وکھالا کردا ہے تے اوہناں کولوں پوری طرحاں نراش ہو جاندا ہے۔

ایس بند دے دوجے مصرعے توں لگدا ہے جو اجے رانجھا صرف ہیر نوں بھابیاں دی ضد وچ ویاہون جا رہیا ہے تے اوہناں توں اتے بٹھاون دا سوچ رہیا ہے۔ مطلب اوس سماج وچ ہی مقابلہ کرن لئی اک ہور ڈھنگ ورتن جا رہیا ہے۔

ایس مصرعے نوں دوطرحاں ویکھیا جا سکدا ہے، اک ایہہ جو وارث شاہ اک سماجی ڈرامہ وی کروا رہیا ہے تے اوس دا مڈھلا کردار ایتھے ایہو کجھ کہ سکدا ہے۔ دوجا ایہہ وی ہے جو بغاوت یا نابری سماج وچ اچا جاں دی سدھر توں وی پیدا ہوندی ہے، تے سماج گھیر وچ پھسے ہوئے چنگے بھلے بندے وی ایس مقابلے دی علت توں بچ نہیں سکدے، یا بہت واری مقابلے بازی دی جھلن وچ تلک کے ڈگ پیندے ہین۔ پر جدوں نابر میدان وچ سماج نال لڑدے ہین تے اوہناں دی ہوند بدل جاندی ہے، اوہ پھیر مقابلہ کرن لئی نہیں مقابلے دا سماج مکاون ول ٹر پیندے ہین۔ خواجہ فرید ہوراں ایس پوری گل نوں انج کہیا ہے ۔

آیاں پیلو چنن دے سانگے، اوڑک تھیاں فریدن وانگے
چھوڑ آرام قرار ہکیاں بکیاں نی وے
آ چنو رل یار، پیلو پکیاں وے


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels