Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> آکھیا وارث شاہ نے >> ہیروارث شاہ بند ٢٥

ہیروارث شاہ بند ٢٥

May 20th, 2007

کیہا بھڑ مچایوئی لچیا وے، متھا ڈاہیوای سوکناں ونگ کیہا
جا سجرا کم گوا ناہیں، ہو جاسیا جوبنا پھیر بیہا
رانجھے کھا غصہ سر دھول ماری، کیہی چنبڑی ان نوں وانگ لیہا
تسیں دیس رکھو اسیں چھڈ چلے ، لاہ جھگڑا بھابییے گل ایہا
ہتھ پکڑ کے جتیاں مار بکل ، رانجھا ہو ٹریا وارث شاہ جیہا


مشکل لفظاں دے معنے
بھیڑ مچانا۔ ٹکر مارنا، ٹکراں دا مقابلہ کرنا یا کروانا
لچیا۔ بدمعاش، بے شرم، آوارہ
متھا ڈاہنا یا متھا لانا۔ مقابلہ کرنا، آمنے سامنے ہونا
سوکن۔ خاوند دی دوجی بیوی
سجرا۔ تازہ
ہو جاسیا۔ ہو جاوے گا
جوبنا۔ جوانی
بیہا۔ باسی
دھول مارنا۔ بانہہ نال کسے دے سر نوں پچھوں مارنا، دھکا دینا
لیہا۔ اُن یا ریشم دے کپڑے نوں کھاون والا کیڑا
چنبڑی ان نوں جویں لیہا۔ جیویں اُن (دے کپڑے نوں ) نوں لیہ لگ جاندی ہے، کیڑا چمبڑ جاندا ہے۔ ایہہ کیڑا ہولی ہولی وچوں وچ کپڑے نوں کھا جاندا ہے
دیس۔ ملک، تھاں
پکڑ کے جتیاں۔ پرانے ویلیاں وچ سگوں کجھ دھاکے پہلاں تائیں پنڈاں دے لوک جتیاں ہتھ وچ یا کچھ وچ رکھ کے پینڈا کردے سن۔ ایہہ ایس لئی جو جتی گھس نہ جاوے ۔ اوہ جتی نوں بہت اوکھے ویلے یا پروہن چاری کرن والیاں دے پنڈ یا گھر دے لاگے جاکے جتیاں پاوندے سن۔

سدھا مطلب

توں بدمعاش لفنگیا کیہو جیہی ٹکر لےرہیاں ایں ، توں کیوں سوکناں وانگ ساڈے نال مقابلہ کر رہیا ایں۔
جا چھیتی جا سجرے سجرے ایس کم تے چلا جا نہیں تے تیری جوانی پرانی تے بیہی ہو جاوے گی۔
رانجھے نوں ایس گل تے بڑا غصہ آیا تے اوس بھابی نوں دھول مار کے کہیا جو توں انج پچھے پے گئی ہیں جیویں ان نوں لیہہ یعنی کیڑا چمبڑ جاندا ہے۔
تسیں اپنا دیس (بستی) اپنے کول رکھو تے اسیں ایتھوں چھڈ چلے آں۔ ہن ایہہ جھگڑا ہی لاہ لے بھابئے
[رانجھے نے ہتھ وچ جتیاں پھڑیا، بکل ماری تے وارث شاہ وانگوں اوتھوں چلدا بنیا۔

کھلارواں مطلب

ایس بند وچ بھابیاں اپنے مہنے تے ٹھٹھے دے ڈھنگ وچ ہی اوس نوں کہندیاں ہین جو توں لچیاں وانگ ٹکر لئی آ تے سوکناں وانگ آہڈا لا یا ہےتوں جا ، سگوں چھیتی جا، اجے تیری نویں جوانی اے پھیر کتے بڈھا ہو گیوں تے کیہہ کریں گا۔

تیجے مصرعے وچ رانجھا بھابی نوں دھول مار کے بڑی مڈھلی گل کہندا ہے ، جو بھابیاں یا اوہناں ورگے لوک سماج نوں کیڑے وانگ چمبڑے ہوئے ہولی ہولی چٹ کری جا رہے ہین۔ سماج آپ تے شاید اُن وانگ نرم تے گرمائش دین والا ہے پر ایس طرحاں دے لوھ ایس نوں لیہہ دے کیڑے دی طرحاں ہولی ہولی کھائی جا رہے ہین ۔ مطلب ایس طرحاں دے لوکاں نے سماج نوں وچوں کھدا کر دتا ہویا اے۔

تے چوتھے مصرعے وچ اوس گل دی دہرائی ہے یعنی ایس طرحاں دا اندروں کیڑیاں کھاہدا سماج تسیں اپنے کول ہی رکھو۔ ایہو جیہے سماج تے جھگڑا کیہ کرنا، سو اسیں جھگڑا مکا کے جارہے ہاں۔

اخیری مصرعے وچ وارث شاہ رانجھے نوں اپنے ہار دس کے کہندا ہے جو اوتھوں جان لگا کجھ لے کے نہیں جا رہیا، سوائے پیر دیاں جتیاں دے تے بکل والے کپڑے دے۔ ''مار بکل'' توں انج لگدا ہے جو رانجھا اوس سماج دا دتاسارا دکھ تے درد اپنے اندر ولھیٹ کے ٹریا ہے۔

وارث شاہ نوں وی ویکھو۔ اوہ ملکہ ہانس دی مسیت وچ بہہ کے ایناں چر کیوں لکھدا رہیا، اوہ ایہہ کم اپنے دیس جنڈیالہ شیرخاں وچ کیوں نہیں سی کر رہیا؟ اوہ کیہڑے کارن سن جیس اوہنوں شیخوپورے دے جنڈیالہ شیر خان توں کڈھ کے ساہیوال دے قصبے ملکہ ہانس وچ سٹیا ہویا سی؟ ایس لئی جدوں وارث شاہ کہندا ہے ''رانجھا ہوٹریا وارث شاہ جیہا'' تے ایس وچ کجھ وارث شاہ دی اپنی حیاتی وی جھلک ماردی ہے۔۔۔۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels