Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> آکھیا وارث شاہ نے >> ہیر وارث شاہ بند ٢٦

ہیر وارث شاہ بند ٢٦

May 23rd, 2007

خبر بھائیاں نوں لوکاں جا دتی، دھیدو رس ہزاریوں چلیاجے
ہل واہنا اوس توں ہوئے ناہیں، مار بولیاں بھابیاں سلیاجے
پکڑ راہ ٹریا، ہنجو نین عوون، جویں ندی دا نیر اچلیاجے
اگے ویر دے واسطے بھائیاں نے ادھواٹیوں راہ جا ملیاجے


مشکل لفظاں دے معنے

بولیاں ۔ مہنے
سلیا۔ چھیک یا سوراخ کر دینا۔تیر دا آر پار لنگھ جانا
نیر۔ پانی، ندی دا نیر، ندی دا پانی
اچھلیا۔بھری ہوئی کسے شے چوں ڈھل کے باہر ڈگنا
ویر۔ بھرا
ادھواٹیوں۔ ادھے رستے وچوں
راہ ملنا۔ راہ روک لینا

سدھا مطلب

لوکاں بھائیاں نوں خبر پہنچا دتی جو دھیدو تے رس کے تخت ہزاریوں چلا چلیا اے۔
اوس کولوں ہل وگدا نہیں تے اتوں بھابیاں بولیاں مار مار کے اوس دا دل چھیک دتا ہے (دل وچ سوراخ کر دتے ہین)
اوہ ٹریا جاندا ہے تے اوہدیاں اکھاں وچوں اتھرو وگدے جاندے نیں۔ اوہ انج روندا جاندا ہے یا اوس دیاں اکھاں وچوں انج اتھرو وگ رہے ہین جیویں کسے ندی توں پانی اچھل کے باہر ڈگن لگ پوے۔ مطلب بہت ہی رو رہیا ہے۔
اپنے بھرا لئی مطلب رانجھے لئی ادھے رستے وچ جا کے راہ روک لیا۔

کھلارواں مطلب

ویکھن نوں ایہہ بند بڑا سدھا سدھا جاپدا ہے جیس وچ لوکیں بھراواں نوں جا کے دسدے ہین جو اوہناں دا نکا بھرا دھیدو رس کے چلیا ہے۔ اوہ ایس لئی جا رہیا ہے جو اوس توں ہل وگدا نہیں تے بھابیاں طعنے مہنے مار کے اوس دا دل چھاننی کر چھڈیا اے ۔ اوہ ٹریا جاندا ہے پر بڑا ہی رو رہیا ہے جیویں ندی باہر اچھلن لگ پوے۔ ایس نوں سن کے بھائی اوس نوں رستے وچ جا ڈکدے ہین۔

پر ایتھے ایہہ ویکھو جو جدوں بھائیاں قاضی تے پینچاں نوں وڈھی دے کے بھوئیں اپنے ناں لوا لئی سی ،بنجر زمیں رانجھے نوں دے دتی سی تے ایہو اوہ لوک سن جنہاں بارے کہیا گیا سی جو ''کچھاں مار شریک مذاق کردے'' تے ''مگر جٹ تے پھکڑی لاہی آہی'' پر ہن جدوں رانجھا کھیڈ مکا ٹر پیا ہے تے لوکاں دوجا پینترا پھڑیا ہے۔

ہن اوہو لوک بھائیاں نوں چھڑی خبر ہی نہیں دے رہے اوہناں نوں جتا وی رہے ہین جو تساں اپنا نکا بھرا دیسوں کڈھ دتا ہے۔ اوہو شریک ہن پٹھی چھری ہوکے بھراواں دے خلاف وگ رہے ہین تے بھراواں نوں طعنے مارن لئی دس رہے ہین جو کیہ ہویا اوس کولوں ہل نہیں سی وگدا پر ایہہ وی تے چنگا نہیں سی جو بھرجائیاں اوس دا دل چھاننی کر دیندیاں!

پھیر لوکیں بھراواں نوں ہور جھوٹا کرن لئی اوس دے زار زار رون دا نقشہ وی کھچدے نیں ۔ اوہ ایہہ دسن لئی بئی تسیں کاہدے بھرا ہو جنہاں دا نکا ویر انج روندا کرلاوندا گھر چھڈ کے چلا جاوے۔ایہو گل سن کے بھرا اوس نوں ڈکن لئی پہنچ جاندے نیں۔
سماج وچ ایہہ ڈرامہ روز ہوندا ہے ، لوک مظلوم دا ٹھٹھہ بناوندے ہین اوس دے ماڑے ہوون تے اوس دی پھکڑی لاوندے ہین پرجے اوہ ماڑا کھیڈ چھڈ کے تر پوے تے اوہو لوک دھرو کرن والیاں نوں چھبیاں دین دی کھیڈ شروع کر دیندے نیں۔ پینڈو سماج وچ تے شریک کم ہی ایہہ کردے نیں، جو پہلاں دھیدو نوں مذاق کردے نیں تے پھیر بھراواں نوں بولیاں مارن لئی تیار ہین۔

ایس کھیڈ دی وارث شاہ نوں بڑی سار سمجھ ہے۔ ایس لئی اگے جا کے ویکھو گے جو اوہ رانجھے کولوں کہاوندا ہے:
''وچوں خوشی ہو اساں دے نکلنے تے مونہوں آکھدے گل کیوں سنگدے ہو''


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels