Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> آکھیا وارث شاہ نے >> ہیروارث شاہ بند ٢٧

ہیروارث شاہ بند ٢٧

May 23rd, 2007

روح چھڈ قلبوت جیوں وداع ہوندا، تویں ایہ درویش سدھاریا ای
ان پانی ہزارے دا قسم کرکے قصد جھنگ سیال چتاریا ای
کیتا رزق تے آب اداس رانجھا چلو چل ہی جیو پکاریا ای
کچھے ونجھلی مار کے رواں ہویا وارث وطن تے دیس وساریا ای

مشکل لفظاں دے معنے
درویش۔ فارسی تے پرانی فارسی دا اکھر اے پہلوی ماخذ وی ہو سکدا اے ۔ سنسکرت نال وی ایس اکھر دا جوڑ اے۔ درویش جیہڑا کجھ وی نہ ہوئے جس دا کوئی دعوای نہ ہوئے کوئی
claim کوئی سماجی رُتبہ نہ ہوے جیہڑا آپ کجھ نہیں ۔ در توں باہر واس اے ' در واس۔ جیہڑا صدا لاوندا اے ۔ منگ کے کھاونا۔ خانقائی رہتل وچ درویش دی قدر ودھی۔ مڑ جیہڑے selfless ہو گے اوہناں غریبی اپنا لئ۔
قلبوت۔ ڈھانچہ
رُوح قلبوُت۔ بندے دی ونڈ
body and mind وچ کر دتی۔ڈیکارٹ نے ایس نوں ہور ودھایا تے اصلوں ایہہ ونڈ اوہدوں واپری جد نجی مالکی آئی اک کم کرن آلے تے اک کھان آلے سن۔
وداع۔ چھڈ جانا،
سدھاریا۔ چلا گیا، ٹر پیا
ان۔ اناج۔ کھانا، ان پانی۔ کھانا پینا
قسم کر کے۔ اپنے آپ تے حرام کرکے، مطلب قسم کھالئی جو ہن ایتھوں دا دانا پانی نہیں کھانا
قصد۔ ارادہ ، نیت
چتاریا۔ تصور بنا لیا،
رزق۔ کھاون پیون
آب۔ پانی
اداس۔ رنج کرنا، بے تعلق ہو جانا
کچھے۔ بغل
رواں ۔ روانہ، چلاواں
وطن ۔ وطن۔
technical اکھر اے ۔ کسے علاقے دا ڈومی سائل۔ رانجھا ذات دا متوطن موضہ ہزارہ۔ منصب دار
راوں ہویا ۔ جاری ہونا ۔
to be in motiom , on the move
دیس۔ آبادی دی تھاں
وسارنا۔ بھلا دینا

سدھا طلب

جیویں ڈھانچے نوں (مطلب انسانی جسے نوں ) روح چھڈ جاندی ہے، اونویں ہی ایہہ درویش اوتھوں (تخت ہزارایوں) سدھار گیا
اوس نے تخت ہزارے دا کھانا پینا اپنے آپ تے حرام کر لیا تے دل وچ جنھگ سیال دا ٹسور کر کے اوتھے جان دی نیت بنھ لئی
[تخت ہزارے دے] کھاون تے پیون توں تعلق توڑ لیا تے اوس دے دل نے کہیا ہن بس ایتھوں چلا چل۔
اوہ اپنی ونجھلی تے کچھ وچ مار کے نال لے گیا پر اوس اپنا دیس تے وطن بھلا دتا۔

کھلارواں مطلب
ایہہ بند کہانی توں باہر وی ہے تے اندر وی۔ باہر ایس طرحاں جو ایہہ کرداراں دے وچکار گل باتت ا اوہناں دے جوڑ یا اجوڑ بارے نہیں۔ اندر ایس لئی جو وارث شاہ ایتھے رک کے کہانی تے اوس دے مڈھلے کردار رانجھے دا ہی تت نکھیڑ رہیا ہے۔ اوہ کہہ ایہہ رہیا ہے جو پڑھن والیو، میں تہانوں اک سماجی ڈرامہ وکھا رہیا ساں ۔ اوس وچ میرا مڈھلا کردار وی کئی اوہو جیہیاں گلاں کر رہیا سی یا میں کروا رہیا ساں جو سماجی ڈرامے وچ ہوندیاں نیں ۔ پر ہن رکو، میں تہانوں اوس کردار دے تت تے چانن پاونداں ہاں۔
تے تت ایہ ہے جو رانجھا اک درویش سی جیہڑا تخت ہزارے نوں انج ہی چھڈ کے جا رہیا ہے جیویں روح قلبوت یا جسے دے ڈھانچے نوں چھڈ جاندی ہے۔اوہ تخت ہزارے دے وسیب دے ڈھانچے وچ اک کلی روح سی جیہڑی اوس نوں تیاگ کے جا رہی ہے، مطلب پچھے صرف مردہ قلبوت رہ گیا ہے۔
جد روح قلبوت یا جسم نوں چھڈ دیندی ہے تے قلبوت بے کار ہو جاندا ہے، جسم گلنا سڑنا شروع ہو جاندا ہے تے اخیر مٹی وچ مٹی ہوجاندا ہے۔ رانجھا تخت ہزارے دے مردہ ڈھانچے دی روح سی، جے اوہ چھڈ تریا ہے تے پچھے صرف گلن سڑن والا ڈھانچہ رہ گیا ہے۔
قلبوت توں مراد سماجی ڈھانچہ وی ہے۔ مطلب تخت ہزارے دا قلبوت اوس دا سماجی ڈھانچہ ہے جیس وچ رانجھے نے روح دی پھوکنی ماری سی، پر اوس نوں کڈھ دتا گیا۔ پچھے تخت ہزارے دا ڈھانچہ اک بے جان گلیا سڑےا نظام ہے۔
ایس مصرعے توں ایہہ وی ظاہر ہوندا ہے جو رانجھے دا تخت ہزارے نوں چھڈنا اک جیون نوں مکاونا ہے۔ اوس جیون وچ ٹبر، دیس تے وطن دیاں بندشاں سن اوس دا موہ سی، پر جدوں اوہ اوس نے چھڈ کے تر پیا تے اوہ اوس لئی اوہ سماج سدا لئی مر گیا تے اوہ سماج وی اوہدے لئی مر گیا۔ ہن اوس دا نواں جیون شروع ہوندا ہے جیس وچ اوس کول نہ وطن ہے نہ دیس بس اک ونجھلی ہے۔ اگے جا کے وارث شاہ ہوراں اک ہور تھاں تے وی ایس گل نوں دہرایا ہے
جیہڑا دیس تے وطن دا دھیان رکھے، دنیا دار ہے اوہ درویش کیہا
پھیر ایہہ وی ہے جو روح قلبوت وچ مڑ کے نہیں آسکدی، ایس لئی رانجھا وی کدی مڑ کے نہیں آسکدا۔ جد کدی آوے گا (جیویں کہانی دے اخیری حصے وچ اوہ مڑ کے آوندا ہے) تے اوہ جیوندا نہیں رہوے گا۔ جے روح مردہ قلبوت ول پھیر آوے وی تے اوس وچ نہ وڑ سکدی ہے تے نہ رہ سکدی ہے۔ ایس لئی رانجھا وی تخت ہزارے آکے مرے ہی مرے۔
دوجے تے تریجے مصرعے وچ رانجھے دے تخت ہزارے نوں تیاگن دا ذکر ہے۔ یعنی ہن اوس نے تخت ہزارے دی روٹی پانی تے جیوندیاں رہن نوں تیاگ دتا ہے، اوس نوں نہ ورتن دی قسم کھا لئی ہے۔
رانجھا تخت ہزارے توں صرف اک شے لے کے جارہیا ہے تے اوہ ہے اوس دی ونجھلی، جیہڑی دل دی ہوک نال وجدی ہے۔ تے ایہہ ہوک اوہ اپنے نال لے گیا ہے، باقی اوس نے وطن تے دیس نوں اپنے آپ وچوں کارج کر دتا ہے۔

پروفیسر زبیر احمد ہوراں دا سودھی ہوئی ٹیکسٹ تے کجھ لفظاں دے معنے گھلن دا شکریہ۔




Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels