Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> آکھیا وارث شاہ نے >> ہیر وارث شاہ: بند 106

ہیر وارث شاہ: بند 106

September 9th, 2009

مَلکی جا ویہڑے وچ پُچھدی ہے ویہڑا جیہڑا بھائیاں سانویاں دا
ساڈے ماہی دی خبر ہے کتے اَڑیو کدھر ماریا گیا پچھو تاویاں دا
ذرا ہیر کُڑی اونہوں سد دِی ہے رنگ دھو دیوے پلنگ دے پاویاں دا
رانجھا بولیا ستَھروں بھن آکڑ ایہہ جے پیا سردار نَتھاویاں دا
سِر پٹے صفا کر ہو رہیا جیہا بالکا مُنیا باویاں دا
وارث شاہ جیوں چور نوں ملے واہر اُبھے ساہ بھردا ماریا ہاویاں دا

اوکھے لفظاں دے معنے

ساویاں: ساہمنے والیاں دا۔ تھروں: زمین تے وچھیا تیکھیاں دا بسترا۔ نتھاویاں: بے گھر، بے ٹھکانہ۔ باویاں دا: جوگیاں دا۔ بالکا : بالک شاگرد، چیلا۔ واہر: چور نوں پھڑن والا۔ ابھے ساہ: پُٹھے ساہ

سدھا مطلب
ہیر دی ماں ملکی نال دے گواہنڈیاں دے گھر جا کے پچھدی ہے
ساڈے ماہی (مجھاں چارن والا) دا کوئی پتہ ہے۔ اوہ وچارہ پچھتاویاں دا ماریا پتہ نہیں کتھے ٹر گیا۔
ہیر اوہنوں بلا رہی ہے جو آکے میرے پلنگ دیاں پاویاں دا رنگ دھو دیوے
رانجھا زمین تے وچھے تیکھیاں (پرالی وغیرہ) توں اٹھ کے کہندا ہے جو ایہہ پیا ہے بے گھر
اوس نے سر منا لیا ہویا سی جیویں جوگیاں دا شاگرد ہووے
وارث شاہ نوں دسدا ہے جو اوہدی حالت اوہ سی جیویں چور نوں پھڑن لئی جتھا سر تے آ پُجے، اوہ اوس چور وانگوں پٹھے ساہ لے رہیا ہے۔

کھلارواں مطلب
ایس بند توں پہلاں سانوں پتہ لگ چکیا ہے جو ہیر دے پیو نے اوس دی ماں نوں کہہ دتا ہے جو کسے وی طرحاں رانجھے نوں منا کے لیاندا جاوے تے بھاویں اوہ ہیر نال عشق لڑاوندا رہوے اوس کولوں ہیر دے ویاہ تیکر مجھاں چراونیاں ہین۔ ایس بند وچ ہیر دی ماں ملکی اوس متھی ہوئی سکیم نوں پورا کرن نکلدی ہے۔

اوہ نالدیاں یا ساہمنے والیاں دے گھر جا کے پچھدی ہے جو ساڈے ماہی دی خبر ہے کوئی؟ پھیر اوہ جیویں" ماریا گیا پچھتاویاں دا " دے بول ہمدردی نال بولدی ہے اوس توں لگدا ہے جو اوس نوں پتہ ہے جو رانجھا اوتھے ہی ہے تے ایس گل نوں سن رہیا ہے۔ظاہر گل ہے جو پنڈ دے سردار ہین تے اوہناں پتہ ہے جو اوہناں دا کڈھیا بندہ کتھے ہووے گا۔ فیر انج وی پنڈ اک نکی جیہی تھاں ہوندی ہے جتھے ہر کسے نوں ہر کسے دا پتہ ہوندا ہے۔ سو ایہہ گل ظاہر ہے جو اوہ گل رانجھے نوں ہی سنا رہی ہے گھر والیاں نوں نہیں۔

"ماریا گیا پچھتاویاں دا" توں ایہہ وی پتہ لگدا ہے جو ہیر دی ماں نوں پتہ ہے جو رانجھا ایس گل تے پچھتا رہیا ہووے گا جو اوس کیوں ہیر دی گل من کے باراں سال مجھاں چاریاں تے فیر اوس نوں چٹا جواب مل گیا۔ اوہ نہ ایدھر دا رہیا تے نہ اودھر دا۔ ایہہ ساریاں گلاں پچھے رانجھا ہیر دے پیو چوچک دے ساہمنے کر وی چکیا۔ ایس لئی ہیر دی ماں ایہہ من رہی ہے جو جو رانجھے نال ہویا ہے اوس وچ پچھتاوا ہی مل سکدا ہے۔ پر ایہہ وی ظاہر کرنا چاہندی ہے جیویں اوہ پچھتاویاں نوں مکاون آئی ہووے۔

ایسے لئی اوہ اگلی گل کم کرن دی یا مجھاں چارن دی نہیں ہیر دی سدھر دی کردی ہے۔ تے ہیر دی سدھر وی اجیہی جیہدے وچ جنسی اشارہ لکیا ہویا ہے۔ ملکی ایہہ کہہ کے جو ہیر سددی پئی ہے کہ" اوس دے پلنگ دے پاویاں دا رنگ دھو دیوے" رانجھے نوں سنا رہی ہے ، اوس نوں اشارے نال کہہ رہی ہے جو اوہناں نوں ایس گل تے اعتراض نہیں ہووے گا ہیر رانجھا وکھرے ملن تے عشق کرن۔ ایس توں ایہہ گل ہور وی پکی ہو جاندی ہے جو حاکم میل اپنے بچا لئی ہر ہتھیار ورتدا ہے، اوہ اپنی شان بان تے ریت رواج وی دا تے لا دیندی ہے۔

اگلے دو مصرعیاں وچ رانجھے دا حال تے اوس دا ملکی نال جواب ہے۔ ظاہر گل ہے رانجھے نوں پتہ ہے جو اوہ نتھاواں ہے، اوس دا اوس گھر یا پنڈ تے کوئی حق نہیں۔ اوہ کسے ویلے وی کڈھیا جا سکدا ہے۔ اوسدا دا سر منا کے جوگیاں دیاں بالکیاں وانگ ہو جانا وی دسدا ہے جو رانجھے نوں پتہ ہے جو اوس دا حال وی جوگیاں وانگ ہی ہے جیہناں دا کوئی دیس تے ملک نہیں ہوندا۔ رانجھے نے آپ ہی اپنا سر منایا ہے جیس دا مطلب ہے جو اوس نے ایہہ راہ اپنی من مرضی نال پھڑیا۔

ایس مصرعے توں ایہہ وی اشارہ مل جاندا ہے جو رانجھے دی اگلی منزل جوگ ہے۔ ہیر دے ڈرامے وچ ایہہ گل تے وارث شاہ نے ہیر کولوں رانجھے نوں ویاہ توں بعد اکھوائی ہے جو رانجھا جوگی بن کے اوس نوں ہیر دے سوہریاں دے پنڈ رنگ پور کھیڑیاں وچ ملن آوے پر ایتھے وارث شاہ ہوریں پہلاں ہی سینت مار جاندے ہین جو رانجھا مجھاں چاردا وی جوگ دی منزل ہی کر رہیا ہے۔ ایس دا ایہہ مطلب وی ہے جو کم کرنا وی جوگ ہو سکدا ہے جے کر اوہ کسے ودھیا مطلب لئی کیتا جاوے۔ جے کم دا مطلب اپنے آپ نوں تے آلے دوالے نوں سرجنا (تخلیق) ہے تے فیر اوہ جوگ ہی ہے۔ رانجھے دا زمین بھانڈے دی مالکی چھڈ کے نویں زندگی دی سرجنا کرن لئی مجھاں چارناں کم وی ہے تے جوگ وی۔ ایس پکھ توں وارث شاہ جوگ دے نویں معنے کڈھ رہے ہین۔اگے جا کے بالناتھ جوگی نال رانجھے دے کیتے ڈائیلاگاں وچ ایہہ گل ہور نتر کے سامنے آوے گی۔

اخیری مصرعہ بڑا ولاویں والا ہے۔ وارث شاہ نوں دسدا ہے جو رانجھا ہیر دی ماں دے جواپ وچ ایویں ابھے ساہ لے رہیا ہے جیویں چور نس رہیا ہووے تے اوس نوں پھڑان والا جتھا آن نپّے۔ سوال ایہہ ہے جو رانجھے دی چوری ایہہ ہے جو اوہ کم توں نسیا ہویا سی تے ہیر دی ماں نے اوس نوں آ کے نسن توں روک لیا۔ یا رانجھے دی چوری ایہہ ہے جو اوہ ہیر توں وکھرا ہوکے نہیں جی سکدا تے ہیر دی ماں نے آکے اوس دی ایس چوری نوں پھڑ کے فیر اپنا کاما بنا لیا ہے۔ رانجھے دے ابھے ساہواں توں ایہہ وی ظاہر ہوندا ہے جو اوس نوں اخیر دا پتہ ہے، مطلب ہیر دی ماں دے لارے جھوٹے ہین تے اوس نوں خالی ہتھ ہی رکھیا جانا ہے۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels