Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> آکھیا وارث شاہ نے >> ہیر وارث شاہ بند ٢٨

ہیر وارث شاہ بند ٢٨

May 23rd, 2007
5 / 5 (1 Votes)

آکھ رانجھیا بھاء کیہ بنی تیرے، دیس اپنا چھڈ سدھار ناہیں
ویرا امبڑی جایا جا ناہیں، سانوں نال فراق دے مار ناہیں
ایہہ باندیاں تے اسیں ویر تیرے، کوئی ہور وچار وچار ناہیں
بخش ایہہ گناہ توں بھابیاں نوں، کون جمیا جو گناہگار ناہیں
بھائیاں باجھ نہ مجلساں سوہندیاں نی، اتے بھائیاں باجھ بہار ناہیں
بھائی مرن تے پوندیاں بھج بانہاں بناں بھائیاں پر ہے پروار ناہیں
لکھ اوٹ ہے کول وسیندیاں دی، بھائیاں گیاں جیڈی کوئی ہار ناہیں
بھائی ڈھاوندے بھائی اساردے نیں، بھائیاں باجھ بانہاں بیلی یار ناہیں




مشکل لفظاں دے معنے
بھائ۔ بھاگ، قسمت
سدھارنا۔ ٹر جانا
ویرا۔ بھراوا
امبڑی۔ ماں، امبڑی جایا، ساڈی ماں دیا جمیا
باندیاں۔ غلام
وچار۔ چنتا، پریشانی، خیال
باجھ۔ بغیر
سوہندیاں۔ سوہنیاں لگدیاں
بھج۔ ٹٹ
بانہاں۔ بازو
بناں ۔ بغیر
پرہے، پرہیا۔ پنچائیت
پروار۔ ٹبر، خاندان
اوٹ۔ پناہ، پردہ
وسیندیاں۔ وسدیاں
ڈھاوندے۔ توڑدے، بھندے
اساردے۔ بناوندے، تعمیر کردے

سدھا مطلب

بھائیاں پچھیا کہ رانجھیا تیرے نال کیہہ بنی ہے ، توں دیس چھڈ کے نہ جا
ساڈی ماں دیاں جایا نہ جا تے جاکے سانوں وچھوڑے نال نہ مار
ایہہ (بھرجائیاں) تیریاں غلام نیں تے اسیں تیرے پیارے بھرا، بس ایس توں ودھ ہور کجھ نہ سوچ
ایہہ بھابیاں دا گناہ بخش د ے کیوں جے دنیا وچ کوئی ایسا نہیں جیہڑا گناہگار نہیں جمدا
بھائیاں بنا نہ تے مجلساں چنگیاں لگدیاں نیں تے ہی جیوں وچ بہار یا خوشی رہندی اے
بھائی مر جاون بندے دیاں بانہاں بھج جاندیاں نیں (بندے دی طاقت مک جاندی ہے) تے نہ ہی پنچائیت وچ کوئی گل چلدی ہے تے نہ ہی ٹبرپورا ہوندا ہے۔
بھائی لاگے وسدے ہوون تے اوہناں دا بڑا سہارا تے ہوندا ہے تے اوہ پناہ بن جاندے نیں۔ بھائیاں دے ترن نال جیہڑی ہار آوندی ہے اوہدے جڈی وڈھی کوئی ہار نہیں ہوندی۔
بھائی ہی اک دوجے نوں بناوندے تے ڈھاوندے نیں، بھائیاں بنا کوئی اصلی یار بیلی نہیں ہوندا۔

کھلارواں مطلب

ایس بند وچ اک تے بھراواں دا ہرکھ وی ہے نکے بھرا دے رس کے ٹرجاون تے نال ہی نال پرانے وہی بیجی سماج وچ ٹبر دی جڑت دی سار وی۔

بھرا رانجھے کولوں بھوئیں کھوہ کے اپنا ساڑ تے کڈھ لیندے نیں، اوس دا ٹھٹھہ وی پنڈ وچ بنایا اوہناں نوں ایہہ سر نہیں سی جو اوہ چھڈ کے ہی چلا جاوے گا تے ساری کھیڈ ہی مکا جاوے گا۔ مالکی تے بھراواں دے شریکے وچ کھیڈ ایہو ہے جو سب دھراں رہن وی تے کھیہندیاں وی رہن۔ جے وچوں کوئی چھڈ کے چلا جاوے تے سمجھو کھیڈ ہی مک گئی۔ایسے لئی بھائی کہندے ہین ''بھائی ڈھاوندے بھائی اسار دے نیں'' ایس دا ایہو مطلب ہے جو اک دوجے دی توڑ بھن کردے وی رہو پر رہو کھیڈ وچ۔
انج وی ایہو جیہے سماج وچوں کوئی نکل کے باہر نہیں جاندا۔ وچ رہندیاں چھتر وی کھاوے تاں وی ٹکیا رہندا ہے پر ایتھے تے کم ہی ہورواں ہو گیا جو رانجھا چھڈ کے ہی ٹر پیا۔

ایتھے کجھ سوجھوان (جنہاں وچ مرحوم شریف کنجاہی وی سن) گل نوں انج وی بناوندے ہین جو رانجھا نکما بندہ سی، کھا کما سکدا نہیں سی ایس لئی چھڈن بنا اوس کول کوئی ہور راہ نہیں سی۔ ایہہ گل بڑی اکہری تے پیتلی ہے کیوں جو پنڈاں وچ ، وڈے ٹبراں وچ ادھے نکمے ہوندے نیں تے چھتر پولے کھاندے وچ ہی رلدے کلدے گذارہ کردے نیں ۔ چھڈ کے کوئی نہیں جاندا۔ کیوں جو اوس سماج وچ اپنے پنڈتے اپنی جگہ توں باہر بندے دی نہ کوئی ہستی ہوندی ہے تے نہ ہی کوئی پچھ پرتیت۔

ایسے لئی واہی بیجی سماج وچ اک ادھے نوں چھڈ کے باقی لوکاں کدی پنڈ توں اک دو میل باہر جا کے وی نہیں ویکھیا ہوندا۔ اپنی تھاہر چھڈکے ، اوپرے دیس نوں ٹر جاون لئی بڑا دل گردہ چاہیدا ہے۔ خاص طور تے اوہناں بندیاں لئی جنہاں دا کوئی زمین بھانڈا وی ہووے۔ اجے کمی کارے لئی پھیر وی اک پنڈ چھڈ کے دوجے وچ جا وسنا اوکھا کم نہیں ہوندا۔ ایس لئی رانجھے دا دیس نوں چھڈ کے ٹرجانا نکمے ہوون دی دلیل نہیں سگوں اک ڈوہنگی رمز ہے جیس نوں وارث شاہ پہلاں ''روح دا قلبوت نوں چھڈنا'' کہہ ہٹیا ہے۔

رانجھے دا چلے جاونا ٹبر وچ گھاٹا وی ہے۔ واہی بیجی سماج وچ جنے بہتے ہتھ ہوون اونی ہی طاقت تے شان بندی ہے۔ ایس پاروں ایہہ محاور بنے ہوئے ہین ''بھائی بانہاں ہوندے نیں'' ۔ ایس بند وچ ایہو جیہے کئی محاورے وارث شاہ ہوراں اکٹھے کیتے نیں۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels