Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> آکھیا وارث شاہ نے >> ہیر وارث شاہ: بند 107

ہیر وارث شاہ: بند 107

September 10th, 2009

مَلکی آکھدی لڑیوں جے نال چُوچک کوئی سُخن نہ جیو تے لیاونا ای
کِیہا ماپیاں پُتراں لڑن ہوندا تُساں کھٹنا تے اَساں کھاونا ای
چِھڑ مال دے نال میں گھول گھتی شامو شام راتیں گھریں آونا ای
توں ہی چوئیکے دُوھ جماونائی توں ہی ہیر دا پلنگ وچھاونا ای
کُڑی کل دی تیرے توں رُس بیٹھی توں ہی اوس نُوں آ مناونا ای
منگو مال سیال تے ہیر تیری نالے گُھورنا تے نالے کھاونا ای
منگو چھیڑ کے جھل وِچ میاں وارث اَساں تخت ہزارے نوں جاونا ای

اوکھے لفظاں دے معنے
سخن: گل میہنا۔ کھٹنا: کماونا۔ چھڑ: ٹر پے۔ مال: مجھاں ڈنگر، پرانے ویلیاں وچ ڈنگر ہی بندے دی دولت ہوندی سی۔گھول گھتی: قربان ہوئی۔ منگو: مجھاں دا اجڑ۔ رس پئی:ناراض ہو گئی۔ گھورنا: ٹکٹکی لا کے ویکھی جانا۔ جھل: بیلا، جنگل

سدھا مطلب
ہیر دی ماں ملکی رانجھے نوں جا کے کہندی ہے جو جے توں چوچک نال لڑیاں سی تے دل وچ کوئی ہرکھ نہ رکھیں۔
ایس لئی جو ماپیاں تے اولاد وچکار کوئی لڑائی نہیں ہوندی۔ تسیں اولاد ہو ساڈی تے تسیں جو کماونا ہے اوہ اسیں کھاونا اے۔
توں ہن مجھاں لے کے ٹر جا تے میں تیرے تیرے قربان جاواں شامو شامی واپس گھر پرت آونا ہے۔
توں ہی ددھ چو کے جماونا ہے تے ہیر دا پلنگ وی توں ہی وچھاونا اے۔
کل دی کڑی تیرے توں رسی ہوئی آ، تے توں آ کے اوس نوں منا وی لے۔
مجھاں ڈنگر مال تے سیالاں دا قبیلہ تے ہیر سب تیرے ہین ، توں آکڑ کے رہنا تے کھانا اے۔
مجھاں نوں بیلے وچ چرن لئی چھڈ کے توں دل وچ اپنے گراں تخت ہزارے دے خواب ویکھیں۔

کھلارواں مطلب
ایس بند دیاں کئی پرتاں ہین تے ایس دیاں کئی پڑھتاں (تفسیراں) کیتیاں جا سکدیاں ہین۔

اک پڑھت تے ایہہ ہے جو ایہہ ہیر رانجھے دے ناٹک دا اک ڈائیلاگ ہے جیہڑا کاریگری نال گھڑیا گیا ہے۔ ہیر دی ماں پنڈ دے سردار چوچک دی گھر والی اپنے خاوند دے کہن تے اپنی غرض پوری کرن لئی اک سدھی سدھی پھپھے کٹنی بن گئی ہے ۔ ایہہ پھپھے کٹنی جاندی ہے جو اوس دے شکار دی کیہ کمزوری ہے، تے اوس نوں کیہ لوبھ دتا جانا ہے۔

ہیر دی ماں ملکی نے آپ ہی اپنے خاوند چوچک نوں چکیا سی جو پنڈ وچ بد نامی ہو رہی ہے تے اوہ رانجھے نوں نوکری توں جواب دے دیوے۔ چوچک تے وی اپنی چوہدراہٹ دا بھوت چڑھیا ہویا سی ایس لئی اوس نے بنا معاشی نتیجیاں تے سوچے اوس نوں جواب دے دتا۔ تگڑے تے حاکم لوک بہت واری ہنکار تے کرودھ وچ عام لوکاں تے کامیاں دے خلاف اجیہے فیصلے کردے ہین جیہڑے اوہناں لئی آپ وی مارو ہوندے نیں۔ اوہ بھل جاندے نیں جو اوہناں دی دولت، عیش آرام کامیاں دی محنت پاروں ہی قائم ہے، اوہ سمجھدے ہین جو اوہناں کامیاں نوں رزق دتا ہویا ہے حالاں اصل ایہہ ہے جو کامے اوہناں دا رزق کماوندے ہین۔

وڈیاں وڈیاں باشاہیاں جنگاں لڑن ویلے بھل جاندیاں ہین جو ایہو جیہے مارو کماں نال اوہناں دی معیشت تباہ ہو جاوے گی پر اوہناں نوں پتہ اودوں لگدا ہے جدوں تباہی ہو چکی ہوندی ہے۔ ایس لئی چوچک پہلا بندہ نہیں سی جیس معاشی نتیجیاں نوں سوچے بنا ہی رانجھے نوں نوکری توں کڈھ دتا سی۔ پر جد کم چلنا بند ہو گیا تے اوہ رانجھے نوں واپس لیا کے اوس کولوں مجھاں چراوان لئی اپنی بیوی تے دھی نوں وی ورتن لئی تیار ہو گیا۔

سو ملکی پہلاں تے ظاہر ایہہ کردی ہے جو رانجھا ٹبر دا حصہ سی، تے ہے۔ اوہ صرف چوچک نال لڑیا سی ایس لئی ایہدے نال باقی گھر والیاں نال غصے دی کوئی وجہ نہیں سی۔ ایس گل نوں پکیاں کرن لئی اوہ اک پیر اگے ودھدی ہے تے رانجھے نوں پتر یا جوائی منن دا اعلان کردی ہے۔ جد اوہ کہندی ہے کہ ماپیاں پتراں دا لڑن وی کوئی لڑن ہے۔ اپنے لوبھ تے لالچ تے وی پردہ پاون لئی کہندی ہے جو پتراں کماونا ہوندا ہے تے ماپیاں کھانا ہوندا ہے۔ ایہو جیہا پتر تے ہر اک نوں بہت وارا کھاندا ہے جیہڑا وراثت دا حق وی نہ رکھے، کسے ویلے وی ددھ وچوں مکھی طرحاں باہر کڈھ کے سٹیا جا سکے تے بنا محنت منگے کم وی کردا رہوے جو رانجھا کر رہیا سی۔

پر ملکی اتاولی ہے جو رانجھا جھبدے مجھاں بیلے لے کے ٹرجاوے پر اوہ ایہہ گل کہندی ہے جیویں کوئی ماں گوڑھے پیار نال کہہ رہی ہووے۔ ایسے لئی اگلے ہی فقرے وچ اوس نوں ہر طرحاں دا لالچ وی دیندی ہے ایہہ ظاہر کرکے جو اوہ سارے کم دا مالک ہے تے اوس نے آپ ہی دودھ چونا تے جماونا ہے۔ تے نال ہی سب توں وڈھا لالچ ہیر دی نیڑتا دا دیندی ہے۔ ایتھے اوہ انج ظاہر کردی ہے جیویں رانجھا جوائی ہووے تے ہیر تے اوسدا حق منیا گیا ہووے۔ ہیر دا پلنگ وچھاون دے اشارے نال اوہ رانجھے نوں ایہہ وی دس رہی ہے جو اوس نوں اوسدے ہیر نال جنسی تعلق تے وی کوئی بہتا اعتراض نہیں ہے۔

ملکی ہیر دے رسن والی گل وی ظاہر ہے اک بہانے دے طور ورت رہی ہے۔ اوس نوں پتہ ہے جو ہیر رانجھے نال رسی ہوئی نہیں سگوں دلوں بہت دکھی ہے۔ پر اوس نوں رانجھے نال روس کہہ کے رانجھے دے رومانس نوں سہارا دے رہی ہے۔ فیر اخیر تے مال ڈنگر، قبیلہ تے ہیر نوں رانجھے دا کہہ کے اوہ اپنے جھوٹے لارے تے مہر لا دیندی ہے۔

اخیرلا مصرعہ سدا وانگ وارث شاہ دا ناٹک وچ راوی دے رول دا ہے ، اوہ ہر سین یا سین دے اک انگ تے مکن تے ناٹک ویکھن والیاں دے سامنے آوندا تے سین دے مُکا دا اعلان کردا ہے۔ ایس وچ ملکی دے پھپھے کٹنیاں والیاں گلاں دے اخیر تے کہواندا یا کہندا ہے جو مجھاں بیلے وچ چھڈ کے آپ تخت ہزارے ٹر جاوے۔ رانجھے دا اوس تخت ہزارے جان دا کیہ مطلب ہے جیس نوں اوہ رد کے آیا سی؟ ایتھے ایہدا ایہہ مطلب وی ہو سکدا ہے جو ہن اوس نوں منزل ملن دی آس ودھ گئی ہے تے اوہ ہیر نوں ویاہ کے تخت ہزارے جان دا خواب ویکھ سکدا ہے۔ کیوں جو اخیر رانجھا کرنا تے ایہو چاہندا ہے تے ناٹک دے اخیر وچ کردا وی ایہو ہے جو تخت ہزارے جاکے اوتھوں جنج لیاون دی تیاری کردا ہے۔ سو ایتھے ایہہ مطلب وی ہے جو ہن اوہ جنج لے کے آون دا سفنا ویکھ سکدا ہے۔

تخت ہزارے دے خواب دا مطلب ایہہ وی ہو سکدا ہے جو جد ہیر دی ماں نے اوس نوں ہر شے دا مالک کہہ دتا تے اوہ تخت ہزارے دے چوہدریاں دے درجے تے آگیا ہے۔

تخت ہزارے دے خواب دا تریجا مطلب ایہہ وی ہو سکدا ہے جو ایتھے وی اوس نال اوہو ہو رہیا ہے جو تخت ہزارے وچ ہویا سی۔ اک پاسے لاڈ پیار تے دوجے پاسے بھراواں دے دھوکے تے دغا بازی۔

ایس سارے بند دی اک دوجی پڑھت وارث شاہ دے ویلے دی تاریخ دے چوکھٹے وچ رکھ کے کیتی جا سکدی ہے۔ وارث شاہ دے ویلے پنڈاں دی مدھولی ہوئی جٹالی اوس ویلے دے مغل ورتارے تے اوس دے بنائے نظام نوں بھن تروڑ رہی سی۔ ایہہ ماڑی پھنڈی جٹالی اپنی حاکمی قائم کرن لئی پرانے حاکماں نوں مٹی وچ رول رہی سی۔ "اشراف خراب" تے کمین تازہ ہو رہے سن۔ ہیٹھلی اتے تے اتلی ہیٹھاں ہو رہی سی۔ سو ایہناں حالاں وچ پرانے حاکم میل نوں اپنے بچا لئی لاج شرم لاہ کے نویں اٹھدی جٹالی نوں موہنا سی، اوہناں نوں اپنے رنگ وچ رنگنا سی تے ایس لئی ماواں دھیاں دی لاج شرم وی ورتی جا رہی سی۔ ایس پکھ توں ملکی پرانے حاکم میل دی ڈھیندی کندھ ہے جیہڑی نویں ابھردے حاکماں کولوں سہارا لبھ رہی ہے۔ ایس لئی ملکی دا ہر لفظ نویں حاکم میل نوں ولاون تے بھرماون دا جتن ہے۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels