Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> آکھیا وارث شاہ نے >> ہیر وارث شاہ بند ٢٩

ہیر وارث شاہ بند ٢٩

May 31st, 2007

رانجھے آکھیا اٹھیا رزق میرا، میتھوں بھائیو تسیں کیہ منگدے ہو
سانبھ لیا ہے باپ دا ملکھ (ملک) سارا، تسیں ساک نہ سین نہ انگ دے ہو
وس لگجے تاں منصور واہنگوں مینوں چاء سولی اتے ٹنگدے ہو
وچوں خوشی ہو اساں دے نکلنے تے، مونہوں آکھدے گل کیوں سنگدے ہو



مشکل لفظاں دے معنے
ملکھ۔ ملکیت، جائیداد
ساک۔ قریبی رشتے دار
سین۔ کڑی یا منڈے دے ویاہ دے ناطے بنن والے رشتے دار
انگ۔ یار بیلی
لگجے۔ لگے جے
وس لگجے۔ جے وس لگے تے
منصور۔ حسین بن منصور حلاج البیضاوی فارس دے شہر بیضا جمے۔ عمر دا پہلا حصہ عراق دے شہر وسط وچ لنگھایا۔ مشہور صوفی جنید بغدادی دے مرید ہو گئے۔ ہمہ اوست (سب کجھ اوہ ہے) دے منن والے سن تے نعرہ ماردے سن اناالحق (میں خدا ہاں) ۔ ٩٠٩ وچ ابن داؤد دالاصفہانی دے فتوی پاروں پہلی واری پھڑے گئے۔ پھیر دوجی واری پھڑے گئے تے اٹھ سال قید وچ رہے۔ اٹھ سال بعد سولی تے چاڑھے گئے۔ مولانا رومی تے عطار ورگے وڈھے شاعر وچاروان اوہناں نوں حق دی خاطر شہید ہوون والے دا رتبہ دیندے ہین۔منصور حلاج ہوراں اپنے فلسفے تے سنتالی کتاباں لکھیاں ہین۔ اہناں وچوں کتاب الاصول و الفرع، کتاب ہو ہو، کتاب علم البقاء و الفنائ، کتاب العدل والتوحید
ٹنگدے۔ لٹکاوندے
سنگدے۔ شرماوندے

سدھا مطلب

رانجھے نے بھائیاں نوں کہیا جو میرا دانا پانی ایتھوں اٹھ گیا، ہن تسیں میرے کولوں کیہ منگدے ہو؟
تسیں پیو دی ساری ملکیت تے مل مار رہی ہے، تسیں نہ میرے نیڑے تے نہ دور دے رشتے دا ہو تے نہ ہی کوئی سنگی ساتھی
جے تہاڈا وس لگ جاوے تے تسیں مینوں منصور وانگوں پھاہے لا دیو
دل وچ میرے نکلن تے خوش ہو پر مونہوں کہندے شرماوندے ہو۔

کھلارواں مطلب

ایس بند وچ وارث شاہ ایس گل نوں چانن کر دیندا ہے جو رانجھا اک سرت والا بندہ ہے تے اوس نوں وچوں پتہ ہے جو اوس نال اصل بھیڑ اوس دیاں بھرجائیاں نہیں اوس دیاں بھراواں کیتا ہے۔ بھابیاں تے چھڑا مہنے طعنے مارن دی کھیڈ کھیڈ رہیاں ہین ، یاں کہہ لوو جو اج دے میڈیا وانگوں رانجھے دے خلاف پراپےگنڈہ کر رہیا ہین پر اصل کم تے اوس دیاں بھراواں اوس کولوں بھوئیں تے دوجی ملکیت کھوہ کے کیتا ہے۔

پچھلے بند وچ بھائی ظاہر کردے نیں جو رانجھا بھرجائیاں دے طعنیاں مہنیاں توں تنگ پے کے دیس چھڈ رہیا ہے تے کہندے نیں ''بخش ایہہ گناہ توں بھابیاں نوں'' پر رانجھا بھائیاں نوں ایہہ نہیں کہندا جو اوہ بھابیاں دے کارن دیس چھڈ رہیا ہے سگوں ایہہ جو بھائیاں دیاں نا انصافیاں اوس نوں دیس چھڈن تے مجبور کر رہیاں ہین۔

رانجھا ایہہ کہ کے جو ''تسیں ساک نہ سین نہ انگ دے ہو' ایہہ وی دس رہیا ہے جو ایتھے سوائے ملکیت دے رشتیاں دے کوئی رشتہ نہیں ہے۔ جیویں پچھے وی وارث شاہ آکھیا سی، ''وارث شاہ ایہہ غرض ہے بہت پیاری ہور ساک نہ سین نہ انگ دے نی''۔ سگویں ایہو گل ہن رانجھا بھراواں نوں کہ رہیا ہے۔

رانجھے نوں ایہہ وی چانن ہے جے ملکیت دے کھیڈ وچ بھراواں دا وس لگے تے اوس نوں پھاہے وی لا دین ۔

اخیری مصرعے وچ رانجھا گل دا تت کڈھ دیندا ہے جو وچوں تے تسیں میرے نکلن تے خوش ہو ، بس شرماوندے مونہوں کہندے نہیں ہو۔ مطلب شریکے برادری دے ڈر توں شرماوندے ہو تے مینوں روک رہے ہو۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels