بھرجائیاں آکھیا رانجھیا وے اسیں باندیاں تیریاں ہنیاں ہاں ناؤں لینا ہیں جدوں توں جاونے دا اسیں ہنجھرو رت دے رنیاں ہاں جان مال قربان ہے تدھ اتوں اتے آپ بھی چوکھنے ہنیاں ہاں سانوں صبر قرار نہ آوندا ہے جس ویلڑے تیتھوں وچھنیاں ہاں
مشکل لفظاں دے معنے باندیاں۔ غلام ہنجھرو۔ ہنجو، اتھرو، آنسو رنیاں۔ رونیاں چوکھنے۔ چار کھن یا چار حصے ہو جانا، قربان ہو جانا وچھنیاں ۔ وچھڑیاں
سدھا مطلب
بھرجائیاں رانجھے نوں کہندیاں ہین جو اسیں تیریاں غلام ہاں جدوں توں ایجتوں جان دا ناں لینا ہیں تے ساڈیاں اکھاں وچوں خون دے اتھرو وگدے ہین۔ اسیں تیرے توں توں جان وی تے مال وی قربان کرن لئی تیار ہاں، اسیں تیرے تے قرباں ہو جاواں گیاں۔ جیس ویلے دیاں اسیں تیتھوں وچھڑیاں ہاں سانوں نہ صبر آوندا ہے نہ آرام
کھلارواں مطلب
ایہہ بڑا سدھا بند ہے جیس وچ بھابیاں ظاہرا رانجھے دا ترلا کردیاں ہین جو اوہ اوہناں نوں چھڈ کے نہ جاوے۔ لگدا ہے جو اوہ زنانیاں ہوندیاں کجھ پچھتا وی رہیاں ہین۔ اوہ مرداں طرحاں ظلم دی کھیڈ وچ انج نہیں ہین جیویں رانجھے دے بھائی ہین۔ ایس لئی اوہناں دے ایہہ بول ادھ سچے تے ادھ جھوٹے ہین۔
