Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> آکھیا وارث شاہ نے >> ہیر وارث شاہ: بند 108

ہیر وارث شاہ: بند 108

September 12th, 2009

رانجھا آکھدا ہیر نوں ماؤں تیری سانوں پھیر مُڑ رات دی چمڑی ہے
میاں من لئے اوس دے آکھنے نوں تیری ہیر پیاری دی امڑی ہے
کیہ جانےے اُٹھ کس گھڑی بہسی اجے ویاہ دی وِتھ وِی لمڑی ہے
وارث شاہ ایس عشق دے ونج وِچّوں پلے کسے نہ بدھیا دَمڑی ہے

اوکھے لفظاں دے معنے
آکھنے: کہنے۔ امڑی: ماں۔ وتھ: فاصلہ۔ ونج: وپار۔ بدھڑی: باندھی۔ اُٹھ: اونٹ۔ کس کڑی بہسی: کس کروٹ بہوے گا۔ لمڑی: لمبی

سدھا مطلب
رانجھے نے ہیر نوں آکھیا جو تیری ماں فیر مینوں آ کے چمبڑی ہوئی ہے (جو واپس آ جا)
ہیر دا جواب ہے جو اوس دا کہیا من لے اخیر اوہ تیری ہیر دی ماں ہے۔
ایہہ وی ہے جو پتہ نہیں معاملے کیویں نبڑن گے کیوں جے اجے تے ویاہ وچ بہت لما چر ہے، یا ویاہ دا ہوونا وی دور دی گل ہے
وارث شاہ دا کہنا ہے جو عشق دے بیوپار وچوں کسے نوں کدی کجھ کھٹی نہیں ہوئی

کھلارواں مطلب
ایس بند دے پہلے مصرعے توں ہی پتہ لگ جاندا ہے جو رانجھا ہیر دی ماں ملکی دے لاریاں وچ نہیں آیا۔ اوس نوں پتہ ہے جو ایہہ ساریاں جھوٹیاں گلاں ہین جو اوس کولوں مجھاں چروان لئی کیتیاں گئیاں ہین۔ ایسے لئی رانجھا ہیر نوں کہندا ہے جو تیری ماں فیر آن چمبڑی ہے۔ "چمبڑی" دے لفظ توں پتہ لگ جاندا ہے جو رانجھے نوں سب گلاں دی اصل دی خبر ہے۔

ہیر وی جاندی ہے ایسے لئی اوہ پہلے کہندی ہے جو اوس دی گل من لے اخیر اوہ میری ماں ہے۔ تے ایس میری ماں وچ ایہہ گل وی لکی ہوئی ہے جو شاید ایس نوں ہی ساڈا خیال آجاوے، ایسے لئی اوہ اگلے مصرعے وچ دسدی ہے جو پتہ نہیں کیہ جھیڑے پیندے نیں تے اوہناں دا اخیر کیہ ہووے گا۔ ایس تھڑکدے سمے وچ ہور چارہ وی کوئی نہیں سوائے واپس آون دے۔ نال ہی اوہ اپنے ویاہ دی گل کردی ہے۔ پر گل گول مول ہے، جو ویاہ وچ وی لما چر پیا ہے ۔ مطلب جے گل رانجھے نال ویاہ دی ہو رہی ہے تے فیر مطلب ایہہ ہویا جو ہیر دے ماپیاں دا مننا سوکھا نہیں ایس وچ لما چر لگے گا۔ جے ہیر اپنے کسے ہور نال ویاہ دی گل کر رہی ہے تے اوسدا مطلب ہے جو اوس ویلے تیکر تے ایتھے رہنا پوے گا تے رانجھے نوں مجھاں چارنیاں پین گیاں۔ ایس دا ایہہ مطلب وی ہو سکدا ہے جو اجے ویاہ ہوون یا نہ ہوون وچ وی وڈا پاڑ ہے جیہڑا پتہ نہیں کیویں پوریا جانا ہے۔

اخیری مصرعے وچ وارث شاہ راوی بن کے تت کڈھ دیندا ہے جو ایس عشق دے کاروبار وچ کدی کسے نوں کوئی کھٹی نہیں ہوئی۔ ایتھے وارث شاہ ہیر دے ویاہ والی گل دا وی جواب دے رہیا ہے۔ جو ہیر تے سمجھدی ہے کہ ویاہ وچ لما چر ہے پر وارث شاہ نوں پتہ ہے جو ایہہ نہیں ہونا کیوں جو عشق کرکے گھر دنیاداری وچ گھر نہیں وسائے جا سکدے۔

جے تاریخی چوکھٹے وچ رکھ کے ایس بند نوں ویکھیا جاوے تے ایس دا مطلب ہے جو کیویں نویاں نابر لہراں نوں پرانے نظام نال وقتی نباہ کرنا پیندا ہے۔ نابری دی لہر کوئی سدھی پدھری نہیں ہوندی۔ پرانا نظام اپنا ہر داء ورتدا ہے نویاں طاقتاں نوں وس کرن لئی، اوہناں داواں وچ پیار وی ہے تے جنگ وی۔ پر وارث شاہ دا اخیری مصرعہ دسدا ہے جو تاریخی عمل وچ عام لوکائی نوں کوئی کھٹی نہیں ہوندی، اخیر نویاں طاقتاں وی پرانیاں وانگ ہی ہو جاندیاں نیں۔ جیویں سکھ جٹالی وی اخیر شاہی تے ذات پات دے نظام وچ ڈھل گئی۔ سو جے لوکائی دا نابری وچ رلنا اک عشق دی حالت سی تے کسے لابھ لئی سی تے اوہ نہیں ملدا، پھیر کجھ نویں سردار پرانیاں دی تھاں لے لیندے نیں۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels