Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> آکھیا وارث شاہ نے >> ہیر وارث شاہ: بند 109

ہیر وارث شاہ: بند 109

September 14th, 2009

رانجھا ہیر دی ماؤں دے لگ آکھے چھیڑ مجھیاں جھل نوں آوندا ہے
منگو واڑ دِتا وچ جھانگڑے دے آپ نہائیکے رب دِھیاؤندا ہے
ہیر ستواں دا مگر گھول چھنا ویکھو رزق رنجیٹھے دا آؤندا ہے
پنجاں پیراں دی آمدن تُرت ہوئی ہتھ بنھ سلام کر آوندا ہے
رانجھا ہیر دونویں ہوئے آن حاضر اگوں پیر ہُن ایہہ فرماؤندا ہے

اوکھے لفظاں دے معنے
جھانگڑے:جھل بیلا، جنگل۔ ستو: پسے ہوئے جَو۔ چھنا: اک تھالی ورگا بھانڈا ہوندا سی جیس دے اتوں کنڈے مڑے ہوندے سن تاں جو شورا وغیرہ باہر نہ ڈھل سکے: دھیاؤنا: دھیان وچ رکھنا، ذکر کرنا ، یاد کرنا۔ آمدن: آونا

سدھا مطلب
رانجھا ہیر دی ماں دا کہیا من کے مجھاں نوں جنگل وچ پہنچا دیندا ہے
مجھاں دا اجڑ سنگھنے جنگل وچ واڑ کے آپ نہا دھوکے رب نوں یاد کردا ہے۔
ہیر وی ستواں دا چھنا گھول کے رانجھے دا رزق لے کے آوندی ہے
اوسے ویلے پنجاں پیراں دی آمدن ہو گئی تے رانجھا اوہناں نوں سلام کردا ہے
دوہیں ہیر تے رانجھا پیراں دے سامنے حاضر ہوندے نیں تے پیر ایہہ فرماندے نیں

کھلارواں مطلب
وارث شاہ دے قصے وچ جدول وی گنجھل یا وڈھی بدلی آؤن والی ہوندی ہے اوتھے پنج پیر ظاہر ہوندے ہین۔ ایس بند دے پہلے مصرعے توں ہی کھلنا شروع ہوندا ہے جو رانجھے دی پہلی منزل اخیر تے آگئی ہے۔ چوچک دے اوس نوں نوکریوں کڈھن تے اوس نوں پتہ لگ چکیا ہے جو اوہ جنی سیوا مرضی کر لوے چوچک نے اپنی دھی اوس نال ویاہنی نہیں ہے۔ ایس لئی اوہ ہیر دی ماں دے کہن تے صرف ایس لئی فیر مجھاں چارن دا من گیا ہے جو اوتھے رہن دا ہور کوئی راہ نہیں۔ پر ایہہ گل اوس تے چانن ہے جو مجھاں چارن نال ہیر نہیں ملنی۔

ایہو سوچ کے اوہ مجھاں نوں چرن لئی چھڈ کے نہا دھو کے راب دا ناں جپنا شروع کردیندا ہے۔ ایتھے رب دا ناں دھیاون دا مطلب ہے جو اوس نوں اگے دی منزل صاف دس نہیں رہی تے اوس بارے اپنے دل دماغ نوں پھرول رہیا ہے۔ اپنے اندر دی شکتی نوں جگا رہیا ہے جو اوس نوں اے وھن دی راہ تے حوصلہ دیوے۔ ایسے لئی اگلے مصرعے وچ ہیر دے ستواں دا چھنا لیاون نال ہی کہیا گیا ہے "رزق رنجیٹھے دا آوندا ہے" وارث شاہ دی کاریگری بہت باریک ہے ، اوہناں پہلی منزل جدوں رانجھے نے مجھاں چارنیاں شروع کیتیاں سن، ہیر دے بتھا لیاون نوں اک رومانی ڈھنگ نال بیان کیتا سی تے لیائی جاون شے وی بڑے پیار نال کٹی ہوئی چوری سی۔ پر ہن ہیر وی مجبوریاں وچ پھسی ہوئی ہے تے اوہ چھڑا ستواں دا چھنا ہی لیا سکدی ہے تے ایہہ بس اک رزق ہے ڈھڈھ بھرن لئی، ایہہ معشوق دا پیار نال کٹی ہوئی چوری نہیں۔ ایس توں وی لگدا ہے جو رانجھا مڑ کے تے آگیا ہے پر چودھارا (صورت حال) تے ہر اک دے کردار بدل گئے ہین۔

ایہو جیہے اوکھے ویلے تے جد متھی ہوئی راہ تے چلنا اوکھا ہو جاندا ہے تے اگے وی کجھ نظر نہیں آوندا، بندے نوں اپنی اندر دیاں شکتیاں نوں جگاؤنا پیندا ہے۔ اسیں پہلاں وی پنج پیراں بارے لکھ ہٹے ہاں جو اوہ بندیاں دیاں پنج مڈھلیاں شکتیاں دی سینت ہے۔ ایہہ شکتیاں نویں سوجھ، نویں سیدھ نوں لبھن لئی بندے دے اندروں جاگدیاں ہین۔ پر ایہہ شکتیاں صرف اوہناں دے اندر جاگدیاں ہین جو سماج دے ویہار تروڑ کے نویں زندگی دی سرجنا کر رہے ہوندے نیں۔ ایہہ مرد عورت دے رشتے نوں بدلن والے عاشق وی ہو سکدے ہین تے پرانے سماج نوں ڈھاہ کے نویں ورتارے دے جتن کرن والے عاشق وی ہو سکدے ہین۔

پنج پیر دسدے نہیں تے اوہناں دا مادی وجود وی ظاہر نہیں ہو سکدا۔ ایہہ اندر دیاں طاقتاں ہین۔ مطلب نویں حیاتی دا لوڑوند اپنے اندروں نویاں ان ڈٹھیاں شکتیاں کھوجدا ہے۔ اوس نوں پہلاں پتہ وی نہیں ہوندا جو ایہہ شکتیاں وی اوس دے اندر ہین۔ پر پھیر وچ آکے اوہنوں ایہناں دا احساس ہوندا ہے۔ وارث شاہ دے قصے وچ رانجھے دیاں ایہہ شکتیاں ہر اوس منزل تے ساہمنے آؤندیاں نیں جتھے اوس نوں اپنے کیتے تے پچھتاوا لگدا ہے، اپنے جتن پھوکے تے بے نتیجہ لگدے ہین۔ اوس دے اندر پرانی راہ تے مڑ جان دی سدھر پیدا ہوندی ہے پر فیر پیر مطلب اگونہی ہدایت دین والے آ جاندے نیں۔ یعنی اوس دے اندرونے دا اوہ انگ جاگ پیندا ہے جو کہندا ہے جو جیس راہ تے توں چل رہیا ہیں اوہ ہی سچ تے حقیقت ہے تے ایس تے صدق نال چلدا رہو۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels