Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> آکھیا وارث شاہ نے >> ہیر وارث شاہ: بند 110

ہیر وارث شاہ: بند 110

September 17th, 2009

بچہ دوہاں نیں رب نوں یاد کرنا ناہیں عشق نوں لیک لگاونا ای
بچہ کھا چوری چوئے مجھ بوری ذرا جیو نوں نہیں ولاونا اِی
اٹھے پہر خدائے دی یاد اندر تساں ذکر تے خیر کماونا اِی
وارث شاہ پنجاں پیراں حکم کیتا بچہ عشق نوں نہیں ڈولاونا اِی

اوکھے لفظاں دے معنے
خیر کماونا: عبادت کرنی ہے، خیرمنگنی۔ ولاونا: بھلیکھا، دوجے پاسے لا دینا۔ ڈولاونا: توجہ ہٹاؤنا

سدھا مطلب
پیر نے ہیر تے رانجھے نوں کہیا جو رب نوں یاد کردے رہنا تے عشق تے کوئی داغ نہیں لگن دینا
رانجھے نوں کہیا چوری کھا، بوری مجھ دا ددھ پی تے اپنے دل نوں بھٹکن نہیں دینا
سارا ویلا خدا دی یاد اندر رہنا تے نیکی کماؤندے رہنا
فیر ساریاں پیراں نے کہیا جو بچہ اپنے عشق توں ڈولنا نہیں۔

کھلارواں مطلب
جیویں پہلے بند وچ کہیا گیا سی جو رانجھا اندروں ڈولیا ہویا سی تے اوسے دے جواب وچ پیر ظاہر ہوئے یا رانجھے دے اندر نویاں شکتیاں جاگیاں۔ ایس بند وچ وارث شاہ عشق دیاں صفتاں وی دس رہیا ہے، جو عشق کیہ ہوندا تے کیہ نہیں ہوندا۔ عشق وچ پے جانا یا رجھ جانا ہی رب نوں یاد کرنا۔ ایس دے ایہہ معنے وی ہوئے جو عشق دا عمل ربی راہ ہے سو ایس توں تھڑک جانا عشق نوں لیک لاؤنا ہے ۔ ایہہ عمل ربی ایس لئی ہے جو عشق کرن والے باقی دنیا دیاں لالچاں تے لابھاں توں آزاد ہو جاندے ہین۔ رب دی یاد یا پاونا دنیا داری دے چکراں وچوں نکلن دا ناں ہے۔ہر شے نوں رد کے اک نوں مننا بھاویں اوہ عورت نال میل ہی ہووے، رب دا پاؤنا ہے۔ ہیر رانجھا وی دنیا نوں تج کے اک دوجے نوں ملدے ہین تے ایس طرحاں اوہ ربی راہ دے مسافر ہین۔

ایس عمل نوں کردیاں دنیا دیاں نعمتاں نوں ماننا ( مل مارنا) وی درست ہے جیس نوں پیر "کھا چوری تے پی مجھ بوری" کہندے ہین۔ پر نال ہی ایہہ وی کہہ دتا جو ایہناں نعمتاں نوں کھاندیاں اپنے من نوں بھٹکن نہیں دینا۔ یعنی ایس دا خطرہ ہے جو ایہہ نعمتاں فیر دنیاداری دے ویہار وچ موڑ لے جاون ایسے لئی نعمتاں دے مانن والے سجھا توں جھبدے مگروں من نوں نہ بھٹکاون دی عشق وچ ہی رجھائی رکھن دی ہدایت ہے۔

عشق کرن دا ایہہ مطلب وی دسیا گیا ہے جو خدا دی یاد وچ رہندیاں نیکی دے عمل کماؤنے ہین۔ مطلب خلقت نال بھلا کرنا ہے کیوں جو ایہو نیکی کماؤنا ہے۔ ایتھے تسیں ایہہ ویکھو جو روزے نمازاں تے ہور ایسے عملاں بارے نہیں کہیا گیا جیہناں نوں ملانے لوک نیکی دسدے ہین۔ سو عشق کرن والا جے سچا عشق کر رہیا ہے تے اوہ رب دی یاد وچ ہے تے اوس کولوں نیکی دے کماں توں وکھ کجھ ہو ہی نہیں سکدا۔ یعنی عشق چھڑا مرد زنانی دے میل دا ناں نہیں سگوں ایس میل وچ رب وی ہے تے نیکی وی۔

پہلاں تن مصرعے اک پیر دی ہدایت سی تے اخیر سارے پیر اک ہی ہدایت کردے ہین جو عشق توں اپنے اندر نوں ڈولن نہیں دینا۔
جیویں پہلاں کہیا گیا ہے ایہہ بند رانجھے دا اک واری فیر اپنے آپ نوں واچن تے عشق تے قائم رہن دے اقرار دا وکھالا ہے۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels