Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> آکھیا وارث شاہ نے >> ہیروارث شاہ بند ٣١

ہیروارث شاہ بند ٣١

May 31st, 2007

بھابی رزق اداس جاں ہو ٹریاں، ہن کاس نوں گھیڑ کے ٹھگدیاں ہو
پہلے ساڑ کے جیو نمانڑے دا، پچھوں بھلیاں لاونے لگدیاں ہو
بھائی ساک سن سو تسیں وکھ کیتے، تسیں ساک کیہ ساڈیاں لگدیاں ہو
اسیں کجڑے روپ کروپ والے تسیں جوبنے دیاں نئیں وگدیاں ہو
اساں آب تے طعام حرام کیتا تسیں ٹھگنیاں سارڑے جگ دیاں ہو
وارث شاہ اکلڑے کیہ کرنا، تسیں ست اکٹھیاں وگدیاں ہو

مشکل لفظاں دے معنے
رزق اداس ہونا۔ دانی پانی اٹھ جانا، دانا پانی ترک کر دینا
نمانڑے۔ نمانا، جیس دا کوئی مان نہ ہووے، یا جیس دا کسے شے تے وی مان نہ ہووے
بھلیاں لاونا۔ غلطیاں ٹھیک کرنا، معافی منگنا، بچیاں دی لکھت دیاں غلطیاں ٹھیک کرن نوں نوں بھلیاں لاونا کہندے ہیں۔ مطلب اوہ گل نوں ٹھیک کرنا جیہڑی بھل، یا غلطی ہو گئی ہووے
کجڑے۔ کجا، پانی لئی نکا جیہا گھڑا
روپ۔ حسن
کروپ۔ بد صورتی
نئیں۔ ندیاں

سدھا مطلب

رانجھا بھرجائیاں نوں آکھدا ہے جو جد میرا رزق ہی ایتھوں اٹھ گیا تے ہن تسیں مینوں گھیر کے کیوں ٹھگ رہیا ہو
پہلاں تسیں میرے ورگے نمانے تے ماڑے بندے دا دل ساڑیا تے ہن اوس نوں ٹھیک کر رہیاں ہو
ساڈا تہاڈے نال تے انج وی کوئی رشتہ نہیں ۔ بھرواں نال سی تے اوہ تساں تڑوا دتا
میں تے نکا جیہا بد صورت تے کوہجا بندہ ہاں ، تے تسیں حسن تے جوانی دیاں ندیاں ہو
اسیں ایتھے دا کھانا پانی اپنے آپ تے حرام کر لیا ہے ، تسیں سارے جہان دا ٹھگنیاں ہو
ییں اکلا تہاڈے برابر کیویں آ سکناں ہاں ، کیوں جو میں اک تے تسیں ست ہو۔

کھلارواں مطلب

ایس بند وچ رانجھا بھابیاں نوں جواب دینا ہے کہ اوس نے ہزارے دا دانا پانی اپنے آپ تے حرام کر لیا ہے۔ تے اوہ ہن نہیں رک سکدا۔ اوہنوں بھانیاں نال اوس طرحاں دا گلہ نہیں جیویں بھائیاں نال ہے جنہاں نوں کہندا ہے جو تسیں میرا سب کجھ کھوہ لیا ہے تے مینوں پھاہے لاون توں وی نہ رکو جے تہاڈے وچ وچ ہوے۔ بھرجائیاں نال گلہ ہے جو اوہناں اوہدا دل ساڑیا تے اوسنوں رنگ برنگ دے طعنے مارے۔

وارث شاہ ساری لکھت وچ عورت دے بھیڑ تے مرد دے ظلم وچ فرق کردا ہے۔ اوس نوں پتہ ہے جو ایہہ مرداں دا نظام ہے ایس وچ عورت طعنیاں مہنیاں توں ودھ بہتا کجھ نہیں کر سکدی۔ اوہ تے آپ ملکیت ہے اوہ کیویں مالکی والیاں دی برابری کر سکدی ہے۔ ایسے لئی رانجھا بھرجائیاں تے اوہ الزام نہیں لاوندا جیہڑا بھائیاں تے لاوندا ہے۔



Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels