Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> آکھیا وارث شاہ نے >> ہیر وارث شاہ بند ٣٢

ہیر وارث شاہ بند ٣٢

June 4th, 2007

واہ لا رہے بھائی بھابیاں بھی، رانجھا اٹھ ہزاریوں دھایا اے
بھکھ ننگ نوں جھاک کے پندھ کرکے راتیں وچ مسیت دے چھایا اے
ہتھ ونجھلی پکڑ کے رات ادھی رانجھے مزا بھی خوب بنایا اے
رن مرد نہ پنڈ وچ رہیا کوئی سبھا گرد مسیت دے آیا اے
وارث شاہ میاں پنڈ جھگڑیاں دی پچھوں ملاں مسیت دا آیا ہے


مشکل لفظاں دے معنے

واہ۔ جتن، کوشش
دھایا۔ زور نال اگے ودھنا
جھاک۔ جھل کے، سہہ کے، برداشت کر کے
پندھ۔ سفر
چھانا۔واس کرنا، ٹکا کرنا، کسے تھاں نوں رہن لئی چننا (شاید چھاونی وی ایس توں ہی نکلیا ہے)۔
سبھا۔ سارے

سدھا مطلب

بھائی تے بھرجائیاں بڑے جتن کیتے پر رانجھا اوہناں نال رس کے تخت ہزارے توں نکل ٹریا
بھکھ تے ننگ سہہ کے تے لما سفر کر کے اوس مسیت وچ آن کے ڈیرا کر لیا
رانجھے ادھی رات نوں ونجھلی ہتھ وچ پھڑ کے (اپنیاں دھناں نال) بڑا مزے والا سماں بنا دتا
پنڈ دے سارے مرد تے عورت مسیت دے دوالے اکٹھے ہو گئے
وارث شاہ کہندا ہے جو اوہناں توں مگروں مسیت دا ملاں وی آگیا جیہڑا جھگڑیاں دی پنڈ ہے۔

کھلارواں مطلب

بھائیاں تے بھرجائیاں رانجھے نوں سچیاں جھوٹیاں تسلیاں دتیاں، اپنیاں کیتیاں تے گھٹا پاون دی کوشش کیتی پر رانجھے نے اوہناں دی اک وی گل نہ منی ۔ 'تخت ہزاریوں دھایا' وچ 'دھایا' دی آواز توں پتہ لگدا ہے جو رانجھا پرانے رشتیاں نوں مڈھوں تروڑ کے اپنا دیس چھڈ رہیا ہے۔ 'دھایا' توں لگدا ہے جو وارث شاہ رانجھے دے جاون نوں کوئی اداس تے غمناک سین دسن دی تھاں اک طرحاں دیاں رشتیاں دے پورا ٹُٹن دا نقشہ کھچ رہیا ہے۔۔رانجھے دے پرانے سماج نالوں ساک توڑن دا منظر

اگلے مصرعے وچ وارث شاہ رانجھے دیاں اوکھتاں دا ذکر کردا ہے جو اوہ کیویں پرانی حیاتی دی سوکھتا نوں چھڈ کے مشکلاں جھلدا ہے۔ ایتھے اک گل تے وارث شاہ ایہہ کہ رہیا ہے جو رانجھا کوئی نکما، نکھد تے ملوک منڈا نہیں جیویں اوس دے بھرا بھرجائیاں یاں پروفیسر شریف کنجاہی ہوریں سمجھدے ہین۔ اوہ اپنی چون دی حیاتی لبھن لئی سوکھ نوں چھڈ کے بھکھ ننگ سہہ سکدا ہے تے لما سفر کر سکدا ہے۔

مسیت وچ چھایا دا اک مطلب تے سدھا ایہہ ہے جو اوتھے جا کےٹک گیا۔ پر 'چھایا' نوں جے اسیں کسے تے حاوی ہوجانا دے معنیاں وچ وی لئیے تے ایس دا مطلب ہے جو اوس مسیت وچ جا کے مسیت دے مڈھلے متے یاں مقصد نوں جگا دتا۔ مسیت دے ادارے تے انہوویں صدی تیکر ملا شاہی تے صوفیاں وچکار جنگ رہی ہے۔ ملاں ایس نوں اپنی ریت دا مذہب چلاون لئی ورتنا چاہنے ہین تے صوفی ایس نوں لوکاں دے اکٹھ دی تھاں منندے ہین۔ جتھے آئے گئے مسافر ٹک سکدے ہین۔ جتھے موسیقی تے نچن دا سواد مانیا جا سکدا ہے۔ ایس لئی ویکھو ساڈی لکھت 'مسیت دا دارہ: ملاں یا لوکائی دا'
http://www.wichaar.com/item.php?c=11id&=941&s=19

اگلے مصرعے وچ ہی سانوں رانجھے دے مسیت تے 'چھا' جاون دا ہنگورا ملدا ہے جو اوہ ونجھلی پھڑ کے وجاونا شروع کر دا ہے۔ ونجھلی اوس دے دل دی ہوک ہے، اوس دے جیون ڈھنگ وچ ساہ لیونا ہے۔ جتھے وی رانجھے نوں وڈھی مشکل پیندی ہے، وارث شاہ اوس دے بلہاں نوں ونجھلی لا دیندا ہے، کیوں جو ایہہ اخیری سہارا ہے، اندر دی پکیائی تے ایمان دی سینت ہے۔

اج کسے مسافر دا مسیت وچ جا کے ونجھلی وجاون دا سوچنا وی اوکھا ہے پر وارث شاہ دے ویلیاں تیکر مسیت بارے صوفیاں دی ملانیاں نال جنگ جاری سی۔ پھیر وارث شاہ بابا فرید دا بہت منن والا سی جیویں اسیں ویکھیا جو اپنی لکھت دے شروع وچ اوس نبی، صحابہ تے پیر گیلانی توں بعد بابافرید تے پورا اک بند (بند نمبر ٥) لکھیا۔ وارث شاہ ہوراں نوں پتہ سی جو بابا فرید دا پاکپتن دے قاضی نال مسیت دی ورتوں تے ہی جھگڑا سی۔ قاضی دا اعتراض سی جو بابا فرید ہوریں مسیتے گاون سندے ہین تے کدی کدی نچدے وی ہین (ویکھو لکھت مسیت دا دارہ۔۔۔) ۔ ایس لئی وارث شاہ دا مڈھلا کردار رانجھا وی اوہو کر رہیا ہے جو بابا فرید ہوریں کردے سن۔

وارث شاہ رانجھے دی ونجھلی دی واج وچ اوس دی بھکھ تے ننگ بولدا سنندا ہے۔ ونجھلی دکھ دی ہوک بن کے وجدی ہے کوئی رناں بھرماون لئی نہیں جیویں بھابیاں مہنہ ماردیاں سن۔ ایسے لئی ونجھلی نال اک مزا اک نواں سماں بجھ جاندا ہے۔

ایہہ ونجھلی ادھی رات ویلے وج رہی ہے جدوں پنڈ دے مرد تے عورتاں سارے دن دے کماں دے پھنڈے ہوئے تھک ٹٹ کے سوں گئے ہین۔ پر اوہ ونجھلی دی واج تے جاگ جاندے ہین تے کلو ہم مسیت دے دوالے اکٹھے ہو جاندے ہین۔ ہونا تے ایہہ چاہیدا سی جو اوہ آکے رانجھے نوں پھینٹا لاوندے جیس اوہناں نیندر وچ لت ماری پر اوہ تے اوس واج دے موہ تے مسیت دوالے اکٹھے ہو جاندے ہین۔

ادھی رات دے ستیاں لوکاں دا ونجھلی دی واج تے جاگنا وی اک سینت ہے۔ ادھی رات تائیں نےندر ڈوہنگی ہو گئی ہوندی اے۔ مطلب ایہہ وی ہے جو جد انیاں تے ظلم دی رات لوکاں نوں تھکا کے سواں دیندی ہے تے کسے دی اک نویں ہوک اوہناں نوں جگا وی سکدی ہے۔ رانجھے دی ونجھلی دی واج ایہو جیہی اک نویں ہوک ہے۔ اوس دی ہوک وی بھکیاں لوکاں طرحاں دل وچ نکلی ہے تے باقیاں تیکر اپڑ گئی ہے۔

اخیری مصرع جاگرتا دے توڑ وچ ہے جتھے ملاں مسیت دا آن وکھالا دینداہے۔ وارث شاہ اوس دی تعریف ہی ایہہ کردا ہے جو اوہ جھگڑیاں دی پنڈ ہے، پر وارث شاہ ایہ وی دس رہیا ہے جو جدوں لوک گوڑھی نیندروں جاگ جاندے ہین تے ملا شاہی اوہناں نوں پھیر سوالن لئی آجاندی ہے [مشرف نوں بچاون لئی امام خانہ کعبہ سد لیا جاندا ہے]۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels