Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> آکھیا وارث شاہ نے >> ہیر وارث شاہ: بند 112

ہیر وارث شاہ: بند 112

September 21st, 2009

ہیر آکھدی بابلا عملیاں توں نہیں عمل ہٹایا جا میاں
جیہڑیاں وادیاں آد دیاں جان ناہیں رانجھے چاک توں رہیا نہ جا میاں
شِینھ چترے رہن نہ ماس باجھوں جھٹ نال اوہ رزق کما میاں
اِیہہ رضا تقدیر ہو رہی وارد کون ہوونی دے ہٹا میاں
داغ انب تے سار دا لہے ناہیں داغ عشق دا بھی نہ جا میاں
میں تاں منگ درگاہ تھیں لیا رانجھا چاک بخشیا آپ خدا میاں
ہور سبھ گلاں منظور ہوئیاں رانجھے چاک تھیں رہیا نہ جا میاں
اِیس عشق دے روگ دِی گل ایویں سِر جائے تے سِر نہ جامیاں
وارث شاہ میاں جیویں گنج سر دا باراں برس بناں ناہیں جا میاں

اوکھے لفظاں دے معنے
عملیاں: نشئی، نشے دا عادی۔ عمل: نشہ۔ وادیاں: عادتاں۔ شینھ: شیر۔ جھٹ: جھپٹنا، پنجے دا حملہ۔ ہوونی: تقدیر، کم ہونا۔ رسا: رس۔ گنج سر دا: سر تے والاں دا نہ اگنا۔ حاذق: حکیم۔ لادوا: لا علاج ، جیہنوں ڈاکٹراں لاعلاج کہہ دتا ہووے۔

سدھا مطلب
ہیر اپنی ماں تے قاضی نوں جواب وچ کہندی ہے جو عاشق نوں عشق دا اجیہا نشہ ہوندا ہے جیہڑا لاہیا نہیں جا سکدا۔
اوہ عادتاں جیہڑیاں ابد توں ہی لگ جان اوہ نہیں مکدیاں۔ رانجھا وی میرے لئی ایہو جیہی لت ہے جو ازلاں توں لگ گئی۔
ایہہ انج ہی ہے جیویں شیر تے چینے گوشت بغیر نہیں رہ سکدے تے اوہ جھبدے اپنا رزق مار لیندے ہین۔
ایہہ تے تقدیر تے ہوونی دی کھیڈ ہے تے ایس نوں کون موڑ سکدا ہے۔
ایہہ عشق انج ہی تقدیر دی ہوونی ہے تے ایس دا لگا داغ وی اجیہا ہے جیویں انب دے رسے یا سار (تلوار) دا ہووے۔ ایہہ کدی لتھدا نہیں ہے۔
میں تے آپ رب کولوں رانجھا ہی منگیا سی جو اوس نے مینوں بخش دتا۔
مینوں سب گلاں منظور ہین پر رانجھے بنا رہنا منظور نہیں۔
ایہہ عشق دا روگ اجیہا ہے جو سر چلا جاوے تاں وی ایس دا بھید نہیں دتا جاندا۔
وارث دا کہنا ہے جو ایس سر دے گنجے ہوون طرحاں ہے جو باراں سالاں وچ وی نہیں جاندا۔

کھلارواں مطلب
ایس بند وچ وارث شاہ ہیر دی زبانی اپنے عشق دے فلسفے تے چانن پاؤندا ہے جیویں ہیر کہندی ہے جو ایہہ اک عمل ہے اک نشہ ہے۔ جیس نوں ایہہ نشہ لگ جاوے اوہ اوس توں بنا رہ نہیں سکدا۔ مطلب اوس دی ہوند دی نینہ بن جاندا ہے۔ فیر ایس نشے دی تشریح کرن لئی کہندا ہے جو ایہہ ازلاں توں بندے نوں لگدی ہے۔ مطلب جو اوہ بندے دے جمن نال ہی اوس دی فطرت دے طور تے آؤندی ہے۔ہیر وی جماندرو عاشق جمی ہے ایس لئی اوہ رانجھے بنا رہ ہی نہیں سکدی،ایس بنا اوس دی ہوند ہو ہی نہیں سکدی۔

ہیر دی زبانی جو گل ہو رہی ہے کہ عشق ازلی ہے اوس دا مطلب ایہہ ہے جو بندہ اک دوجے نال پیار کرن لئی پیدا ہویا ہے۔ ایہہ اوہدی جماندرو صفت ہے۔ پر فیر سماج دے نظام وچ اوہ وکھرا ہو جاندا ہے، ہر دوجے بندے لئی اوپرا ہو جاندا ہے کیوں جو اوہنوں دوجیاں نال مقابلہ کر کے اپنے آپ نوں پالناہوندا ہے۔ ایس مقابلے بازی وچ بندہ بندے دا ویری ہو جاندا ہے ۔ پر جے کوئی بندہ اپنی جماندرو اپنی خصلت نال فیر جڑ جاوے تے بندے دے بندے نال عشق نوں کھوج لوے تے اوس نال جڑ جاوے تے فیر اوہ مڑ نہیں سکدا۔ بندے نال بندے دے عشق دا نشہ ساری نشیاں توں ودھ ہے تے ایہہ اتر نہیں سکدا۔ ہیر تے رانجھے نے ایسے جماندرو پیار نوں لبھ لیا ہے تے ہن اوہ ایس نشے بنا رہ نہیں سکدے۔ شاہ حسین ہوریں کہندے ہین:
 
ملاں قاضی متیں دیندے، کھڑے سیانے راہ دسیندے
عشق کیہ لگے راہ دے نال، نیوں لا لیا بے پرواہ دے نال

اک ہور کافی وچ شاہ حسین کہندے نیں

کن فیکون اگے دیا ں لگیا، نیوں نہ لگڑا چوری دا
اک رانجھا مینوں لوڑیدا۔۔۔۔

ایسے تے سلطان باہوریں کہندے ہین:

جیں دل عشق خرید نہ کیتا سو دل درد نہ پُھٹی ہُو
اُس دل تھیں سنگ پتھر چنگے جو دل غفلت اَٹی ہُو
جیں دل عشق حضور نہ منگیا سو در گاہوں سُٹی ہُو
ملیا دوست نہ باہُو جنہاں چوڑ نہ کیتی ترُٹی ہُو

وارث شاہ عشق نوں ازل توں متھی تقدیر تے ربی اصول ایس لئی کہہ رہیا ہے جو اوہ سمجھدا ہے جو بندہ بندے نال پیار کرن لئی جمیا سی۔ بندے لئی پیار دی لوڑ انج ہی ہے شیر تے چیتے نوں ماس دی تے ایس دی بندے دی ہستی تے چھاپ انج ہے جیویں انب دے رسے دا داغ۔ ایسے لئی ہیر دا درگاہ توں رانجھے نوں منگن دا مطلب ہے اوس مڈھلے ربی اصول نوں مننا تے اوس نوں ہنڈاؤنا۔ ظاہر گل ہے رب نے ہیر نوں رانجھا بخش دتا کیوں جو اوس نے بندے نوں بنایا ہی پیار کرن لئی سی۔

ایسے لئی ہیر ایہہ وی کہندی ہے جو اوس نوں ہرگل منظور ہے پر رانجھے نوں چھڈنا منظور نہیں۔ سب کجھ چھڈن دا مطلب ہے اپنے میل دا سارا سکھ ساری پونجی تے سردارنی ہوون دی حیثیت چھڈنا۔ اوہ ایہہ سب کجھ چھڈن لئی ایس لئی تیار ہے جو اوس تے ربی باندھ دا بھید کھل چکیا ہے۔ اوس نوں بندے دی ہوندا دا مڈھلا مقصد پتہ لگ گیا ہے۔ ہن ایس راہ نوں چھڈنا تے کراہے پینا اوس دے وس وچ وی نہیں رہیا۔

عشق وچ بے وسی ہی اوس نوں عشق دا درجہ دیندی ہے۔وس ہوون دا مطلب ہے جو تسیں اک بندے دے بغیر وی رہ سکدے ہو تے بے وسی دا مطلب ہے تسیں اوس بنا جی ہی نہیں سکدے۔ ایس پکھ تے کئی فلماں وی بنیاں ہین۔ اک نویں بنی فلم" لو آٓجکل" وچ پرانی نسل دا ویر سنگھ نویں نسل دے جے وردھن نوں ایہو کہندا ہے جو ہرلین کور نال عشق کرنا، اوس نال ملن دی تانگھ رکھنا، اوس دے وس وچ نہیں سی۔ جے وردھن ایس نوں جھلا سمجھدا ہے پر آپ ایسی حالت وچ پہنچ جاندا ہے جتھے اوس نوں پتہ لگدا ہے جو اپنی دوست میرا توں بنا اوہ جیوندا رہ ہی نہیں سکدا تے اوہ کہندا ہے جو اوس کول وی ہن وس نہیں رہیا۔ اوہ ہن بے وس ہے تے میرا نوں حاصل کرن لئی کجھ وی کر سکدا ہے۔ ہیر ایسے بے وسی دی گل کر رہی ہے۔

اخیر تے ہیر ایہہ وی کہہ دیندی ہے جو عشق دے روھ دا راز ایہہ ہے جو سر لتھ جاوے پر ایس نوں نہ دسیا جا سکدا ہے نہ چھڈیا جا سکدا ہے۔ ایسے لئی کہیا گیا ہے:

جے تیں پیار کرن دا چاؤ ، سر دھر تلی میری آؤ

اخیر تے وارث شاہ عام بندیاں دے تجربے ول پرت کے کہندا ہے جو عشق دی بے وسی انج ہی ہے جیویں سر دے گنجے ہوون دا کوئی علاج نہیں۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels